Ezra 4

Aymara 1997

← Chapter 3 Jump to: Chapter 5 →

1Judionakan uñisirinakapaxa, Babiloniar apatäkäna ukanakan kutt'anxasin Tatitun utap wasitat lurapxatap yatisinxa,

2Zorobabel chacharu, Josué chacharu, jilïr irpir judionakar jikxatiriw sarapxäna; jupanakarusti sapxänwa: —Tatitun utap lurañan yanapt'apxäma, nanakax jumanakjamarakiw pachpa Diosar yupaychapxta. Asiria markankir Esarhadón reyix aka chiqan jakañatak irpanipkitu uka urunakatpach wilañchanaksa luqtapxarakta —sasa.

3Ukampis Zorobabel chachampi, Josué chachampi, maynïr jilïr irpir judionakampix ukxarux sapxänwa: —Janiw jumanakampi chik lurapkiristti. Nanak sapakiw Tatit Diosaxatakix utap lurapxä, Persiankir Ciro reyix ukham sapxarakitu —sasa.

4Ukhamasti, uka tuqin jakir jaqinakax judionakar mayjt'ayapxänwa, Tatitun utap jan utachapxañapataki.

5Ukat juk'ampi, mark apnaqirinakan yaqhip yanapirinakaparux qullq chilltapxäna, utachañ irnaqäwinak aynacht'ayañataki. Uksti, Ciro reyina, Darío reyin Persia mark apnaqäwi maranakapan ukham lurapxäna.

6Asuero machaq reyix Persia mark apnaqañ qalltaskäna ukapachaxa, judionakan uñisirinakapax jupanakar juchañchañatakiw reyir mä qillqat luqtapxäna.

7Uka qhipatsti, Artajerjes reyiw Persia mark apnaqarakïna. Apnaqäwip qalltkän ukkhaxa, Bislam, Mitrídates, Tabeel sat chachanakampi, mayni masinakapampixa, mä qillqat reyir qillqapxäna, uka qillqatasti arameo arut persa arur jaqukipatänwa.

8Rehúm sat comandantempi, Simsai sat qillqirimpisti, mä qillqatarak judío jaqinakat jan wal parlas Artajerjes reyir apayapxäna.

9Uka qillqatasti, Persia, Érec, Babilonia, Susa, uka markanakan apnaqirinakapana, taripirinakapana, yanapirinakapan sutinakapampi qillqantatänwa, ukhamaraki, kawkïr markanakarutix wali uñt'at jach'a Asnapar sat reyix uraqinakapat jaqunukuykatayna uka jach'a markanakan yanapirinakapan sutinakapampi qillqantatänwa. Uka markanakax Samaria markanakana, Éufrates jawirat inti jalant tuqin utjir uka suyunakan jakapxarakïna. Reyir apayat qillqatasti akham sänwa: “Artajerjes jach'a rey, Éufrates jawirat inti jalanta tuqin utjasir luqtirinakamaw aruntanipxtam:

12“Juma jach'a reyiruw yatiyañ munapxsma, kawkïri judionakatix Babilonia markat mistunisin Jerusalenar kuttanipki ukanakaxa, wasitat uka saykatasiri, jan wali markxa lurasipki. Jupanakax pirqanak sayt'ayañsa qalltxapxiwa, uta qalltanakap wasitat askichañsa.

13Ukxarusti juma jach'a munañan reyirux yatiyanipxaraksmawa, uka markatix wasitat luratäxani, pirqanakapas sayt'ayatäxarakini ukkhaxa, janiw kuna impuestonaksa churañ munkxapxaniti, ukatsti reyin markapan utjir qullqipas aynacht'aniwa.

14Nanakax juma jach'a munañan reyin luqtirinakamäpxtwa, janiw jumar ukham ñanqhachapxañap munapkiristti, ukat juma jach'a munañan reyir yatiyanipxsma,

15ukhamat juma reyin nayra awkinakaman qillqatanakapax uñjatäñapataki. Juma reyisti uka qillqatanakan qhanañchaskiri jikxatäta, uka markan reyinakapatakisa, suyunakapatakis kutkatasiri, jan walt'ayir markätapa, uka markansti nayra pachanakanxa sayt'asiñanak utjayäna, ukat t'unjat uñjasirakïna.

16Ukat juma jach'a munañan reyir yatiyapxsma, uka markatix wasitat sayt'ayatäni, pirqanakapas tukuyatarakïni ukaxa, juma reyix janiw apnaqäwiman Éufrates jawirat inti jalant tuqinkki uka markanakxarux munañanïkxasmati” sasa.

17Ukatsti, Artajerjes reyix akham yatiyäwi apayarakïna: “Aruntanipxsmawa Rehúm comandanteru, Simsai qillqiriru, Samaria markan jakapki uka masinakaparu, Éufrates jawirat inti jalant tuqinkirinakaru, ukat ukxar utjir suyunakaru:

18Kawkïr qillqattix jumanakax nayar apayanipkista ukxa, jaqukipat arun nayax ullarta,

19ukanakxat yatxatayaraktwa. Uka markax nayra pachatpach yaqha reyinakar saykatirïtayna, jan walt'añanakas utjapunirïtaynawa.

20Ukatsti, Jerusalén markan ch'aman reyinakan utjatapas uñstarakiwa, uka reyinakax Éufrates jawirata inti jalant tuqin utjir markanakxar munañanïpxänwa, khitinakarutix impuestonaka, kuna churañanakatix wakt'ki ukanak churapxirïna.

21Ukhamasti, uka marka wasitat lurañanakax suyt'ayatäpan nayan arsutax yatiyañkama.

22Nayan arsutax jank'ak phuqhayapxam, apnaqäwixan jan aynacht'añapataki” sasa.

23Kunapachatix Artajerjes reyin qillqatap ullarapxäna ukkhaxa, ukspachaw Rehúm chachasa, Simsai qillqirisa, masinakapasa, Jerusalenar sarapxäna, ukatsti axsarayasaw judionakar munkir jan munkir lurañanak suyt'ayapxäna.

24Ukhamat Jerusalén markan Tatitun utap lurañax suyt'ayatäxäna, Persia markankir Darío reyin payïri mara apnaqäwipkama.

← Chapter 3 Jump to: Chapter 5 →