Jeremiah 43

Awadhi

← Chapter 42 Jump to: Chapter 44 →

1इ तरह यिर्मयाह लोगन क यहोवा ओकरे परमेस्सर क सँदेसा देब पूरा किहस। यिर्मयाह लोगन क उ सब कछू बताइ दिहस जेका लोगन स कहइ बरे यहोवा ओका पठए रहा।

2होसाया क पूत अजर्याह, कारेह क पूत योहानन अउर कछू दूसर लोग घमण्डी अउर हठी रहेन। उ सबइ लोग यिर्मयाह पइ किरोधित होइ गएन। ओन लोगन यिर्मयाह स कहेन, “यिर्मयाह, तू झूठ बोलत अहा। हमार परमेस्सर यहोवा तोहसे हमका इ कहइ क नाहीं पठएस, ‘तू लोगन क मिस्र मँ रहइ बरे नाहीं जाइ चाही।’

3यिर्मयाह, हम समझित अही कि नेरिय्याह क पूत बारूक तोहका हम लोगन क बिरुद्ध होइ बरे हुस्कावत अहइ। उ चाहत ह कि तू हमका कसदी लोगन क हाथ मँ दइ द्या। उ इ एह बरे चाहत ह जेहसे उ पचे हमका मारि डावइँ या उ तोहसे इ एह बरे चाहत ह कि उ पचे हमका कैदी बनाइ लेइँ अउर बाबुल लइ जाइ।”

4एह बरे योहानन फउजी अधिकारी अउर सबहिं लोग यहोवा क आग्या क उल्लंघन किहन। यहोवा ओनका यहूदा मँ रहइ क आदेस दिहे रहा।

5किन्तु यहोवा क आग्या मानइ क जगह पइ योहानन अउर फउजी अधिकारी ओन लोगन क भी आपन संग लइ गएन जउन यहूदा मँ रहइ बरे आए रहेन। पहिले उ पचे सत्रुअन दुआरा दूसर रास्ट्रन मँ लेइ जवा गएन रहेन, किन्तु अब उ पचे वापिस यहूदा आइ गए रहेन।

6अब योहानन अउ सबहिं फउजी अधिकारी, सबहिं मनसेधू, मेहररूअन अउर बच्चन क मिस्र लइ गएन। ओन लोगन मँ राजा क बिटियन रहिन। (नबूजरदान गदल्याह क ओन लोगन क प्रसासक तैनात किहे रहा नबूजरदान बाबुल क राजा क खास रच्छकन क अधिनायक रहा।) योहानन यिर्मयाह नबी अउर नेरिय्याह क पूत बारूक क भी साथ लइ गवा।

7ओन लोग यहोवा क एक न सुनेन। एह बरे उ पचे सबहिं लोग मिस्र गएन। उ पचे तहपन्हेस नगर क गएन।

8तहपन्हेस नगर मँ यिर्मयाह यहोवा स इ सँदेसा पावा,

9“यिर्मयाह, कछू बड़के पाथर ल्या। ओनका ल्या अउर ओनका तहपन्हेस मँ फिरौन क राजमहल क प्रवेस दुआर क ईटंन क चबूतरन क लगे माटी मँ गाड़ा।

10इ तब करा जब यहूदा क लोग तोहका अइसा करत लखत रहा अहा, ‘इस्राएल क परमेस्सर सर्वसक्तीमान यहोवा जउन कहत ह, उ इ अहइ: मइँ बाबुल क राजा नबूकदनेस्सर क हिआँ आवइ बरे बोलावा पठउब। उ मोर सेवक अहइ अउर मइँ ओकर राज सिंहासन क एन पाथरन पइ रखब जेनका मइँ हिआँ गाड़ा ह। नबूकदनेस्सर आपन चँदोवा एन पाथरन क ऊपर फैलाई।

11नबूकदनेस्सर हिआँ आइ अउर मिस्र पाइ हमला करी। उ कछू लोगन मारिहीं अउर कछू क लोगन क कैदी बनावइ जाइ अउर उ कछू लोगन क तरवारे क घाट उतारी।

12नबूकदनेस्सर मिस्र क लबार देवतन क मन्दिरन मँ ओन देवतन क संग आगी लगाइ देइ। उ ओनका बार देइहीं अउ ओनका बन्दी बनाइ लेइहीं। नबूकदनेस्सर मिस्र क भुइँया क सबहिं चिजियन क वइसेन ही लइ लेत ह जइसे गड़ेरिया आपन ओढ़ना स चिल्लर क चुन-चुन कइ बाहेर फेंकत ह। अउर तउ उ सुरच्छा स मिस्र क तजि देइहीं।

13नबूकदनेस्सर ओन सुमिरन-पाथरन क नस्ट करी जउन मिस्र मँ सूर्य देवता क मन्दिर मँ अहइ उ मिस्र क लबार देवन क मन्दिरन क जराइ देइ।’”

← Chapter 42 Jump to: Chapter 44 →