Jeremiah 12

Amharic Gamo (ጋሞ ማጻፋ)

← Chapter 11 Jump to: Chapter 13 →

1ኣቤት ጎዳዉ! ታኒ ኔናራ ፓላሜቲዛ ዎዴ ኡባንካ ኔ ጺሎ። ኢታ ኣሳቲ ኦዛይሲ ኢስታስ ኣይስ ኢንጄቲዜ? ኣማኔቶንታይቲ ኣይስ ኢሻሎ ዱስ ዲዞ?

2ኔኒ ኢስታ ቶካዳሳ፤ ሂስቲን ጻጶ ዬዲዳ፤ ዲጪዲ ኣይፌ ኣይፊዳ። ኢስቲ ኔና ዶናፔ ዬጌቴና፤ ኔኒ ጊዲኮ ኢስታ ዎዚናፔ ሃኮን ዳሳ።

3ጊዶ ኣቲን ኣቤት ጎዳዉ! ኔኒ ታና ኤራሳ። ታና ቤኣሳ፤ ታኒ ኔስ ኣይ ቆፒዛኮ ፓጫሳ። ሹኬታና ቢዛ ዶርሳታ ማላ ኔኒ ኢስታ ላጋ! ሹካ ጋላሳስ ኢስታ ዱማ ሻካ ዎ!

4ኢራይ ዪን ቢታይ ኣይዴ ጋካናስ ሜላኔ? ማታይካ ኣይዴ ጋካናስ ሜላኔ? ኣሳ ኢታቴፌ ዴንዲዳይሳን ሜዶሳቲኔ ካፎቲ ይዳ። ሄሳ ቦላካ ኣሳይ፥ «ጎዳይ ኑኒ ኦዛይሳ ዴሜና» ጌስ።

5ጎዳይ ኤርማሳስ፥ «ኔኒ ቶሆን ዎጺዛ ኣሳታራ ዎጻዳ ዳቡርኮ ፓራራ ዋና ጋዴ ዎጻኔ? ኔኒ ሳሮ ቢታን ጴቲኮ፥ ዮርዳኖሴ ዎራ ጋርሳን ዋና ሄሜታኔ?

6ኔ ኢሻቲኔ ኔ ሶሆ ኣሳቲ ኔና ሂሊዳ፤ ኔ ቦላ ዋሲዳ፤ ሄሳ ጊሻስ ኢስቲ ኔስ ሎኦ ሃሳይኮካ ኔ ኢስታ ኣማኖፓ።

7ታኒ ታ ኬ ኣጋና፤ ታ ጺንጾዮካ ዬጋ ኣጋና፤ ታኒ ታ ሲቂዛ ኣሳ ኢስታ ሞርኬታ ኩሼን ኣ ኢማና።

8ታ ጺንጾያ ዎራ ጊዶን ዲዛ ጋሞ ማላ ታ ቦላ ዴንዳዱስ፤ ታ ቦላካ ጻጋዱስ፤ ሄሳ ጊሻስ ታኒ ኢዞ ኢጻዲስ።

9ታ ጺንጾያ ጲርጮቲ ማና ጊዶዳ ካፎ ማላ ጊዳቤኬ? ቢዲ ዎራ ዶኣታ ኡባ ሺሺቴ፤ ኢስቲ ኢዞ ዱ ማና ማላ ጼይጊቴ።

10ዳሮ ሄንንቻቲ ታ ዎይኔ ቱራ ሶሆ ሞሪዳ፤ ታኒ ኢዛን ኡፋዬቲዛ ታ ጋዴዛ ቡላሲዳ።

11ሄ ቢታይ ታ ሲንን ባዞ፥ ቡላኔ ሜላ ቢታ ጊዳና፤ ኢዚስ ቆፒዛይ ባይንዳ ጊሻስ ቢታያ ባዞ ጊዳና።

12ባዞን ዲዛ ዙምቡላታ ቦላፌ ይሲዛይቲ ያና፤ ጋሶይካ ጎዳ ማሻይ ቢታ ሃ ጋጻፔ ሄ ጋጻ ጋካናስ ማና። ሄሳ ጊሻስ ኦኒካ ኣታናስ ዳንዳዬና።

13ኢስቲ ጊስቴ ዜሪዲ ኣጉን ጫካና፤ ኢስቲ ዳሮ ዳቡራናሺን ኣይኮካ ዴሜቴና፤ ዳሮ ዜሪዲ ጎዳ ሃንቆ ጋሶን ኢንቴ ጉ ዴሚዲ ዬላታና» ጊዴስ።

14ጎዳይ፥ «ታኒ ታ ዴሬ ኢስራኤሌስ ኢሚዳ ጺንጾ ቢታ ኦይኪዛ ኢታ ሾሮታ ታኒ ኢስታ ኢስታ ቢታፌ ቃላና። ቃሴ ዩሁዳ ኣሳታካ ኢስታ ጊዶፌ ቃላና።

15ጊዶ ኣቲን ታኒ ኢስታ ኢስታ ቢታፌ ቃሊዳፔ ጉዬ ዛራዳ ማራና፤ ታኒ ኢስታ ዴሬኒኔ ኢስታ ጺንጾን ጺንጾን ዛራ ኤሃና።

16ካሴ ታ ኣሳ ባኣሌ ሱንን ጫቃና ማላ ታማርሶይሳካ፥ ‹ጎዳይ ቤኢን!› ጊዲ ታ ሱንን ጫቂኮ ኢስቲ ታ ኣሳ ጊዶን ጻጵዲ ዳና።

17ታ ጊዛዝ ኤኮንታ ካዎቴ ዲኮ ታ ኢዛ ሙሌራ ቃላ ይሳና» ጌስ።

← Chapter 11 Jump to: Chapter 13 →