Job 13

Amharic Gamo (ጋሞ ማጻፋ)

← Chapter 12 Jump to: Chapter 14 →

1«ሄኮ ሃይሳ ኡባ ታ ኣይፌይ ቤዪዴስ፤ ታ ሃይካ ሲዪዲ ኣኬኪዴስ።

2ኢንቴ ኤሪዛይሳ ኬና ታኒካ ኤራይስ፤ ታ ኣይኮንካ ኢንቴፌ ጉጺኬ።

3ጊዲኮካ ታ ሃሳያይ ኡባ ዳንዳይዛ ጾሳራ፤ ታ ኢዛራካ ማርሼታና።

4ኢንቴ ጊዲኮ ዎርዶን ኩሚዴታ፤ ኦናካ ፓናዉ ዳንዳዮንታ ኣኪሜታ ማላ።

5ሃይሳ ኡባፌ ኢንቴ ጮኡ ጊዳኮ ኤራንቻታ ሚሳቲ ቤታናኮሺን!

6ታኒ ሺሺዛ ማርሼ ቃላ ሲዪቴ፤ ታ ቆሆካ ታኒ ዮቲሺን ጮኡ ጊዲ ኤዝጊቴ።

7ጾሳ ሱንን ኣይስ ዎርዶ ሃሳዬቲ? ባሌን ኢንቴ ጾሳ ኡፋይሳና ኢንቴስ ሚሳቲዜ?

8ኢዛ ቤሶንታ ኦጌራ ማዴቲ? ኢዛስ ጻባቃ ኤቃንዴቲ?

9ጾሲ ኢንቴና ቆሪዳኮ ኢሲ ሎኦ ሚሽ ኢንቴፌ ዴማንዴሻ? ኢንቴ ኣሳታ ኤይሲዛይሳ ማላ ጾሳካ ኤይሳናዉ ዳንዳያና ኢንቴስ ሚሳቲዜ?

10ኢንቴ ጌማራ ዎርዶ ማዲኮ ቱማፔ ጾሲ ኢንቴና ሃንቃና።

11ኢዛ ቦንቾይ ኢንቴና ያሼኔ? ኢዛ ቴማይካ ኢንቴና ዳጋንኔ?

12ኢንቴ ሌሚሶን ሃሳይዛ ሃሳያቲ ቢዲን ማላ ጎኣይ ባይንዳይታ፤ ኢንቴ ማርሼቴይካ ማና ሚሻ ማላ ሜቄሬታና።

13ኣኔ ጮኡ ጊቴ! ታኒ ሃሳያና ማላ ታስ ጊሻ ኢሚቴ፤ ሄሳፌ ጉዬ ባ ዶሶይሳ ሃኖ።

14«ታኒ ኣች ሳጻዳ ጌንጬጫሼ ዲዛይ ኣዛሴ? ታ ሼምፖያካ ታ ኩሼን ዳዉስ።

15ሄሳ ጊሻስ ጾሲ ታና ዎና ኮይኮካ ታፔ ኣቲዛ ሚሺ ኣይኮይካ ዴና፤ ጊዲኮካ ታ ሃኖዛ ኢዛስ ኤሪሳና።

16ናጋራንቻ ኣሲ ጾሳ ሲን ሺቃናስ ዳንዳዮንታ ጊሻስ ኦኔ ኤሪዛይ ሃይሲ ታ ጻላቴ ፓጻናስ ጋሶ ጊዳናስ ዳንዳዬስ።

17ኣኔ ታ ሃሳይዛ ቃላታ ዎጋራ ኤዝጊቴ፤ ታ ዶናራ ታ ማርካቲዛይሳ ሲዪቴ።

18ታ ማርሼቴ ሎኤ ጊጊሳዳ ሺሻዲስ፥ ኢዚ ታስ ፒርዳናይሳካ ታ ኤራይስ።

19ታና ሞቲዛይ ዲኮ ታኒ ማርሼቶንታ ጮኡ ጋዳ ሃይቃና።

20«ጎዳዉ! ታ ኔ ሲንፌ ቆቴቶንታ ማላ ሄይታ ናምኡ ሚሻታ ታስ ኦ።

21ሄይቲካ ኔ ሃንቆ ቄሴታ ታ ቦላፌ ዴን፤ ያሺሲዛ ኔ ታማን ታና ዳጋንፋ።

22ጾሳዉ! ኮይሮ ኔ ሃሳያ፤ ታ ኔስ ዛሮ ኢማና፤ ታኒካ ሃሳያና፤ ኔካ ዛሮ ኢማ።

23ኤሮ ጊዶ ታ ኦዳ ናጋራይኔ ቆሆይ ኣይ ሊኬ? ኣኔ ታ ሞሮዛኔ ታ ናጋራ ታና ኤሪሳ።

24ኔ ሲን ታፔ ጌንዳ ታና ኔ ሞርኬ ማላ ኣዛስ ቆዳይ?

25ጫርኮይ ቆቆፊዛ ቦንጮ ማላኔ ሜላ ሃፓ ማላ ኔ ኣይስ ታና ያሺሴን ጎዳይ?

26ታ ቦላ ኔ ጻፊዳ ሞቶይ ኬሂ ጫሞ፤ ታኒ ዬላጋቴን ኦዳ ቆሆዛካ ታስ ኣጋቤካ።

27ኔ ታ ቶሆታ ዱሩማታ ጊዶን ቃቻዳሳ፤ ታ ታንጎ ኡባ ዎዴ ኔ ካሌታሳ፤ ታ ጌዶን ኔ ኤቃሳ።

28«ሄሳ ጊሻስ ታኒ ዎቂዳ ሚሻ ማላ ጊዳዳ ኣታና፤ ባዳይ ሚዳ ማይኦ ማላካ ታ ያና።

← Chapter 12 Jump to: Chapter 14 →