Numbers 34

Amharic Dawro DFBE (ጌሻ ማጻፋ) No Year

← Chapter 33 Jump to: Chapter 35 →

1መና ጎዳይ ሙሳ ሀዋዳን ያጌዳ፤

2“ኔን እስራኤላቱዋ ሀዋዳን ያጋደ አዛዛ፤ ‘ላታዳን ህንተና ጋክያ ካናነ ቢታ ዛዋይ ሀዋ።

3ገድሳ ባጋና ህንተ ዛዋይ ጺና መላ ቢታነ ኤዶማ ዛዋ ግዳናዋ። አዋይ ዶልያ ባጋና ህንተ ገድሳ ዛዋይ ማጽንያ አባ ገድሳፐ ዶሜ፤

4አቅራቢማ ፑደና ገድሳ ባጋና ስሚደ፥ ጺና መላ ቢታ አደ፥ ቃዴሳ-ባርነ ገድሳ ጋኬ፤ ሄዋፐ ሀዳር-አዳራ አደ፥ አጽሞና ጋኬ።

5አጽሞናፐ ግብጼ ሻፋኮ ስሚደ፥ ሜድተራነ አባ ጋኬ።

6“ ‘አዋይ ዉልያ ባጋና ህንተ ዛዋይ ሜድተራነ አባ ጋጻ ግዳናዋ።

7“ ‘ሁጲሳ ባጋና ህንተ ዛዋይ ሜድተራነ አባፐ ሆራ ደርያ ስት ኦ ቢደ፥

8ሆራ ደርያፐ ሌቦ-ሀማታ ፕኑዋ ጋካናሳ፤ ሄዋፐ ጻዳዳን ዛዋቴ።

9ቃይ ዝፍሮነፐ ቢደ፥ ሀጻር-ኤናና ጋኬ። ሁጲሳ ባጋና ህንተ ዛዋይ ሀዋ ግዳናዋ።

10“ ‘አዋይ ዶልያ ባጋና ህንተ ዛዋይ ሀጻር-ኤናናፐ ሻፋማ ጋካናዉ ስት ኦ ቢደ፥

11ሻፋማፐ ቢደ፥ አይናፐ አዋይ ዶልያ ባጋና ደእያ ርብላ ዎደ፥ ጋሊላ አባፐ አዋይ ዶልያ ባጋና ደእያ ደርያ ጋኬ።

12ሄዋፐ ዱገ ዮርዳኖሳ ሻፋ ዎ ዛዋቲደ፥ ማጽንያ አባ ጋኬ። ህንተ ቢታ ዛዋይ ኡባ ባጋናካ ሀዋ’ ያጋ” ያጌዳ።

13ሙሴ እስራኤላቱዋ ሀዋዳን ያጊደ አዛዜዳ፤ “ኤጻ የጊደ፥ ህንተ ላታና ማላ፥ ኡዱፑን ዛረቶነ ባጋ ዛረቶ ሄ ቢታይ እመታናዳን መና ጎዳይ አዛዜዳ።

14አያዉ ጎፐ፥ ሮቤላ ዛራቱ ጋዳ ዛራቱነ፥ ምናሰ ዛራቱዋፐ ባጋይ ባረንቱ ላታ እያርኮ ሄፍንን ዮርዳኖሳ ሻፋፐ አዋይ ዶልያ ባጋና አኬድኖ” ያጌዳ።

16መና ጎዳይ ሙሳ ሀዋዳን ያጌዳ፤

17“ሄ ቢታ ህንተንቶ ላታ ኦደ፥ ሻክ እማና አሳቱ ሱንይ ሀዋ፤ ቄስያ ኤልኣዛራነ ኔዌ ናኣ ኢያሳ።

18ቃይ ቢታ ሻካናዉ ማዳና ማላ፥ ዛረ ኡባፐ እት እት ካፑዋ ሱንተ።

19ኡንቱንቱ ሱንይ ሀዋፐ ካሊደ ደእያዋ። ዛርያ ካፑዋ ይሁዳ ይፉነ ናኣ ካሌባ፤

20ስሞና አምሁዳ ናኣ ሻሉምኤላ፤

21ቢንያማ ክስሎና ናኣ ኤልዳዳ፤

22ዳና ዮግላ ናኣ ቡቃ፤

23ዮሴፎ ናኣ ምናሰ ኤፎዳ ናኣ ሀንኤላ፤

24ዮሴፎ ናኣ ኤፍሬማ ሽፍጻና ናኣ ቃሙኤላ፤

25ዛብሎና ፓርናካ ናኣ ኤልጻፋና፤

26ይሳኮራ አዛና ናኣ ፓልጽኤላ፤

27አሴራ ሻሎማ ናኣ አህሁዳ፤

28ንፍታሌማ አምሁዳ ናኣ ፓዳህኤላ፤

29ካናነ ጋድያን እስራኤላቶ ላታ ሻክ እማና ማላ፥ መና ጎዳይ አዛዜዳ አሳቱ ሀዋንታ” ያጌዳ።

← Chapter 33 Jump to: Chapter 35 →