Jeremiah 6

Amharic Gamo (ጋሞ ማጻፋ)

← Chapter 5 Jump to: Chapter 7 →

1ጎዳይ፥ «ኢንቴኖ ቢኒያሜ ዛሬቶ! ፑዴሃ ባጋፌ ኢታ ሚሺኔ ባሺ ያና ጊዛ ጊሻስ ኢንቴ ሼምፖ ኣሻናስ ባቃቲቴ! ዬሩሳላሜፔ ኬዚቴ! ቴቁሄ ካታማን ዛዬ ፑኒቴ! ቤቲ-ሃካሪሜን ማላታ ቤሲቴ!

2ታኒ ማላ ሎኦኔ ኡፋይሲዛ ጺዮኔ ናዮ ይሳና።

3ሄንንቻቲ ባንታ ዉዴ ኤኪዲ ኢዚ ቦላ ያና፤ ሂስቲዲ ኢዚ ዩሾን ባንታ ዱንካኔ ቶካና፤ ባንታ ዉዴ ባንታ ሶሆን ሶሆን ሄማና።

4ኢስቲ ኢሶይ ኢሳ፥ ‹ዬሩሳላሜራ ኦሌታናስ ጊጌቲቴ! ዴንዲቴ! ኣኔ ኑኒ ኢዞ ሴታ ጋላስ ኦሎስ። ጊዶ ኣቲን ኣዬ ኣና! ሳኣይ ቃሜስ፤ ኦማርሳ ኩዋይ ኣዱቂ ኣዱቂ ቤስ።

5ሄሳ ጊሻስ ዴንዲቴ! ኣኔ ኦማርስ ኦሎስ፤ ሂስቲዲ ኢዚ ሚጻካ ኣኔ ላሎስ› ጊዲ ማቄቲዳ» ጌስ።

6ኡባፌ ዎልቃማ ጎዳይ፥ «ሚታ ቃንጺቴ። ዬሩሳላሜ ጊምቤ ላንቄን ቢታ ዶሪቴ፤ ሃ ካታማይን ቆሆይ ኩሚዳ ጊሻስ ኢዚስ ቂጻቴይ ቤሴስ።

7ኦላፌ ሃ ፑልቲዛ ማላ ኢዛካ ባ ኢታቴ ፑልቲሳዉስ፤ ማካላ ሚሺኔ ባሻ ሚሺ ኢዚ ጊዶን ሴቴቴስ፤ ኡባ ዎዴ ኢዚ ሳኮይኔ ማዱን ታስ ቤቴስ።

8ሃኔ ዬሩሳላሜ ናጌታ፤ ኔ ኣካይ ጊኮ ታ ኔፔ ሻኬታና፤ ቃሴ ኔ ቢታካ ቡላሳና» ጌስ።

9ኡባፌ ዎልቃማ ጎዳይ፥ «ዎይኔ ቴራ ኢሲኖካ ኣሾንታ ማጺዛ ማላ ኢስራኤሌ ኣሳፔ ኣቲዳይታ ሄሳካ ማጺ ሺሺቴ። ዎይኔ ቴራ ማጺዛ ኣሳ ማላ ኢንቴ ኩሼ ሃጋታ ጊዶ ናምኣንካ ዬዲቴ» ጌስ።

10ታኒ ኦናስ ዮቶ? ኦና ሴሮ? ኦኒ ታ ጊዛዝ ሲያኔ? ሄኮ ኢስታ ሃይ ቱሌ ጊዲዳ ጊሻስ ኢስቲ ሲዬቴና፤ ጎዳ ቃላይ ኢስታስ ቂስ ኬዚዴስ፤ ኢስቲ ኢዛን ኡፋዬቴቴና።

11ሄሳ ጊሻስ ጎዳ ሃንቆይ ታናን ኩሚ ኡቲዴስ፤ ታኒ ሃ ሃንቆዛ ታ ኡሎን ኦይካና ዳንዳይኬ። ሂስቲን ጎዳይ ታና፥ «ታ ሃንቆዛ ኦጌን ዲዛ ጉ ናይታ ቦላኔ ሺቂዳ ዬላጋ ናይታ ቦላ ጉሳ፤ ማቻኔ ኣዚናይ፥ ጪሚዳ ኣሳቲካ ኬሲ ኤኪ ኣቴቴና።

12ታኒ ሄ ቢታን ዲዛይታ ቦላ ታ ኩሼ ዬዲዛ ዎዴ ኢስታ ኬቲ፥ ኢስታ ጋዴቲኔ ኢስታ ማቼቲካ ኣቶንታ ኡባይ ሃራታስ ጊዳና» ጌስ።

13ቃሴካ ጎዳይ፥ «ጉይካ ጊታይካ ኡባይ ባ ጎኣስ ዪቄቴስ። ናቤቲኔ ቄሴቲ ኡባይ ኣስ ባሌቴስ።

14ኢስቲ ታ ዴራ ማዱን ቄሪ ሚሻ ማላ ጼሊዳ፤ ፓጻና ማላ ኮሺዛ ኦሶ ኦቤቴና፤ ሳሮይ ባይንዳ፥ ‹ሳሮ፤ ሳሮ› ጌቴስ።

15ሃ ሃራሲዛ ኦሶዛ ጊሻስ ኢስቲ ዬላቲዶ? ኣካይ ሙሌካ ዬላቲቤቴና፤ ኢስቲ ዬላይ ኣዛኮ ኤሬቴና። ሄሳ ጊሻስ ኢስቲ ኩንዲዛይታራ ኢሲፌ ኩንዳና፤ ታኒ ኢስታ ቃጻዪዛ ዎዴ ኢስቲ ካዉያና» ጌስ።

