Jeremiah 40

Awadhi

← Chapter 39 Jump to: Chapter 41 →

1रामा सहर मँ अजाद कीन्ह जाइ क पाछे यिर्मयाह क यहोवा क सँदेसा मिला। बाबुल क राजा क बिसेस रच्छकन क अधिनायक नबुनरदान क यिर्मयाह रामा मँ मिला। यिर्मयाह जंजीरन मँ बँधा रहा। उ यरूसलेम अउर यहूदा क सबहिं कैदियन क संग रहा। उ पचे कैदी बाबुल क बन्धुआइ मँ लइ जात रहेन।

2जब अधिनायक नबूजरदान क यिर्मयाह मिला तउ उ ओहसे बातन किहस। उ कहेस, “यिर्मयाह तोहार परमेस्सर यहोवा इ घोसित किहे रहा कि इ बिपत्ति इ जगहिया पइ आइ उ

3अउर अब यहोवा सब कछू उ कइ दिहेस ह जेका उ करइ क कहे रहा। इ बिपत्ति एह बरे आइ कि यहूदा क तू सब लोगन यहोवा क खिलाफ पाप किहा। तू लोग यहोवा क आग्या नाहीं मान्या।

4किन्तु यिर्मयाह, अब मइँ तोहका अजाद करत हउँ। मइँ तोहरी कलाइयन स जंजीर उतारत हउँ। जदि तू चाहा तउ मोरे संग बाबुल चला अउर मइँ तोहार अच्छी देख-रेख करब। किन्तु जदि तू मोरे संग चलब नाहीं चहत्या तउ न चला। लखा पूरा देस तोहरे बरे खुला अहइ। तू जहाँ चाहा चला जा।

5या सापान क पूत अहीकाम क पूत गदल्याह क लगे लउटि जा। बाबुल क राजा यहूदा क नगरन क प्रसासक गदल्याह क चुनेस ह। जा अउर गदल्याह क संग लोगन क बीच रहा या तू जहाँ चाहा जाइ सकत ह।” तब नबूजरदान यिर्मयाह क कछू भोजन अउर भेंट दिहस तथा ओका बिदा किहस।

6इ तरह यिर्मयाह अहीकाम क पूत गदल्याह क लगे मिस्पा गवा। यिर्मयाह गदल्याह क संग ओन लोगन क बीच रहा जउन यहूदा देस मँ छोड़ दीन्ह ग रहेन।

7यहूदा क फउज क कछू फउजी, अधिकारी अउर ओनकर लोग, जब यरूसलेम नस्ट होत रहा, खुला मैदान मँ रहेन। ओन फउजियन सुनेन कि अहीकाम क पूत गदल्याह क बाबुल क राजा प्रदेस मँ बचे लोगन क प्रसासक तैनात किहस ह। बचे भए लोगन मँ उ पचे सबहिं मेहररूअन, मनसेधुअन अउर बच्चन रहेन जउन बहोत जियादा गरीब रहेन अउर कैदी बनाइके बाबुल नाहीं पहोंचावा गए रहेन।

8एह बरे उ सबइ फउजी गदल्याह क लगे मिस्पा मँ आएन। उ सबइ फउजी नतन्याह क पूत इस्माएल, योहानन अउ ओकर भाई योनातान, कारेह क पूत तन्हूसेत क पूत सरायाह, नतोयवासी एथै क पूत माकावासी क पूत याजन्याह अउर ओकरे साथ स मनसेधुअन रहेन।

9सापान क पूत अहीकाम क पूत गदल्याह ओन फउजियन अउर ओनके लोगन क जियादा सुरच्छित अनुभव करावइ क किरिया खाएस। गदल्याह जउन कहेस, उ इ अहइ: “फउजियो तू लोग कसदी लोगन क सेवा करइ स भयभीत जिन ह्वा। इ प्रदेस मँ बस जा अउर बाबुल क राजा क सेवा करा। जदि तू पचे अइसा करब्या तउ तोहार पचन्क सब कछू भला होइ।

10मइँ खुद मिस्पा मँ रहब। मइँ ओन कसदी लोगन स तोहरे पचन्क बरे मँ बातन करब जउन हिआँ अइहीं। तू लोग इ काम मोह पइ छोड़ा। तू पचन्क दाखरस गर्मी क फल अउर तेल पइदा करइ चाही। जउन तू पचे पइदा करा ओका आपन बटोरइ बरे घड़न मँ भरा। ओन नगरन मँ रहा जेह पइ तू पचे अधिकार किहे अहा।”

11यहूदा क सबहिं लोग, जउन मोआब, अम्मोन, एदोम अउर दूसर सबहिं प्रदेसन मँ रहेन, सुनेन कि बाबुल क राजा यहूदा क कछू लोगन क उ देस मँ छोड़ दिहेस ह अउर उ पचे इ सुनेन कि बाबुल क राजा सापान क पोता अउ अहीकाम क पूत गदल्याह क ओनकर प्रसासक तइनात किहेस ह।

12जब यहूदा क लोग इ खबर पाएन, तउ उ पचे यहूदा प्रदेस मँ लउटि आएन। उ पचे गदल्याह क लगे ओन सबहिं देसन स मिस्पा लउटेन, जेनमाँ उ पचे बिखेर ग रहेन। एह बरे उ पचे लउटेन अउर उ पचे दाखरस अउर गर्मी क बड़ी फसल काटेन।

13कारेह क पूत योहानन अउ यहूदा क फउज क सबहिं अधिकारी, जउन अबहिं तलक खुले प्रदेसन मँ रहेन, गदल्याह क लगे आएन। गदल्याह मिस्पा नगर मँ रहा।

14योहानन अउर ओकरे साथ क अधिकारियन गदल्याह स कहेन, “का तोहका मालूम अहइ कि अम्मोनी लोगन क राजा बालीस तोहका मार डावइ चाहत ह उ नतन्याह क पूत इस्माएल क तोहका मार डावइ पठएस ह।” मुला अहीकाम क पूत गदल्याह ओन पइ बिस्सास नाहीं किहस।

15तब कारेह क पूत योहानन मिस्पा मँ गदल्यह स गुप्त बाचचीत किहस। योहानन गदल्याह स कहेस, “मोका जाइ द्या अउर नतन्याह क पूत इस्माएल क मार डावइ द्या। कउनो भी मनई इ बारे मँ नाहीं जानी। हम लोग इस्माएल क तोहका मारइ नाहीं देब। उ यहूदा क ओन सबहिं लोगन क जउन तोहरे लगे बटुरा भए अहइँ, विभिन्न देसन मँ फुन स बिखेर देइ अउर एकर इ अरथ होइ कि यहूदा क थोड़ा स बचे-खुचे लोग भी नस्ट होइ जइँहीं।”

16किन्तु अहीकाम क पूत गदल्याह कारेह क पूत योहानान स कहेस, “इस्माएल क न मारा। इस्माएल क बारे मँ जउन तू कहत अहा, उ फुरइ नाहीं अहइ।”

← Chapter 39 Jump to: Chapter 41 →