Jeremiah 50 — Amharic Gamo (ጋሞ ማጻፋ)

1ባቢሎኔ ቢታኔ ባቢሎኔ ኣሳ ጊሻስ ጾሲ ናቤ ኤርማሳ ባጋራ ዮቲዳ ቃላይ ሃይሳፌ ካሊዛይሳ፤

2«ካዎቴታ ኡባ ጊዶን ኣዋጂቴ! ባንዲራ ቁ ሂስቲ ኦይኪዲ ኣዋጂቴ! ኣይኮካ ኣሾንታ ዲሼ፥ ‹ሄኮ ባቢሎኔይ ኦይኬታና፤ ቤሌይ ካዉያና፤ ማርዱኬይ ሺሮን ኩማና፤ ኢዚ ኤቃ ጾሳቲ ካዉያና፤ ኢዚ ኤቃ ሚስሌቲ ሜቄሬታና› ጊቴ።

3ፑዴሃ ባጋፌ ኢሲ ካዎቴይ ዪዲ ባቢሎኔ ቢታ ኦላና፤ ሄሳፌ ዴንዲዳይሳን ኣሲኔ ሜሄይ ባቃታና፤ ቢታዮካ ቡላ ኬሳና፤ ኦኒካ ኢዚን ዴና።»

4ጎዳይ፥ «ሄ ዎዴኒኔ ሄ ጋላሳታን ኢስራኤሌ ኣሳይኔ ዩሁዳ ኣሳይ ኢሲፌ ያና፤ ጎዳ ባንታ ጾሳ ኮዪሼኔ ዬኪሼ ያና።

5ኢስቲ ጺዮኔ ኤፊዛ ኦጌ ኦይቻና፤ ባንታ ሲን ሄ ዛራና፤ ዪዲ ሙሌራ ዶጌቶንታ ሜርና ጫቆ ቃላን ጎዳራ ኦይኬታና።

6«ታ ዴሬይ ይዳ ዶርሳ ማላ ጊዲዴስ፤ ኢስታ ሄንንቻቲ ኢስታ ባሌዲ ዎራ ካሌዳ፤ ዙማታ ቦላኔ ዙምቡላታ ቦላ ቶይላቲዳ፤ ባ ኣቂዛሶካ ዶጊዳ።

7ዴሚዳ ኡባይ ኢስታ ቆሄስ፤ ኢስታ ሞርኬቲ፥ ‹ኑ ቦላ ሞሮይ ባ፤ ሃይሲ ሜቶይ ኢስታ ጋኪዳይ ባንታ ኣዋታስ ሂዶታ ጊዲዳ ጎዳ፥ ቱማፔ ኢስታስ ዱሳሶ ጊዲዳ ጎዳ ቆሂዳ ጊሻሳ› ጊዳ።

8«ባቢሎኔፔ ባቃቲቴ! ኢስታ ቢታካ ዬዲቴ! ዉዴ ካሌዛ ዴይሻ ኦርጌ ማላ ጊዲቴ።

9ታኒ ፑዴሃ ባጋፌ ዎልቃማ ካዎቴታ ባቢሎኔ ቦላ ዴንና፤ ኢስቲካ ኢዚ ቦላ ሳልፋና፤ ሂስቲዲ ኢዞ ሄፔ ኦይካና፤ ኢስታ ዎንዳፌይ ዬዶንታ ሎሂዳ ኦላንቻታ ማላ።

10ባቢሎኔ ቢታይ ቦንቄታና፤ ኢዞ ቦንቂዛይቲ ባስ ጊዳናሼ ጋካናስ ቦንቃና» ጌስ።

11«ኢንቴኖ ታ ጺንጾ ቦንቂ ኤኪዳይቶ! ኢንቴ ኡፋዬቲዳ ጊሻሲኔ ኡፋይሳን ማጉሊዳ ጊሻስ፥ ዴምባን ጺኬቲዛ ኡሳ ማላ ኢንቴ ሊፍጼቲዳ ጊሻስ፥ ዎዳላ ፓራ ማላ ኢንቴ ጫጊዳ ጊሻስ፥