16ጎዳይ፥ «ዳጋላ ኦጌ ቦላ ኤቂ ጼሊቴ፤ ቤኒ ኦጌዮ ኦይቺቴ፤ ሎኦ ኦጌይ ኣዋሪ? ኢዚራ ቢቴ፤ ኢንቴ ኢንቴ ሼምፖስ ሼምፖ ዴማና፤ ኢንቴ ጊዲኮ፥ ‹ኑ ኢዚራ ቦኮ!› ጊዴታ።

17ታ ኢንቴና ናጊዛይታ ዎዲስ፤ ‹ዛዬይ ፑኔቲሺን ሲዪቴ› ጋዲስ፤ ኢንቴ ጊዲኮ፥ ‹ኑኒ ሲዮኮ› ጊዴታ።

18ሄሳ ጊሻስ ካዎቴቶ፥ ሲዪቴ! ኢንቴኖ ማርካቶ! ኢስታ ቦላ ኣዚ ጋካናኮ ኣኬኪቴ።

19ቢታዬ ሲያ! ኢስቲ ታ ቃላ ሲዮንታ ኢጺዳ ጊሻሲኔ ታ ዎጋካ ካዳ ጊሻስ ታኒ ዴራ ቦላ ኢስታ ኢታ ቆፋ ማላ ባሽ ኤሃና።

20ኤጻኔይ ሳባ ቢታፌ ሳዊዛ ቂማሜይ ሃኮ ቢታፌ ዪኮ ታና ኣይ ጋኔ? ጹጌቲዛ ኢንቴ ያርሾዛካ ታ ኤኪኬ፤ ኢንቴ ሺሺዛ ሃራ ያርሾይካ ታና ኡፋይሴና» ጌስ።

21ሄሳ ጊሻስ ጎዳይ፥ «ታኒ ሃ ዴራ ሲንን ጲዛ ሚሽ ዎና፤ ኣዋቲኔ ኣቱማ ናይቲ ኢዛን ጴታና፤ ሾሮቲኔ ላጌቲ ያና» ጌስ።

22ቃሴካ ጎዳይ፥ «ሄኮ ፑዴሃ ባጋፌ ኦላንቻቲ ዬቴስ፤ ጊታ ካዎቴ ሳኣ ጋጻፔ ዴን ቦላ ዴስ።

23ኢስቲ ዎንዳፌኔ ቶራ ኦይኪዳ። ኢስቲ ሜንጼ ኢታታኔ ቃታይ ባይንዳይታ፤ ኢስቲ ባንታ ፓራታ ቶጊዛ ዎዴ ኣባይ ጉሚዛ ማላ ጉሜቴስ። ኢንቴኖ ጺዮኔ ማጫ ናይቶ! ኢስቲ ጊጌቲዲ ኢንቴና ኦላናስ ዬቴስ» ጌስ።

24ኑኒ ሄ ዮኦ ሲዪን ኑ ቄሴይ ኪምኢሊሽ ጊዴስ። ማጫስ ሚጻይ ኦይኪዳ ማላ ኑና ጬጬይ ኦይኪዴስ።

25ሞርኬይ ማሻ ጊጺዴስ፤ ኡባሶን ሺሮይ ኩሚዴስ፤ ሄሳ ጊሻስ ካሬ ኬዞፒቴ፤ ኦጌንካ ሄሜቶፍቴ።

26ታ ዴሬቶ ማቃ ማይኢቴ፤ ቢዲን ቦላ ቡሉሌቲቴ፤ ሜጺ ኢሲ ናይ ሃይቂዳ ኣሳ ማላ ጫሞ ዬሆ ዬኪቴ፤ ጋሶይካ ኑ ቆፖንታ ዲሺን ይሲዛይ ኑ ቦላ ያና።

27ጎዳይ ኤርማሳ፥ «ኤርማሳ! ቢራታ ፓጪዛዴ ማላ ኔኒ ታ ዴሬዛ ኦጌኔ ኢስታ ሄሜታ ፓጫና ማላ ታ ኔና ዎዲስ፤

28ኢስቲ ኡባይ ዚጊርሼ ዩዪዛይታኔ ዮቲን ኤኮንታ ማካላንቻታ፤ ኢስቲ ጻርቂማላ ማላኔ ቢራታ ማላ፤ ኢስቲ ኡባይካ ሞሮ ኦዛይታ።

29ቢራታ ሴሪሳናስ ዎምፒና ሎኤ ፑና፤ ጊዶ ኣቲን ኢታቲ ሙሌራ ፒቴቲ ኬዞንታ ጊሻስ ሄሲ ጮ ሃዳ ዳቡራ።

30ጎዳይ ኢስታ ካዳ ጊሻስ ኢስቲ ካቲዳ ቢራ ጌቴቲ ጼይጌታና» ጌስ።

← Chapter 5 Jump to: Chapter 7 →