Luke 16

Arabic Bible Morocco Version - 2012 (الترجمة المغربية القياسية)

← Chapter 15 Jump to: Chapter 17 →

1الْفَصْلْ سْطَّاشْ وْݣَالْ يَسُوعْ عَاوْتَانِي لْلتّْلَامْدْ دْيَالُه: «هَادَا وَاحْدْ الرَّاجْلْ لَبَاسْ عْلِيهْ كَانْ عَنْدُه وَاحْدْ الْوْكِيلْ، وْجَاوْ شِي نَاسْ لْعَنْدْ هَادْ الرَّاجْلْ وْݣَالُو لِيهْ بْلِّي وْكِيلُه كَيْضَيّْعْ لِيهْ رْزْقُه،

2وْهُوَ يْعَيّْطْ عْلِيهْ وْݣَالْ لِيهْ: آشْ هَادْشِّي كَنْسْمَعْ عْلِيكْ؟ أَجِي نْتّْحَاسْبُو عْلَى الْوْكَالَة اللِّي عْطِيتْكْ، حِيتْ رَاكْ مَا بْقِيتِيشْ غَتْكُونْ الْوْكِيلْ دْيَالِي.

3وْݣَالْ الْوْكِيلْ مْعَ رَاسُه: أَشْنُو غَنْدِيرْ؟ عْلَاحْقَّاشْ سِيدِي غَادِي يْحَيّْدْ لِيَّ الْوْكَالَة، وْأَنَا مَا نْقْدَرْشْ عْلَى الْفْلَاحَة، وْحْشْمَانْ نْسْعَى.

4صَافِي، عْرَفْتْ آشْ غَنْدِيرْ بَاشْ إِلَا حَيّْدْ لِيَّ سِيدِي الْوْكَالَة يْقْبْلُونِي النَّاسْ فْدْيُورْهُمْ.

5وْعَيّْطْ عْلَى ݣَاعْ هَادُوكْ اللِّي كَيْتّْسَالْهُمْ سِيدُه شِي دِينْ، وَاحْدْ بْوَاحْدْ، وْݣَالْ لَلّْوّْلْ: شْحَالْ كَيْتّْسَالْكْ سِيدِي؟

6وْجَاوْبُه: مْيَةْ بْرْمِيلْ دْ الزِّيتْ. وْݣَالْ لِيهْ الْوْكِيلْ: خُدْ الْبُونَاتْ دْيَالْكْ، وْݣْلَسْ دْغْيَا وْكْتَبْ خَمْسِينْ فْبْلَاصْةْ مْيَة!

7وْݣَالْ لْوَاحْدْ آخُرْ: شْحَالْ كَيْتّْسَالْكْ سِيدِي؟ جَاوْبُه: مْيَةْ عَبْرَة دْ الْݣْمْحْ. وْݣَالْ لِيهْ الْوْكِيلْ: خُدْ الْبُونَاتْ دْيَالْكْ وْكْتَبْ تْمَانِينْ.

8وْشْكَرْ السِّيّْدْ وْكِيلُه الْخَايْنْ حِيتْ تْصَرّْفْ بْالْحْكْمَة، عْلَاحْقَّاشْ وْلَادْ هَادْ الزّْمَانْ كيْتّْعَامْلُو مْعَ بْعْضِيَّاتْهُمْ بْالْحْكْمَة، كْتَرْ مْنْ وْلَادْ النُّورْ.

9وْأَنَا كَنْݣُولْ لِيكُمْ: دِيرُو لِيكُمْ صْحَابْ بْفْلُوسْ الْحْرَامْ، بَاشْ إِلَا تْقَادَاوْ لِيكُمْ الْفْلُوسْ يْقْبْلُوكُمْ فْالدَّارْ الدَّايْمَة.

10الْأَمِينْ فْالْقْلِيلْ رَاهْ أَمِينْ فْالْكْتِيرْ، وْالْخَايْنْ فْالْقْلِيلْ رَاهْ خَايْنْ فْالْكْتِيرْ.

