Ezra 1

Aymara 1997

Jump to: Chapter 2 →

1Ciro reyin Persia marka nayrïr mara apnaqäwipana, ukhamarak Jeremías profeta tuqi Tatitun arupa yatiyatäkäna ukan phuqhasiñapatakisti, Tatitux Ciro reyiruw ch'amañchäna, taqpach markachirinakar aru tuqi, qillqat tuqi, aka kamachi yatiyañapataki:

2“Persiankir Ciro reyix akanak arsu: Alaxpachankir Tatitu Diosaw aka uraqinkir taqi markanak apnaqañaxatak amparaxar katuyitu, Judá uraqinkir Jerusalén markan jupan utap lurayañaxatakiw iwxarakitu.

3Ukhamïpansti, jumanak taypin khitinakatix Tatitun markapankirïpkta ukanakaruxa, Dios yanappan, Judá uraqinkir Jerusalén markar Tatitun utap lurir sarxpan, Israel markan Tatitupawa, Jerusalén markan jakaraki.

4Kawkha chiqanakantix judeankirinakax jakasipki uka chiqat sarxirinakaruxa, uta jak'a masinakapax yanapt'apxpan, qullqimpi, qurimpi, yänakampi, uywanakamp kuna, Jerusalenankir Diosan utapatakisti waxt'äwinak churawayapxarakpan.”

5Ukatsti Judänkirinakana, Benjaminankirinakan jilïrinakapasti, sacerdotenakasa, levitanakasa, khitinakatix Diosan ch'amañchatäpkän ukanakaxa, Jerusalenar sarañatakiw wakichasipxäna, Tatitun utap wasitat sayt'ayañataki.

6Uta jak'ankirinakapasti yanapt'apxänwa: qullqimpi, qurimpi, yänakampi, uywanakampi, wali jila alan yänakampi, ukxarusti kunayman waxt'äwinakampi.

7Ciro reyisti, kuna yänaktix Nabucodonosor reyix Jerusalén markat Tatitun utapat apsunkatayna, ukatsti diosanakapan utapar apkatayna uka yänak churxänwa.

8Ciro reyix Mitrídates sat qullqi apnaqir tuqiw uka yänak kutt'ayxäna, ukatsti, uka jaqix Sesbasar sat Judá markan jilïr apnaqiriparuw jakt'asa katuyxarakïna.

9Jakt'at yänakax akanakänwa: qurit lurat kimsa tunka jach'a qiru, qullqit lurat waranq jach'a qiru, pä tunka llätunkan cuchillo,

10qurit lurat kimsa tunka qiru, aliq qullqit lurat pusi patak tunkan qiru, ukhamarak walja yänakampi.

11Qurita, qullqit lurat taqpach yänakax phisqa waranq pusi patakänwa. Taqi ukanakxa, Sesbasar chachaw Jerusalenar apxäna, apanukut jaqinakamp chik Babiloniat kutt'ankäna ukkha.

Jump to: Chapter 2 →

Recommended Reading

Commentary Ezra Commentaries → Devotional Ezra Devotional Guide → Get This Bible Aymara Study Bible →