Jeremiah 49

Amharic Gamo (ጋሞ ማጻፋ)

← Chapter 48 Jump to: Chapter 50 →

1ኣሞኔ ኣሳ ጎዳይ፥ «ኢስራኤሌይ ኣቱማ ናይታ ዬሊቤኔ? ዎይኮ ኢዛ ላታናይቲ ባዌ? ሂስቲን ሚልኮሜይ ጋዴ ኣይስ ላቲዴ? ኢዛ ኣሳቲ ኣይስ ካታማይን ዲዞ?

2ኣሞኔ ካታማ ኤራባ ቦላ ኦላ ዋሶ ጬንጉርሲ ሴቴታና ዎዴይ ያና። ኢዛ ቡታዳ ዶሬቲዳ ዶሬ ጊዳና፤ ኢዚ ጉታቲ ኡባይ ጹጌታና፤ ኢስራኤሌይ ባና ኬሲ ጎዲዳይታ ባ ዴሬፔ ኬሳ ጎዳና።

3ሃኔ ሃሴቦኔ! ኣዬ ካታማይ ይዳ ጊሻስ ዬካ፤ ኤራባ ማጫ ናይቶ ዋሲቴ፤ ማቃ ማይኢዲ ዬኪቴ፤ ጋሶይካ ሚልኮሜይ ባ ቄሴታራኔ ባ ሹሜታራ ዲኤቲዲ ባና፤ ዲርሳ ጊዶን ያኔ ሃ ዎጼሬቲቴ።

4ሃኔ ካዲዳሬ! ኔኒ ኔ ሾባታን ኣይስ ኣማኔታይ? ኔኒ ሎኦ ካ ኢሚዛ ኔ ሾባን ኣይስ ጬቄታይ? ኔኒ ኔ ዱሬቴን ጬቄታዳ፥ ‹ታና ኦኔ ቦቻናይ?› ጋሳ።

5ታኒ ኔ ዩሾን ዲዛይታፔ ኔ ቦላ ሺሮ ኤሃና፤ ኢንቴ ኡባይካ ጎዴታና፤ ባቃታ ቦላ ዲዛይታ ሺሻና ኣሲ ቤቴና።

6«ሄሳፌ ጉዬ ታኒ ኣሞኔ ኣሳፔ ዲኤቲዳ ሚሻ ዛራና» ጌስ።

7ኤዶሜ ጊሻስ ጎዳይ ኡባፌ ዎልቃማ ጾሳይ፥ «ኣ ኤራቴ ቴማኔ ኣሳፔ ይዴ? ዞሬይ ኣኬካንቻታፔ ሃኪዴ? ኢስታ ኣ ኤራቴይ ጪንጊዴ?

8ታኒ ኤሳዌ ቃጻዪዛ ዎዴ ታ ኢዛ ቦላ ባሻ ኤሂዛ ጊሻስ ኢንቴ ዲዳኔን ዲዛይቲ ጉዬ ሲሚ ባቃቲቴ፤ ጪማ ኦላ ጊዶን ቆቴቲቴ።

9ዎይኔ ማጺዛይቲ ኢንቴኮ ዪዲ ማጺሼ ፑሹሎ ኣሺ ኤሬቴኔ? ካይሶቲ ካይሶታና ጌሊኮ ባ ኮዪዳይሳ ጻላ ኤኬቴስ ዴቴኔ?

10ጊዶ ኣቲን ታኒ ኤሳዌ ፓጻ ካሎ ኣሻና፤ ኢዚ ቆቴቲ ኣቶንታ ማላ ኢዚ ቆቴታናሶሆታ ታኒ ቆንጬ ኬሳና፤ ኢዛ ናይቲ፥ ኢዛ ዳቦቲኔ ኢዛ ሾሮቲ ያና፤ ኢዚካ ባ ሁኤስ ዴና።

11«ዬሊዳ ኣያኔ ኣዋይ ባይንዳ ኔ ጋርሳን ዲዛ ናይታ ኔ ኣጋጋ፤ ታ ኢስታ ዲቻና፤ ኣምኤቲካ ታናን ኣማኔቴቶ» ጌስ።

12ጎዳይ፥ «ጻዋ ኡያና ቤሶንታይታስ ጻዋ ኡሺ ኣቶንታይሳ ጊዲኮ ኔኒ ዋና ቂጻቴፔ ኣታኔ? ኔስ ቃጻዬቴ ኣቴና፤ ኔ ኡያናስ ቤሴስ።

13ቦጺራይ ላሌታዳ ዳጋማስ፥ ቂሲኔ ቃንጌስ ማላታ ጊዳና ማላ ታኒ ታናን ጫቃዲስ፤ ኢዚ ካታማቲ ኡባይ ሜርናስ ኣይኮይ ባይንዳ ቡላ ጊዳና» ጌስ።

