Jeremiah 52

Awadhi

← Chapter 51 Jump to:

1सिदकिय्याह जब यहूदा क राजा भवा, उ इक्कीस बरिस क रहा। सिदकिय्याह यरूसलेम मँ गियारह बरिस तलक राज्ज किहस। ओकर महतारी क नाउँ हमूतल रहा जउन यिर्मयाह क बिटिया रही। हमूतल क परिवार लिब्ना नगर क रहा।

2सिदकिय्याह बुरे करम किहस, ठीक वइसने ही जइसे यहोयाकीम किहे रहा। यहोवा सिदकिय्याह क जरिये ओन बुरे करमन क करब पसन्द नाहीं करत रहा।

3यरूसलेम अउ यहूदा क संग भयंकर घटनन घटिन, काहेकि यहोवा ओन पइ कोहान रहा। आखीर मँ यहोवा आपन समन्वा स यहूदा अउ यरूसलेम क लोगन क दूर लोकाइ दिहस। सिदकिय्याह बाबुल क राजा क खिलाफ होइ गवा।

4एह बरे सिदकिय्याह क हुकूमत क समइ मँ नवें बरिस क दसएँ महीने क दसएँ दिन बाबुल क राजा नबूकदनेस्सर फउज क संग यरूसलेम क कूच किहस। नबूकदनेस्सर आपन संग आपन पूरी फउज लिहे रहा। बाबुल क फउज यरूसलेम क बाहेर डेरा डाएस। एकरे पाछे उ पचे नगर-प्रार्चार क चारिहुँ ओर माटी क टीला बनाएस जेहसे उ पचे ओन देवारन पइ चढ़ि सकइँ।

5सिदकिय्याह क राज्जकाल क गियारहवे बरिस तलक यरूसलेम नगर पइ घेरा पड़ा रहा।

6उ बरिस क चउथे महीने क नौंवें दिन तलक भुखमरी क हालत बहोत खराब रही। नगर मँ खाइ बरे कछू भी खइया क नाहीं रहि गवा रहा।

7उ दिन बाबुल क फउज यरूसलेम मँ प्रवेस कइ गइ। यरूसलेम क फउजी पराइ गएन। उ पचे राति क नगर तजिके परानेन। उ पचे दुइ देवारन क बीच क दुआरे स गएन। दुआर राजा क बगीचा क निचके रहा। जद्यपि बाबुल क फउज यरूसलेम नगर क घेर रखे रही तउ भी यरूसलेम क फउजी पराइ निकरेन। उ पचे रेगिस्तान कइँती परानेन।

8किन्तु बाबुल क फउज सिदकिय्याह क पाछा किहस। उ पचे ओका यरीहो क मइदान मँ धरेन। सिदकिय्याह क सबहिं फउजी पराइ गएन।

9बाबुल क फउज राजा सिदकिय्याह क धइ लिहस। उ पचे रिबला नगर मँ ओका बाबुल क राजा लगे लइ गएन। रिबला हमात देस मँ अहइ। रिबला मँ बाबुल क राजा सिदकिय्याह क बारे मँ आपन निर्णय सुनाएस।

10हुआँ रिबला नगर मँ बाबुल क राजा सिदकिय्याह क पूतन क मारि डाएस। सिदकिय्याह क आपन पूतन क मारा जाब लखइ क मजबूर कीन्ह गवा। बाबुल क राजा यहूदा क राजकीय पदाधिकारियन क भी मार डाएस।

11तब बाबुल क राजा सिदकिय्याह क आँखिन निकारि लिहस। उ ओका काँसा क जंजीर पहिराएस। तब उ सिदकिय्याह क बाबुल लइ गवा। बाबुल मँ उ सिदकिय्याह क जेलि मँ डाइ दिहस। सिदकिय्याह आपन मरइ क दिन तलक बन्दी घर मँ रहा।

12बाबुल क राजा क खास रच्छकन क अधिनायक नबूजरदान यरूसलेम आवा। नबूकदनेस्सर क राज्जकाल क उन्नीसवें बरिस क पाँचए महीने क दसएँ दिन इ भवा। नबूजरदान बाबुल क महत्वपूर्ण अधिनायक रहा।

13नबूजरदान यहोवा क मन्दिर क जराइ डाएस। उ राजमहल तथा यरूसलेम क दूसर घरन क भी बारि दिहस। उ यरूसलेम क हर एक महत्वपूर्ण इमारत क बारि दिहस।

14पूरी कसदी फउज यरूसलेम क चहारदीवारी क तोड़ गिराएस। इ फउज उ समइ राजा क बिसेस रच्छकन क अधिनायक क अधीन रही।

15अधिनायक नबूजरदान अब तलक यरूसलेम मँ बचे लोगन क भी कैदी बनाइ लिहस। उ ओनका भी लइ गवा जउन पहिले ही बाबुल क राजा क आत्मसमर्पण कइ दिहे रहा। उ ओन कुसल कारिगरन क भी लइ गवा जउन यरूसलेम मँ बचा रहि गए रहेन।

16मुला नबूजरदान कछू बहोत गरीब लोगन क देस मँ पाछे छोड़ दिहे रहा। उ ओन लोगन क अंगूर क बागन अउर खेतन मँ काम करइ बरे छोड़े रहा।