12ኢንቴ ኣያ ኬሃ ዬላታና፤ ኢንቴና ዬሊዳራካ ካዉያና፤ ካዎቴታ ኡባ ጊዶን ኢዛ ጉ ጊዳና፤ ኢዛ ኣሲ ባይንዳሶ፥ ሃ ባይንዳ ቢታኔ ባዞ ጊዳና።

13ጎዳ ሃንቆ ጋሶን ኢዛ ባዞ ጊዳና ኣቲን ኣሲ ኢዚን ዴና፤ ኢዚ ቦላ ጋኪዳ ባሻ ጋሶን ባቢሎኔራ ኣ ቢዛ ኡባይ ማላሌቲሼ ኢዛ ቂና።

14«ኢንቴኖ ዪሻን ዱኪዛይቶ! ባቢሎኔ ኦላናስ ኢዚ ዩሾን ሳልፍቴ፤ ናጋራ ኦዳ ጊሻስ ኢንቴ ዪሽ ኢሲኖካ ኣሾንታ ኢዚ ቦላ ዬዲቴ።

15ኡባ ባጋራካ ኢዚ ቦላ ማጉሊቴ! ኢዛ ኢንቴስ ኩሼ ኢማና፤ ኢዚ ሚጻቲኔ ጊምቤቲ ላሌታና፤ ሃይሲ ጎዳይ ሃሎ ኬሲዛ ኦጌ ጊዲዳ ጊሻስ ኢንቴ ኢዚ ቦላ ሃሎ ኬሲቴ፤ ኢዛ ሃራታ ቦላ ኦዳ ማላ ኢንቴ ኢዚ ቦላ ኦቴ።

16ባቢሎኔፔ ዜሬ ዜሪዛይሳ፥ ካ ሺሾ ዎዴ ጫካናስ ባጫ ኦይኪዳይሳ ይሲቴ፤ ኡንኤዛይታ ማሻፌ ዴንዲዳይሳን ኢሶይ ኢሶይ ባ ኣሳኮ ሲሞ፤ ባ ዴሬካ ባቃቶ።

17«ኢስራኤሌይ ጋሞይ ጎዲዲ ላሊዳ ዉዴ ማላ ጊዲዴስ፤ ኮይሮ ኣሶሬ ካዎይ ፑዜሬ ሚዴስ፤ ጉዬፔ ባቢሎኔ ካዎ ናቡካዳናጾሬይ ሜቄ ጊዴስ» ጌስ ጎዳይ።

18ሄሳ ጊሻስ ኡባፌ ዎልቃማ ጎዳ ኢስራኤሌ ጾሳይ፥ «ኣሶሬ ካዎ ታኒ ቃጻይዳ ማላ ባቢሎኔ ካዎኔ ኢዛ ቢታ ቃጻያና።

19ጊዶ ኣቲን ታኒ ኢስራኤሌ ካሴ ኢዚ ሄሜቲዛሶ ኢዛ ዛራና፤ ቃርሜሎሴኒኔ ባሳኔ ዴሬን ኢዚ ሄሜታና፤ ቃሴ ኢዚ ኤፍሬሜ ዙምቡላታ ቦላኔ ጋላኣዴ ዙምቡላታ ቦላ ካላናሼ ጋካናስ ማና» ጌስ።

20ሄ ዎዴታኒኔ ሄ ጋላሳታን ጎዳይ፥ «ኢስራኤሌ ሞሮይ ኮዬታና፤ ጊዶ ኣቲን ኢሲናካ ቤቱኩ፤ ዩሁዳ ናጋራይካ ኮዬታና፤ ጊዶ ኣቲን ሙሌካ ቤቴና፤ ሃይቆፔ ታ ኣሺዳ ሾጌታ ታ ማራና» ጌስ።

21«ሚራታይሜኒኔ ፓቆዴን ዲዛ ኣሳ ጎዲቴ፤ ዎቴኔ ሙሌራ ይሲቴ፤ ታኒ ኢንቴና ኣዛዚዳይሳ ኡባ ኦቴ።

22ሄ ቢታን ኦላ ሺሮይኔ ጊታ ባሻ ዋሶይ ሴቴቲዴስ።

23ኣላሜ ኡባ ሊቂሲዛ ማዶሻይ ዋኒ ሜቂዴ? ዋኒ ሊቂዴ? ካዎቴታ ጊዶን ዋና ባቢሎኔይ ቡላ ጊዳዴ?

