Job 16

Amharic Gamo (ጋሞ ማጻፋ)

← Chapter 15 Jump to: Chapter 17 →

1ኢዮቢካ ሂዝጊ ዛሪዴስ፤

2«ታኒ ሃይሳ ማላ ሃሳያ ዳሮ ዎዴ ሲያዲስ፤ ኢንቴ ሳሌዛ ዞራንቻታ።

3ሃይሳ ኢንቴ ሃዳ ሃሳያስ ዉርሴ ባዬ? ሃይሳ ላጌ ታናራ ማርሼታና ማላ ኢንቴና ዴንዳይ ኣዜ?

4ኢንቴ ታ ሶሆን ታኒ ኢንቴ ሶሆን ጊዲዳኮ ካን ታኒ ሁኤ ቃዳ ሃኢ ኢንቴ ጊዛይሳ ኡባ ኢንቴ ቦላ ሎኤ ሃሳያናኮሺን።

5ሄሳ ማላካ ታ ዶናን ኢንቴና ሚንናኔ ሚንናስ ዳሮ ሃሳያናኮሺን።

6«ጊዶ ኣቲን ዳሮ ሃሳይኮካ ታ ሃርጌይ ሃ ሎኤና፤ ጮኡ ጋ ዳንዳይኮካ ታ ዋዬይ ታፔ ኪቼና።

7ጾሳዉ! ታና ኣሳቴፌ ካሬ ኬሳዳሳ፥ ታ ዴሬ ኣሳ ኡባ ይሳዳሳ።

8ታ ኣሳቴይ ጉንዶይሲ ታ ቦላ ዴንዲዲ ኔኒ ናጋራንቻ ጊዲ ታ ቦላ ማርካቴስ።

9ጾሲ ታና ሃንቂዲ ታ ኣሳቴ ቃንጼሬዴስ፤ ታና ኢጺዲ ባ ኣች ታ ቦላ ጋርጪዴስ፤ ታ ሞርኬይ ባ ኣይፌ ታ ቦላ ማጺ ኬሲዴስ።

10ኣሳይ ታ ዩሾን ሺቄቲዲ ታ ቦላ ጬቄቲዴስ፤ ታና ቂ ቃላን ባቂዳ።

11ጾሲ ታና ኢታ ኣሳታስ ኣ ኢሚዴስ፤ ማካላንቻታ ኩሼን ዬጊዴስ።

12ታ ሳሮን ዳይሲኮሺን ጊዲኮካ ጾሲ ባ ሃንቆዛን ታና ሜንሬዴስ፤ ታ ቆ ጩሊ ኦይኪዲ ታና ዳቡርሲዴስ፤ ባ ቆፋ ታ ቦላ ፖሊዴስ።

13ዎንዳፋንቻቲ ታና ጊዶዳ፤ ቃቴ ባይንዳ ታ ኪላሆታ ቃንጼሬዳ፤ ታ ጪዬዛካ ቢታ ቦላ ጉሲዳ።

14ኢዚ ታና ዛሪ ዛሪ ማዱንዴስ፤ ሚኖ ኦላንቻ ማላ ዚዚሚ ዪዲ ታና ሾጪዴስ።

15«ታ ካዮቴስ ማቃ ሲካ ማይኣዲስ፤ ጉዱላ ቦላ ጉፋናዲስ።

16ታ ኣይፌሶይ ዬኮን ዞኢዴስ፤ ሳካና ማይ ታ ሲጲን ካሚዴስ።

17ሃይሲ ኡባይ ሃንሺን ታ ኦዳ ቆሆይ ዴና፤ ታኒ ታ ዎሳ ጾሳኮ ሺሺዛይ ዎዚና ጌሻቴና።

18«ቢታዞ! ታና ጋኪዳ ቆሆዛ ኔ ካሞፋ! ሱሬ ፒርዳ ጊሻስ ታ ሺሺዛ ማጋናይ ካሜቲ ኣታና ማላ ኔ ኦፋ!

19ሄኮ ታስ ማርካቲዛዴይኔ ኣፋካቶ ኤቂዛዴይ ሳሎን ዴስ።

20ታ ላጌቲ ታና ሌቆን ጼሌቴስ፤ ታኒ ጊዲኮ ፑዴ ጾሳስ ዬካይስ።

21ኣስ ኣሳራ ጋ ሃሳይሲዲ ማቃዪንዛዴይ ዲዛይሳ ማላ፤ ኣስ ጾሳራ ጋ ማቃዪንዛ ኣሲ ዲዳኮ ኣዜ ዲዛይ?

22«ታ ላይስ ዉርሴይ ጋኬስ፤ ታ ሃ ሲማ ዮንታሶ ባናስ ጉ ዎዴይ ጻላ ኣቲዴስ።

← Chapter 15 Jump to: Chapter 17 →