14ጎዳፔ ዪዳ ኢሲ ኪታ ሲያዲስ፤ «ኤዶሜ ቦላ ዎራጃናስ ሺቂቴ፤ ኦሌታናስ ዴንዲቴ!» ጊ ዮቲዛ ቃስታኔይ ካዎቴታኮ ኪቴቲዴስ።

15ጎዳይ፥ «ሃኢ ታኒ ኔና ካዎቴታ ጊዶን ላፋ፤ ኣሳ ጊዶንካ ካቲዳዴ ኦና።

16ኔኖ ዛላ ጎንጎሎ ጊዶን ዲዛይሶ! ኔኖ ቃ ዙምቡላ ሁኤን ኡቲዳይሶ! ኔ ዮምቢዛ ዮምባይኔ ኔ ዎዚና ኦቶሮይ ኔና ባሌዴስ፤ ኔኒ ኔ ኬ ጎሌ ማላ ቃሶሆን ኬጺኮካ ታኒ ኔና ሄፔ ዱጌ ኦላና» ጌስ።

17ጎዳይ፥ «ኤዶሜይ ዳጋማስ ማላታ ጊዳና፤ ሄራ ኣዛ ኣስ ኡባይ ኢዚ ቦላ ጋኪዳ ባሽ ቤኢዲ ማላሌቲሼ ቂና።

18ሶዶሜይኔ ጋሞራይ ባንታ ዩሾን ዲዛ ካታማታራ ኢሲፌ ይዳ ማላ ኤዶሜይ ያና፤ ኦኒካ ሄ ቢታን ዴኤና፤ ኢሳዴይካ ኢዚን ኡቴና» ጌስ።

19ጎዳይ፥ «ጋሞይ ዮርዳኖሴ ዎራታፔ ሜሄ ሄሚዛ ዴምባን ኬዚ ዎዛ ማላ ታኒካ ኤዶሜይ ቆፖንታ ዲሺን ኬዛ ዎና፤ ኢዛ ቢታፌ ታ ኢዛ ጎዳና፤ ታ ዶሪዳይሳ ኢዛ ቦላ ሹማና፤ ታ ማላይ ኦኔ? ታናራ ኤቄታና ዳንዳይዛይ ኦኔ? ታናራ ኤቄታና ዳንዳይዛ ሄንንቻይ ኦኔ?» ጌስ።

20ሄሳ ጊሻስ ታኒ ጎዳይ ኤዶሜ ቦላ ፖላናስ ሃልቺዳ ሃልቾኔ ቴማኔን ዲዛይታ ቦላ ታ ቆፒዳ ቆፋ ሲዪቴ! ጉ ዉዴቲ ጎሼቲ ባና፤ ሄሳ ጋሶን ዉዴይ ሄሜቲዛሶ ሙሌራ ይሳና።

21ኤዶሜ ኩንዴ ጊሪሲ ቢታ ቃና፤ ኢስታ ዋሶይካ ዞኦ ኣባ ጋካናስ ኮሹሜስ።

22ጎሌ ማላ ዱጌ ሲቲ ጊ ኢዚ ቦላ ዎና፤ ባ ቄፌታካ ቦጺራ ቦላ ሚጫና፤ ሄ ዎዴ ኤዶሜ ኦላንቻቲ ሚጻይ ኦይኪዳ ማጫሳ ማላ ሂርጋና።

23ጎዳይ ዳማስቆ ጊሻስ፥ «ሃማቴ ኣሳይኔ ኣርፋዴ ኣሳይ ዳማስቆ ካታማ ዮ ሲዪዲ ዳጋሚዴስ፤ ኣባ ዳምባላ ማላ ሺሮቲዴስ፤ ኢስታ ዎዚናይካ ሴሪዴስ።

24ዳማስቆይ ዳቡራዱስ፤ ባቃታናስ ጉዬ ሲማዱስ፤ ኮኮራዱስ፤ ሚጻይ ኦይኪዳ ማጫሳ ማላ ጬጬይኔ ቱጋይ ኢዞ ኦይኪዴስ።

25ታ ኢዚን ኡፋዬቲዛ ኤሬቲዳ ካታማያ ዋና ዬጌታ ኣታዴ?

