1 Kings 22 — Balinese

1Kalih taun langkung suenipun nenten wenten paperangan ring pantaran negara Israele miwah Siria.

2Ring taun sane kaping tiga Ida Sang Prabu Yosapat saking Yehuda raris ngrauhin Ida Sang Prabu Akab ring Israel.

3Ida Sang Prabu Akab raris mataken ring paraprakanggen idane, sapuniki: “Ngudiang dadi iraga tusing mapakibeh buat ngamulihang kota Ramot-Gileade, uli ratun gumi Siriane? Kotane ento sujatinne gelah iraga!”

4Sapanglanturipun, Sang Prabu Akab raris mataken ring Sang Prabu Yosapat, sapuniki: “Punapike idewa ledang nyarengin titiang buat ngebug kota Ramote?” Ida Sang Prabu Yosapat raris masaur, sapuniki: “Inggih titiang misadia jaga nyarengin idewa. Kadi asapunika taler wadua balan titiange, miwah prajurit-prajurit titiange sane nunggang kuda.

5Nanging pinih riin ngiringja iraga nunasang ring Ida Sang Hyang Widi Wasa.”

6Duaning punika, Ida Sang Prabu Akab raris maumang paranabine, wenten sawatara samas diri akehipun, tur ida mataken ring dane sareng sami, sapuniki: “Punapike tiang kalugra ngebug kota Ramot-Gileade, punapike nenten?” Paranabine punika masaur sapuniki: “Rarisangja iratu mamargi, Ida Sang Hyang Widi Wasa jaga mapaica kamenangan ring iratu.”

7Nanging Sang Prabu Yosapat malih mataken sapuniki: “Punapike iriki nenten wenten malih nabi lianan, sane nyandang aturin iraga nunasang ring Ida Sang Hyang Widi Wasa?”

8Pasaur Ida Sang Prabu Akab, sapuniki: “Wenten malih adiri, inggih punika Nabi Mika, okan Dane Yimla. Nanging titiang geting ring dane, santukan dane nenten naen maosang paindikan sane becik pabuat titiang, nanging setata paindikan sane kaon.” Pasaur Ida Sang Prabu Yosapat, sapuniki: “Sampunangja idewa mabaos kadi asapunika.”

9Irika Sang Prabu Akab raris ngesengin pangenter purine, tur ngandikayang dane mangda digelis ngaturin Nabi Mika.

10Sang prabu makakalih ngrangsuk busana kagungan idane raris malinggih ring singasanan idane, ring genah panyosohan gandume, ring arepan gapuran kota Samariane, tur paranabine makasami ngwedalang ramalan ring ajeng idane.

11Saking pantaran nabine punika, wenten nabi adiri mapesengan Sedekia, okan dane Kenaana. Dane makarya tanduk malakar besi, tumuli matur ring Ida Sang Prabu Akab, sapuniki: “Sapuniki sabdan Ida Sang Hyang Widi Wasa: ‘Aji tanduke ene kita lakar nyenggot wong Siriane kantos kita ngalahang ia makejang.’ ”

12Sawatek paranabine sane lianan, sami pada masaur manuk sapuniki: “Rarisangja mamargi ngebug kota Ramote, sinah iratu pacang molih ring rana. Ida Sang Hyang Widi Wasa jaga mapaica kamenangan ring iratu.”

13Daweg punika, prakanggene sane ngaturin Nabi Mika punika sedekan matur ring sang nabi sapuniki: “Sawatek paranabine lianan sami sampun ngramalang mungguing ida sang prabu jaga molih ring rana. Sane mangkin guru becikan taler ngramalang asapunika.”

14Nanging Nabi Mika masaur sapuniki: “Sajeroning parab Ida Sang Hyang Widi Wasa sane nyeneng, tiang majanji, mungguing tiang wantah jaga maosang paindikan sane sabdayang Ida ring tiang kewanten!”

15Rikala dane rauh ring ajeng Ida Sang Prabu Akab, sang prabu raris mataken ring dane, sapuniki: “Inggih Nabi Mika, napike Sang Prabu Yosapat miwah tiang kalugra ngebug kota Ramot-Gileade, punapi nenten?” Pasaur Dane Mika sapuniki: “Durusangja ngebug, sampun sinah iratu pacang menang. Ida Sang Hyang Widi Wasa pacang mapaica kamenangan ring iratu.”