17कसदी फउज मन्दिर क काँसा क खम्भन क तोड़ दिहस। उ पचे यहोवा क मन्दिर क काँसा क तालाब अउर ओकरे आधार क भी तोड़ेस। उ पचे उ सारे काँसे क बाबुल लइ गएन।

18बाबुल क फउज एन चिजियन क भी मन्दिर स लइ गइ: बर्तन, बेलचन, दिया बारइ क जन्त्र, बड़के खोरन, कड़ाहियन अउर काँसा क उ सबइ चिजियन जेनकर उपयोग मन्दिर क सेवा मँ होत रहा।

19राजा क खास रच्छकन क अधिनायक एन चिजियन क लइ गवा: चिलमची, अँगीठियन, बड़कन खोरन, बर्तन, डीबट, कड़ाहियन अउर दाखरस क बरे काम मँ आवइवाले बड़के पियालन। उ ओन सबहिं चिजियन क जउन सोने अउर चाँदी क बनी रहिन, लइ गवा।

20दुइ स्तम्भ सागर अउ ओकर खाले क बारह काँसा क बैल अउ सरकइवाले आधार बहोत भारी रहेन। राजा सुलैमान यहोवा क मन्दिर बरे इ सबइ चिजियन बनाए रहा। उ काँसा जेहसे उ सबइ चिजियन बनी रहिन, एतना भारी रहा कि तौला नाहीं जाइ सकत रहा।

21काँसा क हर एक खम्भा अट्ठारह हाथ क ऊँचा रहा। हर एक खम्भा बारह हाथ परिधि वाला रहा। हर एक खम्भा खोखला रहा। हर एक खम्भा क देवार चार ईंच मोटी रही।

22पहिले खम्भा साढ़े सात हाथ ऊँच रहा। इ चारिहुँ कइँती जाल क सजावट अउर काँसे क अनार स सजा रहा। दूसर खम्भन पइ भी अनार रहेन। इ पहिले खम्भा क तरह रहा।

23खम्भन क बगल मँ छियान्नवे अनार रहेन। खम्भन क चारिहुँ कइँती बने जाल क सजावट पइ सब मिलाइके सौ अनार रहेन।

24राजा क खास रच्छकन क अधिनायक सरायाह अउर सपन्याह क कैदी क रूप मँ लइ गवा। सरायाह महायाजक रहा अउर सपन्याह ओहसे दूसर। तीन चौकीदार भी कैदी बनाए गएन।

25राजा क खास रचच्छन क अधिनायक लड़इवाले मनइयन क अधीच्छक क भी लइ गवा। उ राजा क सात सलाहकारन क भी कैदी बनाएस। उ सबइ लोग उ समइ तलक यरूसलेम मँ रहेन। उ सास्त्री क भी लिहस जउन मनइयन क फउज मँ रखइ क अधिकारी रहा अउर उ साठ साधारण मनइयन क भी लिहस जउन तब तलक नगर मँ रहेन।

26अधिनायक नबूजरदान ओन सबहिं अधिकारियन क लिहस। उ ओनका बाबुल क राजा क समन्वा लिआएस। बाबुल क राजा रिबला नगर मँ रहा। रिबला हमात देस मँ अहइ। हुआँ उ रिबला नगर मँ राजा ओन अधिकारियन क मारि डावइ क आदेस दिहस। इ तरह यहूदा क लोग आपन देस स लइ जावा गएन।

28इ तरह नबूकदनेस्सर बहोत स लोगन क कैदी बनाइके लइ गवा। राजा नबूकदनेस्सर क सासन क सतएँ बरिस मँ: यहूदा क तीन हजार तेइस पुरूस।

29नबूकदनेस्सर क सासन क अट्ठारहवे बरिस मँ: यरूसलेम क आठ सौ बत्तीस लोग।

30नबूकदनेस्सर क सासन क तेईसवे बरिस मँ नबूजरदान यहूदा क सात सौ पैंतालीस मनई कैदी बनाएस। नबूजरदान राजा क खास रच्छकन क अधिनायक रहा। सब मिलाइके चार हजार छ: सौ लोग कैदी बनावा ग रहेन।

31यहूदा क राजा यहोयाकीम सैंतीस बरिस तलक बाबुल क जेलि मँ रहा। ओकर कैदी रहइ क सैंतीसवे बरिस बाबुल क राजा एबीलमरोद क यहोयाकीम पइ बहोत दयालु रहा। उ यहोयाकीम क उ बरिस जेलि स बाहेर निकारेस। इ उहइ बरिस रहा जब एबीलमरोदक बाबुल क राजा भवा। एबीलमरोदक यहोयाकीम क बारहवे महीने क पन्तीसवे दिन जेलि स छोड़ दिहस।

32एबीलमरोदक यहोयाकीम स रहम स बातन किहस। उ यहोयाकीम क ओन दूसर राजा लोगन क ऊँच सम्मान क ओहदा दिहस जउन बाबुल मँ ओकरे संग रहेन।

33एह बरे यहोयाकीम आपन कैदी क ओढ़ना उतारेस। बाकी जिन्नगी मँ उ नेम स राजा क मेज पइ भोजन करत रहा।

34बाबुल क राजा प्रतिदिन ओका स्वीकृत धन देत रहा। इ तब तलक चला जब तलक यहोयाकीम मरा नाहीं।

← Chapter 51 Jump to: