Numbers 20

Amharic Dawro DFBE (ጌሻ ማጻፋ) No Year

← Chapter 19 Jump to: Chapter 21 →

1ኮይሮ አግናን እስራኤላቱ ኡባይ ጺና ግያ መላ ቢታ ጋኪደ፥ ቃዴሳ ግያ ሳን ዱንካኔድኖ። ሄዋን ሚርያማ ሀይቃደ ሞገታዱ።

2ሄዋን አሳዉ ሃይ ይና፥ አሳይ ሺቂደ፥ ሙሴ ቦላነ አሮና ቦላ ደንዴዳ።

3ኡንቱንቱ፥ “ኑ እሻቱ መና ጎዳ ስንን ሀይቄዳ ዎደ፥ ኑንካ ሀይቄዳዋ ግዴሮኮሻ!

4ኑንነ ኑ መሂ ሀ መላ ቢታን ሀይቃናዳን፥ መና ጎዳ አሳ ሀዋ ህንተ አያዉ አሄድቴ?

5ሀ ዎልቃማ ሳኣ ኑና ግብጼፐ ፑደ አያዉ አሄድቴ? ሀዋን ካ አይፊ፥ ዎይ ባላስያ፥ ዎይ ዎይንያ አይፊ፥ ዎይ ሮማኒ ባዋ፤ ቃይ ኡሽያ ሃይካ ሀዋን ባዋ” ያጊደ ሙሴና ዋላቀቴድኖ።

6ያትና ሙሴነ አሮን አሳ ማታፐ ጋከትያ ዱንካንያ ፐንገ ቢደ ጉፋኔድኖ፤ መና ጎዳ ቦንቹ ኡንቱንቶ ቆንጬዳ።

7መና ጎዳይ ሙሳ፥

8“ነ ጋትማ አካ፤ ኔንነ ነ እሻ አሮን ሺቁዋ ሺሽተ፤ ኡንቱንቱ ስንን ዛላይ ሃ ጎጋና ማላ ኦዳ። ዛላፐ ሃ ህንተ ከሲደ፥ ሽቁዋነ ኡንቱንቱ መህያ ኡሻና” ያጌዳ።

9መና ጎዳይ አዛዜዳዋዳን፥ ሙሴ መና ጎዳ ስንፐ ጋትማ አኬዳ።

10እነ አሮን ሺቁዋ ዛላ ስንን ሺሼድኖ፤ ሙሴ ኡንቱንታ፥ “ህንተኖ ማካላንቻቶ፥ ስስተ፤ ሀ ዛላፐ ሃ ህንተንቶ ኑን ቱሙ ከሳኔ?” ያጌዳ።

11ሙሴ ባረ ኩሽያ ቁ ኦደ፥ ባረ ጋትማን ላኡ ገደ ዛላ ሾጭና፥ ሃይ ቂደ ከስና ያአይነ ኡንቱንቱ መሂ ኡሼዳ።

12ሽን መና ጎዳይ ሙሳነ አሮና፥ “እስራኤልያ አሳ ስንን ህንተ ታ ጌሻተ በሳናዉ አማነትቤና ድራዉ፥ ታን ኡንቱንቶ እምያ ቢታ ሀ አሳ ህንተ ገልስክታ” ያጌዳ።

13እስራኤልያ አሳይ መና ጎዳና ዋላቀቶዌ እ ባረ ጌሻተ ኡንቱንቱ ግዶን ቆንጭሴዳሳይ ሀ ማሪባ ሃና።

14ሙሴ ቃዴሳፐ ኤዶማ ቢታ ካትያኮ፥ ባረ ኪተትያዋንታ ሀዋዳን ያጊደ ኪቴዳ፤ “ነ ዳቦ ግድያ እስራኤልያ አሳይ ሀዋዳን ያጌ፤ ‘ኑና ጋኬዳ መቱዋ ኡባ ኔን ኤራሳ።

15ኑ ማይዛ አዎቱ ዱገ ግብጼ ዎድኖ፤ ያን ኑን ዳሮ ላይ ደኤዶ። ግብጼቱ ኑናነ ኑ አዎቱዋ ኡቅኔድኖ።

16ኑን መና ጎዳዉ ዋስና፥ ኑ ዋሱዋ ስሲደ፥ ኪታንቻ ኪቲደ፥ ኑና ግብጼፐ ከሴዳ። ሀእ ኑን ነ ቢታ ጋጻን ደእያ ቃዴሳ ካታማን ደኤቶ።

17ሀያና፥ ኑና ነ ቢታና አርኪ! ኑን አይ ጋደ ግዶፐካ ዎይ ዎይንያ ቱራ ግዶፐካ ቦቾኮ! ቃይ ኑን አይ ሃ ኦላፐነ ሃ ኡሾኮ። ኑን ካትያ ኦግያ ኦይቂደ ባና፤ ኑን ነ ቢታና አና ጋካናዉ፥ ሀድርሳ ዎይ ኡሸቻ ጎኮ’ ያጌ” ያጌዳ።

18ሽን ኤዶማ ካቲ፥ “ኑ ቢታና አከ፤ ህንተ ሀዋና መንና ካጄሎፐ፥ ኑን ደንዲደ ህንተና ማሻን ኦላና” ያጌድኖ።

19እስራኤላቱ አ፥ “ኑን ካትያ ኦግያና ባና፤ ኑን ዎይ ኑ መሂ ህንተ ሃ ኡሾፐ፥ ኑን ሄዎ ጋትያ ጭጋና። ኑን ገድያን አ ጻላላ ኮዬቶ፤ ሀራባ አያነ ኮዮኮ” ያጌድኖ።

20ኤዶማ ካቲ ዛረደ፥ “ህንተና አከ” ያጌዳ። ሄዋፐ ጉይያን፥ ዳሮነ ዎልቃማ ኦላንቻቱዋ አኪደ፥ እስራኤልያ አሳና ኦላ ጋከታናዉ ከሴዳ።

21ኤዶማቱ ባረንቱ ቢታና እስራኤልያ አሳይ አናዉ ድጌዳ ድራዉ፥ እስራኤልያ አሳይ ስሚደ ሀራ ኦግያ ቤዳ።

22እስራኤልያ አሳይ ኡባይ ቃዴሳፐ ደንዲደ፥ ሆራ ግያ ደርያ ቤድኖ።

23ኤዶማ ዛዋ ማታን ደእያ ሆራ ደርያን፥ መና ጎዳይ ሙሳነ አሮና፥

24“አሮን ሀይቂደ ባረ ማይዛን ጋከትያ ዎዲ ጋኬዳ። ማሪባ ሃ ማታን ህንተ ላኡካ ታ አዛዙዋ ቦላ ማካሌዳ ድራዉ፥ እስራኤልያ አሳዉ ታን እምያ ቢታ እ ገለና።

25አሮናነ አ ናኣ ኤልኣዛራ አካደ፥ ሆራ ደርያ አሀ።

26አሮና ማዩዋ ቃራደ፥ አ ናኣ ኤልኣዛራ ማይዛ። አሮን ባረ ማይዛን ጋከታና፤ እ ያን ሀይቃና” ያጌዳ።

27መና ጎዳይ አዛዜዳዋዳን ሙሴ ኦዳ፤ አሳይ ኡባይ ጼልሽን፥ ኡንቱንቱ ሆራ ደርያ ከሴድኖ።

28ሙሴ አሮና ማዩዋ ቃሪደ፥ አ ናኣ ኤልኣዛራ ማይዜዳ። አሮን ሄ ደርያ ሁጲያን ሀይቄዳ። ሄዋፐ ጉይያን፥ ሙሴነ ኤልኣዛር ደርያፐ ዎድኖ።

29አሮን ሀይቄዳዋ አሳይ ኡባይ ኤሬዳ ዎደ፥ እስራኤልያ አሳይ ኡባይ አሮናዉ ሀታሙ ጋላሳ ዬኬዳ።

← Chapter 19 Jump to: Chapter 21 →