Proverbs 24

Amharic Gamo (ጋሞ ማጻፋ)

← Chapter 23 Jump to: Chapter 25 →

1ታ ናዞ! ኢታ ኣሳታ ማላ ጊዳርኪና ጎፓ፤ ኢስታራ ላጌቴካ ኔና ሎኦፖ።

2ኢስቲ ኡባቶ ማካላ ሚሽ ማቄቴቴስ፤ ባንታ ኢንጻርሳንካ ጌኔ ሃሳዬቴስ።

3ኬ ኣ ኤራቴን ኬጼቴስ፤ ኣኬካንካ ሚኔስ።

4ኤራይ ዴኢኮ፥ ኬ ኣልኦኒኔ ሎኦ ሚሻን ኩሜስ።

5ዎዚናማ ኣሳስ ጊታ ዎልቃይ ዴስ፤ ኤራንቻ ኣሲካ ሚኖቴ ጉጄስ።

6ኦላ ኦሌታናስ ኔስ ሎኦ ዞሬ ጾኖ ዴማናስካ ዳሮ ዞራንቻታ ኮሼስ።

7ኤያ ኣሲ ኣ ኤራቴፌ ኬሂ ሃሆን ዴስ፤ ዱላታ ሲንን ኤቂዲ ሃሳያና ዳንዳዬና።

8ኢታ ኦናስ ሃልቺዛ ኣሲ «ጌናንቻ» ጌቴቴስ።

9ኤያቴ ቆፋይ ናጋራ፤ ቂልጪዛዴ ኣሲ ኢጼስ።

10ኔኒ ሜቶ ጋላስ ላፊኮ፥ ኔ ዎልቃይ ኣይ ማላ ጉ?

11ሃይቆስ ላጌቲ ቢዛይታ ኣሻ፤ ሹኬታናስ ጎሼቲ ቢዛይታ ኣሻ።

12ኔኒ፥ «ታ ሃይሳ ኤሪኬ» ጊኮ፥ ዎዚና ፒልጊ ኤሪዛይሲ ኢዚ ኣኬኬኔ? ኔ ሼምፖ ናጊዛይሲ ኤሬኔ? ኣስ ኡባስ ኢዛ ኦሶ ኦሶ ማላ ኢሜኔ?

13ታ ናዞ! ሎኦ ጊዲዳ ጊሻስ ኤሳ ማ፤ ኢሊሎ ኤሲ ዶናን ማልኤስ።

14ኣ ኤራቴካ ሄሳ ማላ፤ ኢዚ ኔ ሼምፖስ ማልኦ ጊዲዳይሳ ኤራ። ኔኒ ኢዞ ዴሚዛ ጊዲኮ ዎንቶ ኔስ ዜምፖ ጊዳና፤ ኔ ሂዶታይካ ሃዳ ጊዴና።

15ጺሎ ኣሳ ኬ ቦንቃናስ ፓንጋ ማላ ዛማዶፓ፤ ኢዛ ኬ ቦላ ሜቶ ጋፋ።

16ጺሎ ኣሲ ላፑንቶ ኩንዲኮካ ዴንዴስ፤ ጊዶ ኣቲን ኢታቲ ሜቶን ዬቴስ።

17ኔ ሞርኬይ ኩንዲዛ ዎዴ ኡፋዬቶፋ፤ ኢዚ ጴቲዛ ዎዴካ ኔ ዎዚናን፥ «ሃሹ!» ጎፓ።

18ኔ ሂስቶንታ ኣጊኮ ጎዳይ ሄሳ ቤኢዲ ኡፋዬቴና፤ ኢዚ ባ ሃንቆዛ ኔ ሞርኬዛ ቦላፌ ዛራና።

19ኢታ ኣሳታ ኦሶን ጬጮፓ፤ ኢስታ ማላ ጊዳርኪና ጎፓ።

20ኢታ ኣሳስ ሂዶታይ ባዋ፤ ኢታታ ጾምፔይ ቲፒ ጊዲ ቶኣና።

21ታ ናዞ! ጎዳሲኔ ካዋስ ያያ፤ ማካሊዛይታራካ ዙፔቶፓ።

22ኣይስ ጊኮ ሄሳ ማላ ኣሳታ ቆፖንታ ሜቶይ ጋኬስ፤ ካዎፔኔ ጎዳፔ ያና ሜቶ ኦኔ ኤሪዛይ?

23ኣ ኤራንቻቲ ጉጂዲካ ሃይሳ ጊዳ፤ ፒርዲሼ ማዶ ፒርዳይ ሎኦ ጊዴና።

24ሞራንቻ፥ «ኔኒ ጺሎ» ጊዛዴ ዴሬይ ቃንጌስ፤ ካዎቴቲካ ኢዛ ሂሌቴስ።

25ጊዶ ኣቲን ሞራንቻ፥ «ኔኒ ሞራዳሳ» ጊዛይታ ኢስታራ ሎኦ ሚሺ ጋይታና፤ ኢስታስ ኬሂ ዳሮ ኣንጆይ ያና።

26ሱሬ ዛሮ ኢሞይ ዶና ዬሬቴ ማላ።

27ካሴታዳ ኔ ካሬን ዲዛ ኦሶ ኦ፤ ኔ ጎሻ ጊጊሳ፤ ሄሳፌ ጉዬ ኔ ኬ ኬጻ።

28ኔ ሾሮዛ ቦላ ጋሶይ ባይንዳ ማርካቶፋ፤ ኔ ዶናንካ ጪሞፋ።

29ኢዚ ታስ ኦዳ ማላ ታኒ ኢዛስ ኦና፤ «ታኒ ኢዛስ ኢዛ ኦሶ ኩሼ ዛራና» ጎፓ።

30ታኒ ኣዛላ ኣሳ ጋዴራ ኣዲስ፤ ኣኬካይ ፓጪዳ ኣሳ ዎይኔ ቱራ ጊዶራ ካንዲስ።

31ኡባሶን ኣጉን ሞኪዴስ፤ ጋዳ ሻራፋይ ጎዚዴስ፤ ጊምቤይካ ላሌቲዴስ።

32ታኒ ቤኢዳይሳ ዩሻ ቆፓዲስ፤ ታኒ ቤዮይሳፌ ቲሚርቴ ዴማዲስ።

33ኔኒ፥ «ጉራ ሊጲጲ ጋይስ፤ ጉራ ስካ ኤካይስ፤ ኔ ኩሼዛካ ሺሻዳ ጉራ ሼምፓ ኤካይስ» ጊኮ፥

34ማንቆቴ ኔ ቦላ ፓንጋ ማላ ያና፤ ፓጬይካ ኦላ ሚሻ ኦይኪዳ ኣሳ ማላ ፑቱ ጋና።

← Chapter 23 Jump to: Chapter 25 →