26ሄ ዎዴ ኢዚስ ናቴ ኣቱማ ናይቲ ኡባይ ኬኢዳሶን ኬኢዳሶን ኦጌ ቦላ ኩንዳና፤ ኦላንቻቲ ኡባይካ ሃይቂ ዉራና።

27ታኒ ዳማስቆ ካታማ ዩሾን ዲዛ ጊምቤ ቦላ ታማ ዬዳና፤ ሄ ታማይ ቤኒ-ሃዳዴ ሻኮ ማና» ጌስ።

28ባቢሎኔ ካዎ ናቡካዳናጾሬይ ኦሊ ጾኒዳ ቄዳሬ ካዎቴ ጊሻሲኔ ሃጾሬ ካዎቴ ጊሻስ ጎዳይ፥ «ዴንዲዲ ቄዳሬ ኦሊቴ! ኣርሼይ ሞኪዛ ባጋራ ዲዛ ዴራ ዲፒ ሂስቲቴ።

29ኢስታ ዱንካኔታኔ ኢስታ ዉዴታ ኤኪቴ! ኢስታ ኣቆሶይኔ ኢስታ ጋሜላቲ ኡባይ ኣቶንታ ኤኬታና፤ ሂስቲዲ ኢስታስ፥ ‹ኢስታ ቦላ ሺሮ ቦላ ሺሮይ ዪዴስ› ጊዲ ዋሳና።

30«ኢንቴኖ ሃጾሬን ዲዛይቶ! ባቢሎኔ ካዎ ናቡካዳናጾሬይ ኢንቴ ቦላ ኢታ ሚሽ ኦና ማቄቲ ኡቲዳ ጊሻስ ባቃቲቴ፤ ቢዲ ጪማ ጎንጎሎን ቆቴቲቴ።

31«ዴንዲቴ! ሂርጋይ ባይንዳ ባ ጊ ኡቲዳ ባናን ኣማኔቲ ኡቲዳ ካዎቴ ኦሊቴ! ኢቢ ዎይኮ ኮላታይ ባይንዳ ዲሺን ባርካ ዲዛ ዴራ ቦላ ዎራጂቴ» ጌስ።

32ጎዳይ፥ «ኢስታ ጋሜላቲ ቦንቄታና፤ ኢስታ ዉዴታካ ቡሪ ኤኪ ባና፤ ባንታ ሁኤ ጋሜ ሂስቲ ሜዴቲዳይታ ታኒ ጫርኮን ላላና፤ ታኒ ኡባሶራ ኢስታ ቦላ ቦሻ ኤሃና።

33«ሃጾሬይ ዎራካናታ ዱሳሶ ጊዳና፤ ሜርናስ ቡላ ጊዳና፤ ኦኒካ ሄን ዴኤና፤ ኣይ ኣሲካ ኢዚን ኡቴና» ጌስ።

34ዩሁዳ ካዎ ሴዴቂያሲ ካዎቲዳ ኮይሮ ላይ ጎዳፔ ኤላሜ ጊሻስ ታኮ ዪዳ ቃላይ፥

35ኡባፌ ዎልቃማ ጎዳይ፥ «ሄኮ ኢዚ ዎልቃቴስ ዮች ጊዲዳ ኤላሜ ዎንዳፌታ ታ ሜንና።

36ኦይዱ ባጋ ጉላታፔ ታኒ ኤላሜ ቦላ ኦይዱ ጫርኮታ ኤሃና፤ ኢስታ ሄ ኦይዱ ባጋ ጫርኮታን ታ ላላና፤ ኤላሜፔ ዲኤቲ ቢዳይቲ ጋኮንታ ካዎቴይ ዴና።

37ኢስታ ሼምፖ ዎና ኮይዛ ኢስታ ሞርኬታ ሲንን ታኒ ኤላሜ ያርኪያርኪሳና፤ ኢስታ ቦላ ባሽ ኤሃና፤ ሄሲካ ታ ኢስታ ቦላ ኤሃና ሃንቆ፤ ታኒ ኢስታ ሙሌራ ይሳና ጋካናስ ማሻን ዬዴና።

38ታኒ ኣራታ ኤላሜን ቶካና፤ ታኒ ኢዚ ካዎታኔ ሹሜታ ይሳና።

39«ጊዶ ኣቲን ዉርሴ ዎዴታን ታኒ ኤላሜ ዛራ ኢሻልሳና» ጌስ።

← Chapter 48 Jump to: Chapter 50 →