Proverbs 1

Amharic Gamo (ጋሞ ማጻፋ)

Jump to: Chapter 2 →

1ሃይቲ ኢስራኤሌ ካዎ ዳዊቴ ና ሶሎሞኔ ሌሚሶታ።

2ሌሚሶቲ ኣሳይ ኣ ኤራቴ፥ ሴራኔ ኤራቴ ሃሳያ ኣኬካናስ ማዴቴስ።

3ኢስቲካ ዴኣና ዴኦን ኣ ኤራቴ፥ ጺሎቴ፥ ሱሬ ፒርዳኔ ሱሬ ሃኖ ታማርሲዛይታ።

4ኤራቴ ፓጪዳይታስ ኣኬካ፥ ናቴታስ ኤራቴኔ ዎዚናማቴ ኢሚዛይታ።

5ኣ ኤራንቻቲ ሃ ሌሚሶታ ሲዪዲ ኤራቴ ጉጄቴስ፤ ኣኬካንቻ ኣሳቲካ ሎኦ ዞሬታ ኤኬቴስ።

6ሄሳ ማላን ሌሚሶታኔ ኢስታ ቢርሼታ፥ ኣ ኤራንቻታ ሃሳያኔ ኢስታ ማሌ ኣኬካናስ ዳንዳዬቴስ።

7ኣ ኤራቴስ ኮይሮይ ጎዳስ ያሻቴ፤ ኤያቲ ጊዲኮ ኣ ኤራቴኔ ሴራ ካቴስ።

8ታ ናዞ! ኔ ኣዋ ዞሬ ኤዝጋ፤ ኔ ኣያ ታማርሲዛይሳካ ኣጎፋ።

9ሄሲ ኔ ሁኤስ ቦንቾ ካላቻ፤ ኔስ ቆን ኣዛ ኣሌቆ ማላ ጊዳና።

10ታ ናዞ! ኔና ናጋራንቻቲ ባሌኮ ኤኖ ጎፓ።

11ኢስቲ ኔና፥ «ኣኔ ሃያ፤ ኢሲፌ ቢዲ ሱ ጉሳናስ ዙጎስ፤ ጺሎታካ ዎናስ ቆቴቲ ኡቶስ።

12ዱፎይ ሚቲዛ ማላ ኑኒካ ኣኔ ኢስታ ፓጻ ዲሺን ሚቶስ፤ ኑኒ ኢስታ ጪማ ኦላን ኦሌቲዛ ኣሳ ማላ ኣኔ ኦስ።

13ኑኒ ኣልኦ ሚሽ ኡባ ዴማና፤ ሂስቲዲ ኑ ኬ ቦንቂ ኤኪዳ ሚሻን ኩንና።

14ኑናራ ዙፔታ፤ ዴሚዳዝ ኢሲፌ ጎኤታና» ጋና።

15ታ ናዞ! ኢስታራ ኢሲፌ ኦጌ ሄሜቶፋ፤ ኢስቲ ቢዛ ኦጌ ባና ጋዳ ኔ ቶሆ ዴንፋ።

16ጋሶይካ ኢስቲ ኢታ ሚሽ ኦናስ ዎጼቴስ፤ ኣሳ ሱ ጉሳናስካ ጃሜቴስ።

17ካፎይ ጼሊሺን ኢዛ ኦይካናስ ያርዴ ዎኮ ኣይኮካ ማዴና።

18ሃይቲ ሃ ኣሳቲ ባንታ ሱ ጉሳናስ ዙጌቴስ፤ ባንታ ሼምፖ ዎናስ ቆቴቲ ኡቴቴስ።

19ቤሶንታ ኦጌራ ጎኣ ዴማናስ ዎጺዛ ኡባታ ዉርሴይ ሃይሳ ማላ፤ ኢስቲ ሺሺዳ ኣቆታይ ኢስታ ሼምፖ ኤኪ ባና።

20ኣ ኤራቴያ ኦጌ ቦላ ዴኣሼ ጼይጋዉስ፤ ዱቡሻን ባ ቃላ ቁ ሂስታዳ ዋሳዉስ።

21ኣ ኤራቴያ ጮራ ኣሲ ሺቂዛሶን ዋሳዉስ፤ ካታማ ጌሊዛ ፔንጌን ኤቃዳ፥

22«ኢንቴኖ ዎዚና ፓጬቶ! ኢንቴ ኣዉዴ ጋካናስ ኤያቴ ኦጌ ካላኔ? ቂልጪዛይቶ! ኢንቴ ቂልጪዛይሳን ኣዉዴ ጋካናስ ኡፋዬቴቲ? ኤያቶ! ኤራቴ ኣዉዴ ጋካናስ ኢጻኔ?

23ታ ሴራን ኢንቴ ሲሚዳኮ፥ ታኒ ታ ቆፋ ኢንቴስ ቆንጪሳናኮሺን፤ ታ ቃላካ ኢንቴና ታማርሳናኮሺን።

24ታኒ ጼይጊዳ ዎዴ ኢንቴ ኮዮንታ ኢጺዴታ፤ ታኒ ታ ኩሼዛ ሚጪን ኦኒካ ዉዱ ጊቤና።

25ታ ዞሬ ኡባ ካዴታ፤ ታ ሴራካ ኤኪቤኬታ።

26ሄሳ ጊሻስ ኢንቴና ሜቶይ ጋኪዛ ዎዴ ታኒ ኢንቴ ቦላ ሚጫና፤ ባሺ ኢንቴ ቦላ ጋኪዛ ዎዴ ታኒ ኢንቴ ቦላ ቂልጫና።

27ባሺ ኣባ ዳምባላ ማላ ኢንቴና ቃዛ ዎዴ፥ ሜቶይ ጎቴ ጫርኮ ማላ ኢንቴና ዴንዛ ዎዴ፥ ቱጋይኔ ዋዬይ ኢንቴና ሚቲዛ ዎዴ ታኒ ኢንቴና ቂልጫና።

28«ሄ ዎዴ ኢስቲ ታና ጼይጋና፤ ታ ጊዲኮ ኢስታስ ኮይኬ፤ ኢስቲ ታና ሚን ኮያና፤ ጊዶ ኣቲን ታና ዴሜቴና።

29ኢስቲ ኤራቴ ኢጺዳ፤ ጎዳስ ያሻቴ ዶሪቤቴና።

30ታ ዞሬ ኤካናስ ኮዪቤቴና፤ ታ ሴራ ኡባ ካዳ።

31ሄሳ ጊሻስ ኢስቲ ባንቲ ኦዳ ኦሶ ኣይፌዛ ማና፤ ባንቲ ቆፒዳ ቆፋ ኣይፌካ ካላና።

32ዎዚናይ ፓጪዳይታ ኣ ኤራቴፌ ሃኮይ ኢስታ ዎና፤ ባላታ ዉዳ ዮይ ኢስታ ይሳና።

33ጊዶ ኣቲን ታና ሲዪዛይቲ ኡባይ ሳሮን ዳና፤ ኣይኮ ሂርጋይ ባይንዳ ዎፓን ዳና» ጋዉስ።

Jump to: Chapter 2 →