Proverbs 22

Amharic Gamo (ጋሞ ማጻፋ)

← Chapter 21 Jump to: Chapter 23 →

1ሎኦ ሱን ዳሮ ዱሬቴፌ ኣስ፤ ኣሳ ማታን ቦንቼቴካ ቢራፔኔ ዎርቃፌ ኣስ።

2ዱሬኔ ማንቆ ኡባ ጎዳይ ሜዴስ፤ ሄሳን ኢስታ ናይካ ኢሲ ጊና።

3ኣኬካንቻ ኣሲ ኢታ ቤኢዲ ኣታናስ ባቃቴስ፤ ጊዶ ኣቲን ኣኬካይ ፓጪዳ ኣሲ ሜቶን ጌሊዲ ቆሄቴስ።

4ኣሽኬቴኔ ጎዳስ ያሺ፥ ዱሬቴ፥ ቦንቾኔ ዴኦ ኢሜስ።

5ኢታ ኣሳ ኦጌን ኣጉንኔ ያርዴይ ዴስ፤ ጊዶ ኣቲን ባና ናጊዛ ኣሲ ሄሳፌ ሃኬስ።

6ናይ ዋኒዲ ዴኣና ቤሲዛኮ ታማርሳ፤ ሂስቲኮ ኢዚ ጪሚዲካ ሄሳፌ ሃኬና።

7ዱሬይ ማንቆ ሃሬስ፤ ታልኤ ኤኪዳዴይ ታልኤ ኢሚዳዴስ ኣይሌ ጊዴስ።

8ኢታቴ ዜሪዛ ኣሲ ዋዬ ጫኬስ፤ ኢዛ ሃንቆ ጉፌይ ያና።

9ኪያ ኣሲ ኣንጄቴስ፤ ባ ቁማፔካ ሂዬሳስ ኢሜስ።

10ቂልጪዛ ኣስ ዲጋ፤ ሂስቲኮ ፓላማይ ኣታና፤ ኦሺኔ ጫሺካ ያና።

11ዎዚና ጌሻቴ ዶሲዛ ኣሲኔ ዶናፔ ሎኦ ሃሳይዛ ኣሳራ ካዎይ ላጌቴስ።

12ጎዳ ኣይፌቲ ኤራቴ ናጌቴስ፤ ጊዶ ኣቲን ዎርዳንቻታ ቃላ ሃዳ ኬሴስ።

13ኣዛላ ኣሲ፥ «ጋሞይ ካሬን ዴስ፤ ታና ኦጌን ዎና» ጌስ።

14ላይማ ማጫሳ ዶናይ ጪማ ኦላ ማላ፤ ጎዳይ ሃንቄቲዳ ኣሲ ኢዚን ዉሌስ።

15ና ዎዚና ኤያቴ ባቂ ኦይኬስ፤ ጊዶ ኣቲን ሴራ ሾች ኢዛፔ ሃሴስ።

16ባስ ኣቆታ ጉጃና ጊዲ ሂዬሳ ናቂዛይኔ ዱሬሲ ኢሞታ ኢሚዛይ ናይካ ማንቃና።

17ኣ ኤራንቻ ዞሬ ዎዚናፔ ሲያ፤ ኔ ዎዚናይካ ታ ቲሚርቴኮ ሲሞ!

18ኣይስ ጊኮ ኢስታ ኔ ዎዚናን ዎኮ፥ ኔ ዶናንካ ኢስታ ኡባ ሃሳይኮ ኔ ኡፋዬታና።

19ኔ ኣማኖይ ጎዳን ጊዳና ማላ ታኒ ኔና ሃች ታማርሳይስ።

20ታኒ ኔሲ ዞሬኔ ኤራቴ ኢሚዛ ሎኦ ቲሚርቴታ ጻፋቤኪና?

21ኔና ኪቲዳይሳስ ቤሲዛ ዛሮ ዛራና ማላ፥ ታኒ ኔና ቱማኔ ኣማኔቲዳ ቃላታ ታማርሳና ማላ ጊዴኔ?

22ሂዬሳታሲ ኣይኮይካ ባይንዳ ጊሻስ ኢስታ ቦንቆፋ፤ ሺሎታንካ ሜቶታንቻታ ዋዪሶፓ።

23ኣይስ ጊኮ ጎዳይ ኢስታ ጊሻስ ሞቴታና፤ ኢስታ ቦንቂዳይታካ ኢዚ ቦንቃና።

24ሃንቄቲዛ ኣሳራ ላጌቶፓ፤ ሃንቄታናስ ኤሶቲዛ ኣሳራካ ዙፔቶፓ።

25ኔኒ ኢዛ ሃኖዛ ሜዜቲኮ፥ ጉዬፔ ኣጋናዉ ዳንዳያካ።

26ዋሴ ጌላናስ ጫቆፋ፤ ኣሳ ኣጮ ቃንጻናስ ዋሴ ጌሎፓ።

27ኔሲ ቃንጺዛዚ ይኮ፥ ኔ ኢቺዛ ኣልጋይካ ኣቶንታ ኤኬታና።

28ኔ ኣዋቲ ኤሲዳ ቤኒሶፌ ዲዛ ዛዋ ሾዶፋ።

29ባ ኦሶን ሎሂዳ ኣስ ቤያዲ? ኢዚ ካዎታስ ኦሲፔ ኣቲን ቤሶንታ ኣሳታስ ኦና።

← Chapter 21 Jump to: Chapter 23 →