11وْإِلَا مَا كْنْتُوشْ أُمَنَا عْلَى فْلُوسْ الْحْرَامْ، شْكُونْ هَادَا اللِّي غَيْأَمّْنْكُمْ عْلَى فْلُوسْ الْحْلَالْ؟

12وْإِلَا مَا كْنْتُوشْ أُمَنَا عْلَى حَاجْةْ غِيرْكُمْ، شْكُونْ هَادَا اللِّي غَيْعْطِيكُمْ حَاجْتْكُمْ؟

13حْتَّى عَبْدْ مَا يْقْدَرْ يْكُونْ عَبْدْ لْجُوجْ سْيَادْ، عْلَاحْقَّاشْ إِمَّا غَيْكْرَهْ وَاحْدْ فِيهُمْ وْغَيْبْغِي لَاخُرْ، وْلَا غَيْكُونْ مُخْلِصْ لْوَاحْدْ فِيهُمْ وْغَيْطَيّْحْ مْنْ شَانْ لَاخُرْ. وْهَكَّا حْتَّى نْتُمَ مَا تْقَدْرُوشْ تْكُونُو عْبِيدْ دْيَالْ اللَّهْ وْالْفْلُوسْ».

14وْكَانُو الْفْرِّيسِيِّينْ كَيْسَمْعُو هَادْ الْكْلَامْ كُلُّه وْكَيْضَحْكُو عْلَى يَسُوعْ، حِيتْ كَانُو كَيْبْغِيوْ الْفْلُوسْ.

15وْهُوَ يْݣُولْ لِيهُمْ: «نْتُمَ كَتْبَيّْنُو رَاسْكُمْ تَابْعِينْ طْرِيقْ اللَّهْ قُدَّامْ النَّاسْ، وَلَكِنْ اللَّهْ كَيْعْرَفْ آشْ فْقْلُوبْكُمْ. وْالْحَاجَة اللِّي عَنْدْهَا قِيمَة عَنْدْ النَّاسْ، مَا عَنْدْهَا قِيمَة عَنْدْ اللَّهْ.

16بْقَى شْرَعْ اللَّهْ وْكْلَامْ الْأَنْبِيَا حْتَّى جَا يُوحَنَّا، وْمْنْ هَادَاكْ الْوَقْتْ بْدَاوْ النَّاسْ كَيْخَبّْرُو بْالْبْشَارَة عْلَى مَمْلَكَةْ اللَّهْ، وْبْدَا كُلّْ وَاحْدْ كَيْدِيرْ جْهْدُه بَاشْ يْدْخُلْ لِيهَا.

17رَاهْ تّْحَيّْدْ السّْمَا وْالْأَرْضْ، وْحَرْفْ وَاحْدْ مْنْ الشّْرَعْ دْ اللَّهْ مَا غَيْتّْحَيّْدْشْ.

18اللِّي طَلّْقْ مْرَاتُه وْتّْزَوّْجْ وَحْدَة خْرَى مْنْ غِيرْهَا، رَاهْ كَيْفْسَدْ. وْاللِّي تّْزَوّْجْ مْرَاة طَلّْقْهَا رَاجْلْهَا، رَاهْ كَيْفْسَدْ».

19«كَانْ وَاحْدْ الرَّاجْلْ لَبَاسْ عْلِيهْ، كَيْلْبَسْ لْبَاسْ غَالِي بْزَّافْ وْكَيْبَرّْعْ رَاسُه بْالْمَاكْلَة الْمْخَيّْرَة كُلَّ نْهَارْ.

20وْكَانْ وَاحْدْ الرَّاجْلْ آخُرْ فَقِيرْ سْمِيتُه لِعَازَرْ، وْدَاتُه مْجْرُوحَة وْكَتْسِيلْ بْالْݣِيحْ، مْرْمِي حْدَا الْبَابْ دْ الرَّاجْلْ اللِّي لَبَاسْ عْلِيهْ.

21وْكَانْ كَيْتّْشْهَّى يْشْبَعْ وَاخَّا غِيرْ مْنْ الشّْيَاطَة اللِّي كَتْطِيحْ مْنْ الْمِيدَة دْيَالْ الرَّاجْلْ اللِّي لَبَاسْ عْلِيهْ، وْكَانُو الْكْلَابْ كَيْجِيوْ يْلَحْسُو جْرَاحُه.

