Ezra 2

Aymara 1997

← Chapter 1 Jump to: Chapter 3 →

1Nabucodonosor reyix walja judionakaruw Babilonia markar katuntat apäna. Jerusalén markar kutt'anirinakax uka katuntat judionakan wawanakapänwa. Jilïr irpirinakax Zorobabel chachan p'iqichataw Jerusalén markaru, ukhamarak Judá uraqin utjir markanakar kutt'anxapxäna. Jilïr irpirinakan sutinakapax akanakänwa: Josué, Nehemías, Seraías, Reelaías, Mardoqueo, Bilsán, Mispar, Bigvai, Rehúm, Baaná, ukanaka. Maynïr kutt'anir judionakasti akanakänwa:

3Parós chachan wila masinakapatxa, pä waranqa patak paqallq tunk payani;

4Sefatías chachan wila masinakapatxa, kimsa patak paqallq tunk payani;

5Árah chachan wila masinakapatxa, paqallq patak suxta tunk phisqani;

6Pahat-moab ukankir Josué, Joab chachanakan wila masinakapatxa, pä waranqa kimsaqallq patak tunk payani;

7Elam chachan wila masinakapatxa, waranqa pä patak phisqa tunk pusini;

8Zatú chachan wila masinakapatxa, llätunk patak pusi tunk phisqani;

9Zacai chachan wila masinakapatxa, paqallq patak suxta tunkani;

10Binuy chachan wila masinakapatxa, suxta patak pusi tunk payani;

11Bebai chachan wila masinakapatxa, suxta patak pä tunk kimsani;

12Azgad chachan wila masinakapatxa, waranqa pä patak pä tunk payani;

13Adonicam chachan wila masinakapatxa, suxta patak suxta tunk suxtani;

14Bigvai chachan wila masinakapatxa, pä waranqa phisqa tunk suxtani;

15Adín chachan wila masinakapatxa, pusi patak phisqa tunk pusini;

16Ater, Ezequías chachan wila masinakapatxa, llätunk tunk kimsaqallquni;

17Besai chachan wila masinakapatxa, kimsa patak pä tunk kimsani;

18Jorá chachan wila masinakapatxa, patak tunka payani;

19Hasum chachan wila masinakapatxa, pä patak pä tunk kimsani;

20Guibar chachan wila masinakapatsti, llätunk tunk phisqani;

21Belén markatxa, patak pä tunk kimsani.

22Netofá chiqatxa, phisqa tunk suxtani.

23Anatot markatsti, patak pä tunk kimsaqallquni.

24Bet-azmávet chiqatxa, pusi tunk payani;

25Quiriat-jearim, Quefirá, Beerot chiqanakatxa, paqallq patak pusi tunk kimsani;

26Ramá, ukhamarak Gueba markanakatsti, suxta patak pä tunk mayani.

27Micmás markatxa, patak pä tunk payani;

28Betel, ukhamarak Ai markanakatxa, pä patak pä tunk kimsani.

29Nebo markatxa, phisqa tunk payani;

30Magbís markatsti, patak phisqa tunk suxtani;

31Elam chiqatxa, waranqa pä patak phisqa tunk pusini;

32Harim chiqatxa, kimsa patak pä tunkani;

33Lod, Hadid, ukhamarak Onó chiqanakatsti paqallq patak pä tunk phisqani;

34Jericó markatxa, kimsa patak pusi tunk phisqani;

35Senaá chiqatsti, kimsa waranqa suxta patak kimsa tunkani.

36Josué chachat saraqirïkäna uka Jedaías wila masitxa, llätunk pataka paqallq tunk kimsani;

37Imer chachan wila masipatxa, waranqa phisqa tunk payani;

38Pashur chachan wila masipatxa, waranqa pä patak pusi tunk paqallquni;

39Harim chachan wila masipatsti waranqa tunka paqallquni.

40Hodavías chachat saraqiri Josué, ukhamarak Cadmiel wila masinakapatxa, paqallq tunk pusini.

41Asaf chachan q'uchuri wila masinakapatsti patak pä tunk kimsaqallquni.