24ሃኔ ባቢሎኔ! ታ ኔስ ዎጺማዴ ዎዲስ፤ ኔካ ኤሮንታ ዳሼ ኦይኬታዳሳ፤ ኔኒ ጎዳራ ኤቄቲዳ ጊሻስ ቤታዳ ኦይኬታዳሳ።

25ጎዳይ ባ ኦላ ማሳራ ዎዛ ሚንጃ ኬ ዶይዴስ፤ ባ ሃንቆ ኦላ ማሳራ ኬሲዴስ፤ ጎዳይ ኡባፌ ዎልቃማ ጾሳይ ባቢሎኔ ቢታን ኦዛ ኦሶይ ዴስ።

26ያራ ሃራ ኢዚ ቦላ ዎራጂቴ፤ ኢዚ ጎታራታ ላሊቴ፤ ዲኤቲዳ ሚሻ ካ ማላ ዶሪቴ፤ ሙሌራ ኢዞ ይሲቴ፤ ኢዚን ኣይኮይካ ኣቶፎ።

27ኢዚ ዎፋኖታ ኡባ ሹኪቴ፤ ዱጌ ሹኬቲዛሶ ዎቶ! ኢስቲ ቃጻዬታና ዎዴይኔ ጋላሳይ ጋኪዳ ጊሻስ ኣዬ ኣና!

28«ጎዳ ኑ ጾሳይ ሃሎ ኬሲዳይሳ፥ ጾሳ ኬ ጊሻስ ሃሎ ኬሲዳይሳ ባቢሎኔፔ ቤቲዳይቲኔ ጎዴቲዳይቲ ጺዮኔን ሃሳይዛይሳ ሲዪቴ።

29«ዎንዳፌን ኦሊዛይታ ባቢሎኔ ቦላ ጼይጊቴ፤ ኢሳዴይካ ኬሲ ኤኪ ቦንታ ማላ ኢስታ ጊዶዲ ዱንካኒቴ፤ ጎዳ ኢስራኤሌ ጌሻ ካዉሺዳ ጊሻስ ኢዚ ኦሶ ማላ ኢዚስ ዛሪቴ፤ ኢዛ ሃራታ ቦላ ኦዳይሳ ኢዚ ቦላ ኦቴ።

30ሄሳ ጊሻስ ኢዚ ናቴ ኣቱማ ናይቲ ኣሶን ኣሶን ሃይቃና፤ ኢዚ ኦላንቻቲ ኡባይ ሄ ጋላስ ኩንዳና» ጌስ ጎዳይ።

31ጎዳይ ኡባፌ ዎልቃማ ጾሳይ፥ «ኔኖ ኦቶራንቻዞ! ታኒ ኔ ቦላ ዴንዳዲስ፤ ኔኒ ቃጻዬታና ዎዴይኔ ጋላሳይ ጋኪዴስ።

32ኦቶራንቻይ ጴቲዲ ኩንዳና፤ ዴንናይካ ዴና፤ ኢዛ ዩሾን ዲዛይታ ኡባ ሚዛ ታማ ኢዛ ካታማታ ቦላ ዬዳና» ጌስ።

33ጎዳይ ኡባፌ ዎልቃማ ጾሳይ፥ «ኢስራኤሌ ኣሳይኔ ዩሁዳ ኣሳይ ኢሲ ቦላ ቆሄቲዴስ፤ ዲኢዳይቲ ኡባይ ኢስታ ሚን ኦይኪዳ፤ ኢስታ ዬዳናስ ኢጺዳ።

34ጊዶ ኣቲን ኢስታ ዎዚዛይ ሚኖ፤ ኢዛ ሱንይካ ጎዳ ኡባፌ ዎልቃማ ጾሳ፤ ኢስቲ ቢታስ ሼምፖ ኢማናስ ኬሂ ባጼቴስ፤ ጊዶ ኣቲን ባቢሎኔን ዲዛይታስ ሼምፖ ይሴስ» ጌስ።