16Nanging Sang Prabu Akab malih ngandika, sapuniki: “Yen guru mabaos ring tiang sajeroning parab Ida Sang Hyang Widi Wasa, nikayang sane sapatutipun. Sampun ping kuda-kuda tiang ngaturin guru mangda mabaos kadi asapunika.”

17Nabi Mika tumuli masaur sapuniki: “Titiang sampun ngeton wadua balan Israele sambeh pablesat ring gunung-gununge, waluya sakadi biri-biri sane nenten wenten pangangonnyane. Tur Ida Sang Hyang Widi Wasa, ngandika sapuniki: ‘Jlemane ene tusing ngelah pamimpin, depang suba ia pada mulih saha rahayu.’ ”

18Ida Sang Prabu Akab raris matur ring Sang Prabu Yosapat, sapuniki: “Boyake titiang sampun nguningayang ring idewa, mungguing dane nenten naenin ngramalang paindikan sane becik pabuat titiang? Setata dane ngramalang paindikan sane kaon.”

19Nabi Mika malih nglanturang baos danene sapuniki: “Sane mangkin pirengangja sabdan Ida Sang Hyang Widi. Titiang ngeton Ida Sang Hyang Widi Wasa malingga ring singasanan Idane ring suargan, kasarengin antuk paramalaekat Idane, sane ngadeg ring tengen Idane.

20Ida Sang Hyang Widi Wasa mataken sapuniki: ‘Nyenke ane lakar nglelunyuhin I Akab, apanga ia nyak pesu ka pasiatan apang ia mati di Ramot-Gileade?’ Ring pantaran paramalaekate punika wenten sane mabaos sapuniki miwah wenten sane mabaos sapunika.

21Irika raris wenten satunggaling roh tangkil ring ajeng Ida Sang Hyang Widi Wasa sarwi matur sapuniki: ‘Titiang sane jaga nglelunyuhin ipun.’

22Ida Sang Hyang Widi Wasa raris mataken sapuniki: ‘Kenken lakar baan cai?’ Rohe punika raris matur sapuniki: ‘Titiang jaga tedun tur nyelubin sakancan nabin Sang Prabu Akabe, mangda ipun mobab.’ Ida Sang Hyang Widi Wasa raris ngandika sapuniki: ‘Nah, kemaja majalan, lelunyuhin ia, cai bakal sida karya.’ ”

23Irika Nabi Mika, raris muputang atur danene, sapuniki: “Sapunika sane kawiaktianipun. Ida Sang Hyang Widi Wasa sampun ngawinang paranabi druene puniki pada mobab ring iratu. Nanging Ida Sang Hyang Widi Wasa sampun mastikayang mungguing iratu pacang nemu sengkala.”

24Irika Nabi Sedekia raris matangi tur namplak prarain dane Nabi Mika, sarwi mataken sapuniki: “Uli ipidanke roh Ida Sang Hyang Widi Wasa suba nilar tiang laut masabda teken jerone?”

25Nabi Mika raris masaur, sapuniki: “Kayang jerone malaib uli kamare abesik ka kamare ane lenan, buat ngluputang dewek jerone, ditu mara jerone nawang unduke ene.”

26Irika Ida Sang Prabu Akab raris mrentahang salah tunggil prakanggen idane, sapuniki: “Jukja Nabi Mika, laut ajak sig Dane Amone, gubernur kotane, muah sig Pangeran Yoase.

27Aturin sang kalih apanga dane nyelepang Nabi Mika ka pangkenge, muah maang dane pangan kinum, kanti tiang buin teka saha rahayu.”

28Nanging Nabi Mika malih matur sapuniki: “Yen iratu mawali saha rahayu, sinah Ida Sang Hyang Widi Wasa nenten masabda malantaran titiang!” Sapanglanturipun, dane malih mabaos: “Ih nyama ajak makejang, padingehangja munyin tiange ene.”

29Sasampune punika Ida Sang Prabu Akab ratune ring Israel miwah Ida Sang Prabu Yosapat ratune ring Yehuda raris mamargi ngebug kota Ramot-Gileade punika.

30Ida Sang Prabu Akab matur ring Sang Prabu Yosapat, sapuniki: “Yen iraga sampun matempuh ring payudan, titiang jaga nyaruang dewek titiange, nanging idewa anggenja busana kagungane.” Irika ratune saking Israel raris nyamar medal ka payudan.