42Punku uñjirinakasti Ater, Talmón, Acub, Hatitá, Sobai, Salum, uka chachanakan wawanakapänwa, jupanakasti taqpachanix, pataka kimsa tunka llätunkani jaqinakänwa.

43Tatitun utapan yanapasirinakasti: Sihá, Hasufá, Tabaot,

44Querós, Siahá, Padón,

45Lebaná, Hagabá, Acub,

46Hagab, Salmai, Hanán,

47Guidel, Gáhar, Reaías,

48Resín, Necodá, Gazam,

49Uzá, Paséah, Besai,

50Asná, Meunim, Nefusim,

51Bacbuc, Hacufá, Harhur,

52Baslut, Mehidá, Harsá,

53Barcós, Sísara, Temá,

54Nesíah, Hatifá, uka chachanakat saraqir wawanakapänwa.

55Salomonan luqtirinakapan kutt'anir wila masinakapasti: Sotai, Soféret, Perudá,

56Jaalá, Darcón, Guidel,

57Sefatías, Hatil, Poquéret-hasebaím, Amón, uka chachanakat saraqir wawanakapänwa.

58Tatitun utapan yanapasirinakampi, ukhamarak Salomonan luqtirinakapat saraqirinakapampixa, taqpachanix kimsa patak llätunk tunka payanïnwa.

59Khitinakatix Tel-mélah, Tel-harsá, Querub, Adón, Imer sat markanakat purinipkäna ukanakax, janiw israelitätapsa, kawkïr wila masïpxatapsa yatisipkänti, jupanakasti akanakänwa:

60Delaías, Tobías, Necodá uka chachanakan saraqirinakapa, jupanakasti suxta pataka phisqa tunka payanïnwa.

61Sacerdotenakan wila masinakapatsti: Hobaías, Cos, Barzilai chachan saraqirinakapa, Barzilai chachax Galaadankir Barzilai chachan maynïri phuchhapampi jaqichaskäna ukawa, jupax awkch'ipan sutipat sutinïnwa.

62Jupanakasti, wila masinakapan qillqatanakan sutinakap thaqapxäna, ukampis janiw jikxatapkänti, ukhamïpan jupanakax sacerdote kankañatxa apanukutäpxäna.

63Ukhamarusa, mark apnaqirix jupanakar Tatitur luqtat manq'anakat jan manq'apxañapatakiw yatiyäna; mä sacerdoten Urim, Tumim sat qalanak tuqi kunjämänis uk yatiñapkama.

64Uka tantachat jaqinakasti, taqpachanix pusi tunka payan waranq kimsa pataka suxta tunkanïnwa,

65luqtiri uywatanakapax chachatsa, warmitsa, paqallq waranqa kimsa pataka kimsa tunk paqallqunïnwa. Ukatsti jupanakan utjarakïnwa pä patak q'uchurinaka, chachatsa, warmitsa.

66Ukxarusti jupanakanxa, paqallq pataka kimsa tunka suxtan caballonaka, pä pataka pusi tunka phisqan mulanakaw utjäna,

67ukhamaraki pusi patak kimsa tunka phisqan camellonaka, suxta waranq paqallq patak pä tunkan asnonaka.

68Wila masinakan yaqhip jilïrinakapaxa, churäwinak Jerusalenar apapxäna, Tatitun utap wasitat lurañataki.

69Jupanakasti Tatitun utap lurañatakix utjatanakaparjamaw qullqi churapxäna, pusi pataka kimsaqallq tunka kimsaqallqun kilo quri, pä waranq paqallq patak phisqa tunkan kilo qullqi, ukhamaraki patak sacerdote isinaka.

70Ukatsti sacerdotenakasa, levitanakasa, yaqhip judionakasa Jerusalenaruw utjasiñatak qhiparxapxäna, ukampis q'uchurinakasa, punku uñjirinakasa, ukhamarak Tatitun utapan irnaqirinakasa, ukat ukxar utjir israelitanakasa markanakaparuw qhiparxapxäna.

← Chapter 1 Jump to: Chapter 3 →