Job 18

Amharic Gamo (ጋሞ ማጻፋ)

← Chapter 17 Jump to: Chapter 19 →

1ሹሃ ዴሬ ኣስ ቤሊዳዲ ሂዝጊ ዛሪዴስ፤

2ኢዮቤ! ኔ ኣይስ ሃይሳ ማላ ሃሳያ ዳርሳይ? ኣኔ ኤዝጋ፤ ኑኒካ ሃሳዮስ።

3ኔኒ ኑና ኣይስ ሜሄታ ማላ ቆዳይ፤ ኔኒ ኣይስ ኑና ቱሌታ ማላ ኣኬኮንታ ኣስ ኦ ጼላይ?

4ኔኒ ሃንቄቲኮ ኔና ቆሃሳ ኣቲን ኔ ሃንቆዛን ቢታይ ሜላ ኣቴና። ዛላቲካ ባ ዲዛሶፔ ቃጼቴና።

5ናጋራንቻ ጾምፔይ ቶኣና፤ ታማ ላጮይካ ናምኣን ቤቴና፤

6ኢዛ ዱንካኔ ጊዶን ዲዛ ፖኦይ ቶኣና፤ ፖኦዚካ ማና።

7ኢዛስ ሚኖ ታንጎይ ቃሚ ቃሚ ባና፤ ጌኔ ቆፒዛዴ ቆፋይ ኢዛ ዛሪ ኩንዲሳና።

8ኢዚ ባርካ ቢዲ ዎጺማዴን ጌላና፤ ኢዛ ቶሆይካ ጊቴን ቃጼታና።

9ዎጺማዴይ ኢዛ ቂርጴ ኦይካና፤ ሄንካ ዋጺ ኣሻና።

10ሳኣ ቦላ ያርዴ ዎዶሮይ ሚጬቲዴስ፤ ኢዛ ኦጌንካ ዎጺማዴይ ጊጌቲዴስ።

11«ያሺ ኢዛ ጊዶዴስ፤ ጉዬራ ካሊ ካሊ ጎዴሬስ።

12ኢዛ ዎልቃይ ኮሻን ዉሪዴስ፤ ቦሻይካ ኢዛ ይሳናስ ጊጌቲዴስ።

13ሃርጌይ ኢዛ ኣሳቴ ጊልቂሳና፤ ሃይቆይካ ሙሌራ ኤኪ ባና።

14ሂርጋይ ባይንዳ ኣማኔቲ ዲዛ ኬፌ ኢዚ ጎዴታና፤ ኣስ ኡባ ሃሪዛ ሃይቆይ ኢዛ ኤካና።

15ኢዛ ኬን ኣይ ሚሺካ ኣቴና፤ ኢዚ ኣቂዛሶዛንካ ዲኔ ታማይ ላሌታና።

16ጻጶፔ ሜሊዛ ሚ ማላኔ ሃጋቲካ ሜቄሬቲዛ ሚ ማላ ጊዳና።

17ቢታ ቦላ ኢዛ ቆፒዛ ኣሲ ዴና፤ ኢዛ ጎባቴካ ቢታፌ ያና።

18ኢዚ ፖኦሶፔ ጌዴ ማን ጎዴታና፤ ቢታ ቦላፌ ኢዚ ኪቻና።

19ኢዛ ዳቦታ ጊዶፌ ኢዛ ላታና ዬሌታይ ቤቴና፤ ኢዛ ባቻንካ ዛሬይ ኢዛስ ኣቴና።

20ኡሻቻ ባጋራኔ ሃዲርሳ ባጋራ ዲዛ ኣሳይ፤ ኢዛ ቦላ ጋኪዳ ሜቶዛ ጊሻስ ኬሂ ባቢዲ ኮኮራና።

21ኣይ ዎዴካ ኢታ ኣሳታ ዉርሴይ ሄሳ ማላ፤ ጾሳስ ያዮንታ ኣሳ ቃዳይ ሃይሳ።»

← Chapter 17 Jump to: Chapter 19 →