35ጎዳይ፥ «ማሻይ ባቢሎኔ ኣሳ ቦላ ዪዴስ፤ ኢዚን ዲዛ ኣሳታ ቦላ፥ ማታይ ዲዛ ኣሳታ ቦላኔ ኣ ኤራንቻታ ቦላ ሲፋናስ ሾዴቲዴስ።

36ማሻይ ዎርዶ ጊዲዳ ኢዚ ናቤታ ቦላ ዪዴስ፤ ኢስቲ ኤያታ ጊዳና፤ ማሻይ ኢስታ ኦላንቻታ ቦላ ሾዴታና፤ ኢስቲካ ሺሮታና።

37ኢስታ ፓራታ ቦላኔ ኢስታ ፓራ-ጋሬታ ቦላ ቃሴ ኢዚ ጊዶን ዲዛ ሃራ ዴሬ ዎታዳራታ ቦላ ማሻይ ያና፤ ኢስቲካ ማጫሳታ ማላ ጊዳና፤ ማሻይ ኢዚ ኣቆታ ኡባ ቦላ ያና፤ ኢስቲካ ቦንቄታና።

38ቢታያ ባቢሲዛኔ ኣስ ጎሺዛ ኤቃ ጾሳታን ኩሚዳ ጊሻስ ኢዚ ሃታ ቦላ ኣርሼይ ኬዛና፤ ኢስቲካ ሜላና።

39«ሄሳ ጊሻስ ባዞ ዶኣታሲኔ ጎዳሬስ ዱሳሶ ጊዳና፤ ጉቶስ ኣቆሶ ጊዳና፤ ሃይሳፌ ጉዬ ኦኒካ ኢዚን ዴና፤ ዬሌታፔ ዬሌታ ጋካናስ ኢዚን ኡታናይ ቤቴና።

40ሶዶሜኔ ጋሞራ ካታማ ኢስታ ዩሾን ዲዛ ዴሬታ ኣሲ ዶንታ ማላ ኦዴስ፤ ሄሳካ ኦኒካ ሄን ዴና፤ ኢዚን ኡታናይካ ቤቴና» ጌስ።

41«ቤኢቴ! ፑዴሃ ባጋፌ ኣሳይ ዬ ቦላ ዴስ፤ ኢሲ ዎልቃማ ካዎቴኔ ዳሮ ካዎቲ ሳኣ ጋጻፔ ዴንዲዳ።

42ኢስቲ ዎንዳፌታኔ ማሻታ ኦይኪዳ፤ ኢስቲ ማሮንታ ሜንጼ ኢታታ፥ ማሮካ ኦቴና፤ ኢስቲ ፓራታ ቶጊሺን ኢስታ ጊሪሳይ ኣባ ዳምባላ ማላ ጉሜስ፤ ሃኔ ባቢሎኔ ማጫ ናዬ! ኦላስ ጊጌቲዳ ኦላንቻታ ማላ ኔ ቦላ ያና።

43ባቢሎኔ ካዎይ ኢስታ ጊሻስ ሲዪዴስ፤ ኢዛ ኩሼቲካ ዶጪዳ፤ ኢዛ ጬጬይ ኦይኪዴስ፤ ሚጻይ ኦይኪዳ ማጫሳ ማላ ሳኬቲዴስ።

44ጋሞይ ዮርዳኖሴ ዎራታፔ ሜሄ ሄሚዛ ዴምባን ኬዚ ዎዛ ማላ ታኒካ ባቢሎኔይ ቆፖንታ ዲሺን ኬዛ ዎና፤ ኢዚ ቢታፌ ታ ኢዞ ጎዳና፤ ታ ዶሪዳይሳ ኢዚ ቦላ ሹማና፤ ታ ማላይ ኦኔ? ታናራ ኤቄታና ዳንዳይዛይ ኦኔ? ታናራ ኤቄታና ዳንዳይዛ ሄንንቻይ ኦኔ?

45ሄሳ ጊሻስ ጎዳይ ባቢሎኔ ቦላ ሃልቺዳ ሃልቾ፥ ባቢሎኔ ቢታ ቦላ ቆፒዳ ቆፋ ሲዪቴ! ጉ ዉዴይ ጎሼቲ ባና፤ ኢስታ ጋሶን ሄሚዛሶሆዛ ሙሌራ ይሳና።

46ባቢሎኔ ኩንዴ ጊሪሲ ቢታ ቃና፤ ኢዚ ዋሶይ ካዎቴ ኡባ ጋርሳን ኮሹማና» ጌስ።