Ezra 3

Aymara 1997

← Chapter 2 Jump to: Chapter 4 →

1Paqallqür phaxsi purinxäna ukkhaxa, israelitanakax markanakapan utjnuqatäxapxänwa, ukatsti taqiniw Jerusalenan tantachasipxäna.

2Ukatsti Josadac chachan Josué yuqapasa, sacerdote masinakapasa Israelan Tatitupan altarap lurañ qalltapxäna, Salatiel chachan Zorobabel yuqapampi, wila masinakapamp chika, kunjämtix Diosan jaqipa Moisés tuqi kamachix arskäna ukarjam uka patxan nakt'at luqtäwinak luqtañataki.

3Altarsti suma utt'ayat lurapxäna, uksa tuqin jakir jaqinakar jupanakan axsarapxatapata, sapa willjtanaka, sapa jayp'unakaw uka patxan Tatitur jach'añchas luqtäwinak luqtapxäna.

4Ukatsti, Chhujllanak lurañ phunchhäwi uruyapxäna, kunjämatix kamachin qillqatäkäna ukarjama, sapüruw waxt'äwinak qawqhatix wakt'käna ukhamarjam churapxäna,

5sapüru luqtañ nakt'at luqtäwinaka, ukhamaraki machaq phaxsi amtäwi uruta, Tatitur luqtat phunchhäwi lurañanakax utjki ukanakata, ukhamarus khitinakatix chuymanakapatjam Tatitur churapkäna ukanakata.

6Tatitun utapax janïra lurañ qalltaskäna ukasa, paqallqür phaxsin nayrïr urutpach nakt'at luqtäwinak Tatitur churañ qalltapxäna.

7Ukatsti, Ciro reyiruw mayipxäna, Tiro, Sidón markankir jaqinakan Líbano qullut cedro lawanak barconakat qutanjam Jope markar apapxañapataki, uka jaqinakarusti irnaqäwinakapat manq'añanakampi, umañanakampi, aceitemp kun churapxäna; utachirinakampiru, carpinteronakampirusti, qullq churapxarakïna, irnaqäwinak qalltapxañapataki.

8Zorobabel chachampi, Josué sacerdotempisti Jerusalén markar purinipxatapatxa payïr marana, payïr phaxsi saraqataruw Tatitun utap wasitat lurañ qalltapxäna. Jupanakarux sacerdotenaka, levitanaka, Jerusalenar kutt'anipkatayna taqi uka judío jaqinakaw yanapapxarakïna, irnaqäwinak sarayapxañapatakisti, pä tunk maranit uksar levita chachanak ajllipxäna.

9Ukhamaw Josué chachax yuqanakapampi, wila masinakapampi Tatitun utap lurañ irnaqäwinak sarayapxäna, Cadmiel chachan wawanakapamp kuna, jupanakax Hodavías chachan wila masipänwa. Henadad chachan wila masinakapas yanaparakïnwa.

10Ukatsti, uta luririnakax Tatitun utapatak nayrïr qala jaquntapkäna ukkhaxa, sacerdotenakax sayt'asipxänwa, jupanakax sacerdote isin isthapitäpxänwa, trompetanakap phust'asaw Tatitur yupaychapxäna. Asaf chachat saraqir levitanakax platillonakampirakiw Tatitur yupaychapxäna, Israelan David reyipan arsutaparjama.

11Mayninakax yupaychañ q'uchunak q'uchupxäna, mayninakasti sapxarakïnwa: “Tatitur yuspagarapxam, jupax askiwa, munasiñapas Israel markapatakix wiñayatakiwa” sasa. Tatitun utap wasitat lurañ qalltasitapatsti markpachaw kusisiñat arnaqasis Tatitur yupaychapxäna.

12Tatitun nayrïr utap uñt'ir sacerdotenakatsa, levitanakatsa, wila masinakan jilïr jaqinakatsa, machaq uta lurañ qalltasipan jach'at jachapxäna. Ukapachasti waljaniw kusisiñat art'asipxarakïna.

13Jaqinakan jachatanakapasa, kusisiñat jach'at arnaqasitanakapas mayakïnwa, jupanakax walpun arnaqasipxäna, uxutanakapas jayatpach ist'asirakïna.

← Chapter 2 Jump to: Chapter 4 →