Job 39

Amharic Gamo (ጋሞ ማጻፋ)

← Chapter 38 Jump to: Chapter 40 →

1«ጌኔሳቲ ዬሊዛ ዎዴ ኔ ኤራይ? ዉሻ ጌቴቲዛ ዶኣይ ሚጻቲዲ ዬሊሺን ቤያ ኤራይ?

2ኢስቲ ሴባቲዲ ኣይ ላጌ ዎዴ ጋምኢዛኮ ኣዉዴ ዬሊዛኮ ኔ ኤራይ?

3ጉልባቲ ሚጻቲሼ ባንታ ማራታ ኢስቲ ዬሊዛይ ኣዉዴኮ ኔ ኤራይ?

4ኢስታ ማራቲ ዎራን ዲጪዲ ሚኔቴስ፤ ኢስታፌ ሻኬቲዲ ቤቴስ፤ ቢዳፔ ጉዬ ባንታ ኣዬታኮ ሲሜቴና።

5ሃርዲዳይ ዬዳ ዳና ማላ ኦዳይ ኦኔ? ኢስታ ቃሾፔ ቢርሺዳይ ኦኔ?

6ባዞዛ ኢስታስ ዲዛሶ ሂስታ ኢማዲስ፤ ማጺኔይ ዲዛ ዴምባን ኢስታ ዎዲስ።

7ካቺ ዳሪዛ ካታማታፔ ሃኪዲ ዴቴስ፤ ጉዬራ ላጊዛይቲ ቆዲዛይሳ ዶሴቴና።

8ዙማታ ቦላን ፔኤቴስ፤ ሄን ባስ ጊዲዛ ጪሊላ ማታ ኮዬቴስ።

9«ሜን ኔስ ኦናስ ኤኖ ጋንዴ? ዎይኮ ኔ ዜን ኤኖ ጊ ኤቃንዴ?

10ሜን ዋጻዳ ጎሽ ጎያናዉ ዳንዳያይ?

11ኢዛ ሚኖቴን ኔ ኣማኔታይ? ኔስ ዴጺዛ ኦሶዛ ኢዚ ኦና ማላ ኢዛስ ኣጋ ኤራይ?

12ኢዚ ኔኮ ሲሚ ያና ማላ፥ ኔ ካ ቡኪዛ ባሌይ ዲዛሶ ሚያናይሳ ኣማኔታይ?

13«ያንቻይ ባ ቄፌ ኤሶን ሚጫዉስ፤ ጊዶ ኣቲን ሳንጋኖ ካፎ ማላ ፒራኩ።

14ያንቻይ ባ ጱጱሌ ቢታን ዬጋዉስ፤ ቢታ ጊዶን ኡቲዲ ሆኣና ማላ ኦዉስ።

15‹ሄራ ኣዛዴይ ባ ቶሆን ሜንስ፤ ዎራ ዶኣቲካ ዬ ሊቂሴቴስ› ጋዳ ቆፑኩ።

16ባ ጪዬታስ ኣላጋ ማላ ሜንጼ ኢታዉስ፤ ኢዚ ዳቡራይ ሃዳን ኣቲኮካ ዉዳ ጉኩ።

17ሃይሳ ኢዚስ ጪንጫቴ ይሳዳ ኢዛ ኤሮንታ ማላ ኦዳይ ታና።

18ኢዛ ዴንዳዳ ዎጺዛ ዎዴ፥ ባናራ ጋዴ ዎጺዛ ቶጋታ ቦላ ሚጫዉስ።

19«ኢዮቤ! ፓራታስ ዎልቃ ኢሚዳይኔ ኣዱሳ ጋማ ኢስታ ሞርጌን ማይዚዳይ ኔኔ?

20ፓራታ ቦሌ ማላ ጉፒዛይ ኢስቲ ሃርቡቂሼ ኣሳታ ዳጋንና ማላ ኦዛይ ኔኔ?

21ፓራቲ ኦላ ዴምባ ቶጌቲ ቢሼ፥ ባንታ ዎልቃንካ ጬቄቲሼ፥ ሎዳን ኣዳራሶ ዶሜቴስ።

22ያሽ ጊዛ ሚሽ ሙሌካ ኤሬቴና፤ ኣይ ሚሺካ ኢስታ ዳጋንና፤ ኢስታ ቦላ ጊ ማሻ ዴንዳኮካ ጉዬ ሲሜቴና።

23ኢስታ ቶጊዛ ኦላንቻቲ ኦይኪዳ ኦላ ሚሻቲ፥ ዋዋጪ ጊሼ ባንታ ጊዶን ጊሬቲሼ ሲዬቴቴስ።

24ዛዬይ ዛዬቲሺን ጮኡ ጊ ኤቃናዉ ዳንዳዬቴና፤ ዪሎኒኔ ሃንቆን ኩሚዲ ኦላ ዴምባ ዎጼቴስ።

25ዛዬይ ፑኔቲዳ ታይቦን ኡፋይሳን ዋይቄቴስ፤ ሃኮን ዲሼ ኦላ ፔኖ ኤሬቴስ፤ ኦላ ካሌዛይቲ ኢሚዛ ኣዛዞዛኔ ኦላንቻታ ጬቄቴ ሲዬቴስ።

26«ጺሎይ ሳሎ ቦላ ፓሊዛይ፥ ኢዚ ባ ቄፌዛ ዱጌሃ ሚጪዛይ ኔ ኤራቴኔ?

27ጎሌይ ፑዴ ኬኢዲ ቃሶሆን ባ ኬ ኬጺዛይ ኔ ኣዛዚኔ?

28ጎሌይ ዛላታ ጊዶን ኣቄስ፤ ኬልካ ጊዶን ባ ኬ ኬጼስ፤ ዛላቲካ ኢዛስ ቆቴቲዛሶ ጊዴቴስ።

29ሄን ኡቲዲ ባስ ሚዛ ሚሽ ጼሌስ፤ ኢዛ ኣይፌቲካ ሃኮን ዲዛዝ ዴሜቴስ።

30ሃይሳ ማላን ጎሌቲ ሚዛዚ ዲዛሶ ሺቄቴስ፤ ኢስታ ጪዬቲካ ሱ ኡዬቴስ» ጊዴስ።

← Chapter 38 Jump to: Chapter 40 →