22وْمَاتْ الرَّاجْلْ الْفَقِيرْ، وْهْزُّوهْ الْمَلَايْكَة وْحَطُّوهْ حْدَا إِبْرَاهِيمْ. وْمَاتْ الرَّاجْلْ اللِّي لَبَاسْ عْلِيهْ حْتَّى هُوَ وْتّْدْفَنْ.

23وْمْلِّي كَانْ الرَّاجْلْ اللِّي لَبَاسْ عْلِيهْ فْجَهْنَّمْ كَيْتّْعَدّْبْ، هْزّْ عِينِيهْ وْشَافْ إِبْرَاهِيمْ مْنْ بْعِيدْ وْلِعَازَرْ ݣَالْسْ حْدَاهْ.

24وْعَيّْطْ وْݣَالْ: آ بَّا إِبْرَاهِيمْ رْحَمْنِي، وْصِيفْطْ لِعَازَرْ يْفَزّْݣْ صْبْعُه بْالْمَا وْيْجِي يْبَرّْدْ لْسَانِي، عْلَاحْقَّاشْ رَانِي كَنْتْعَدّْبْ بْزَّافْ فْهَادْ الْعَافْيَة.

25وْجَاوْبُه إِبْرَاهِيمْ: تْفَكّْرْ آ وْلْدِي، بْلِّي خْدِيتِي حَقّْكْ مْنْ الْخِيرْ فْحْيَاتْكْ، وْخْدَا لِعَازَرْ حَقُّه مْنْ الْعْدَابْ. وْهَا هُوَ دَابَا كَيْتّْوَاسَى هْنَا، وْنْتَ كَتْتْعَدّْبْ تْمَّ.

26وْفُوقْ هَادْشِّي، رَاهْ بِينَّا وْبِينْكُمْ وَاحْدْ الْحَفْرَة كْبِيرَة وْغَارْقَة، مَا يْقْدَرْ حْتَّى حَدّْ يْقْطَعْهَا، لَا مْنْ هْنَا لْعَنْدْكُمْ وَلَا مْنْ عَنْدْكُمْ لّْهْنَا.

27وْݣَالْ الرَّاجْلْ اللِّي لَبَاسْ عْلِيهْ: كَنْتّْرَجَّاكْ آ بَّا إِبْرَاهِيمْ تْصِيفْطْ لِيعَازَرْ لْدَارْ بَّا،

28حِيتْ عَنْدِي خَمْسَة دْ الْخُوتْ، بَاشْ يْنَبّْهْهُمْ مَا يْجِيوْشْ حْتَّى هُمَ لْهَادْ الْبْلَاصَة دْ الْعْدَابْ.

29وْجَاوْبُه إِبْرَاهِيمْ: يَاكْ عَنْدْهُمْ كْتُبْ مُوسَى وْالْأَنْبِيَا، إِيوَا يْدِيرُو بْدَاكْشِّي اللِّي فِيهُمْ.

30وَلَكِنْ ݣَالْ لِيهْ الرَّاجْلْ اللِّي لَبَاسْ عْلِيهْ: لَّا آ بَّا إِبْرَاهِيمْ! رَاهْ مَا غَادِيشْ يْدِيرُو بْدَاكْشِّي اللِّي فِيهُمْ، وَلَكِنْ إِلَا تّْبْعَتْ شِي حَدّْ مْنْ الْمُوتْ وْمْشَى لْعَنْدْهُمْ، رَاهْ غَادِي يْتُوبُو.

31وْهُوَ يْرَدّْ عْلِيهْ إِبْرَاهِيمْ: إِلَا مَا كَانُوشْ كَيْسَمْعُو لْمُوسَى وْالْأَنْبِيَا، رَاهْ وَاخَّا يْتّْبْعَتْ شِي حَدّْ مْنْ الْمُوتْ مَا غَادِيشْ يْقْتَنْعُو».

← Chapter 15 Jump to: Chapter 17 →