31Ida sang prabu saking Siria, sampun mapaica prentah ring komandan kreta perang idane sane tigang dasa kalih punika, mangda ipun sampunang ngawag nglawan asing-asing anak, sajawining nglawan sang prabu saking Israel.

32Duaning punika, rikala ipun manggihin Sang Prabu Yosapat, pitaenang ipun ida punika sang prabu saking Israel, tur ipun raris mabalik buat ngrebut ida. Nanging riwau ida nyerit,

33ipun sareng sami raris uning mungguing ida punika boya sang prabu saking Israel, tur ipun raris wusan ngrebut ida.

34Nanging duk punika wenten satunggaling prajurit Siriane ngawag nibakang panahipune, raris jeg ngenain Ida Sang Prabu Akab, benengan pangatep kawaca besin idane. Ida raris nyerit ring kusir kretan idane, sapuniki: “Gelahe matatu, kipekangja kretane laut pesu uli kalangan pasiatane.”

35Rikala yudane kantun rames, Ida Sang Prabu Akab kantun kasundang ring kretan idane, nyingakin wong Siriane. Rah kanin idane ngetel tur ngaliab dasar kretane, tur rikalaning sore ida raris seda.

36Riwau makire surup suryane wenten prentah ring pantaran wadua bala Israele, sapuniki: “Ajak makejang patut mulih ka gumi muah kotannyane suang-suang.”

37Kadi asapunika indik Ida Sang Prabu Akabe seda. Layon idane raris kabakta ka Samaria tur kapendem irika.

38Kretan idane kumbah ring tlagane ring Samaria. Irika asune pada nyilapin rah idane, miwah parapenayange pada manjus ring tlagane punika, satinut ring sabda sane sampun kasabdayang antuk Ida Sang Hyang Widi Wasa.

39Sapanglanturipun, saluiring paindikan sane kakardi antuk Ida Sang Prabu Akab, minakadinipun indik purin idane sane kapayasin antuk danta, miwah indik kota-kota sane wangun ida, makasami sinurat ring Cakepan Babad Pararatun Israele.

40Sasampune ida seda, putran idane Ida Sang Prabu Ahasia ngentosin ida jumeneng nata.

41Ring taun sane kaping pat, panyeneng Ida Sang Prabu Akab ring Israel, Ida Sang Prabu Yosapat, okan Sang Prabu Asa, madeg ratu ring Yehuda.

42Duk punika ida mayusa pasasur taun, tur ida mrentah ring Yerusalem selae taun suenipun. Biang idane mapesengan Asuba, okan Dane Silhi.

43Pateh sakadi ajin idane Sang Prabu Asa sane riinan ring ida, ida tansah nglaksanayang paindikan sane patut ring ayun Ida Sang Hyang Widi Wasa. Nanging genah panyungsungan arca-arcane nenten sirnayang ida, tur rakyate kantun ngaturang aturan miwah morbor menyan irika.

44Ida Sang Prabu Yosapat ngwentenang padame sareng ring ida sang prabu ring Israel.

45Sapanglanturipun sakancan paindikan sane kalaksanayang antuk Ida Sang Prabu Yosapat, indik sakancan kaprawiran idane miwah indik payudan idane, makasami kasuratang ring Cakepan Babad Pararatun Yehudane.

46Ida nyirnayang sakancan penayange luh miwah muani, sane ngaturang ayah ring genah panyungsungan dewa-dewane punika, sane kantun ngawit saking panyeneng ajin idane, Sang Prabu Asa.

47Ring panegara Edom nenten wenten sang prabu. Jagate punika kaprentah antuk wakil sane kaselik antuk ida sang prabu ring Yehuda.

48Ida Sang Prabu Yosapat makarya kapal-kapal sane nyidayang malayar ring samudrane, buat jaga malayar ka Opir, gumanti jaga ngrereh mas. Nanging kapal-kapale punika bencah ring Esion-Geber, tur nenten durus malayar.

49Sasampune punika Ida Sang Prabu Ahasia saking Israel ngaturang ring ida, mangda parakaulan sang prabu Israele jaga nyarengin kaulan idane malayar, nanging Ida Sang Prabu Yosapat nenten kayun.

50Ida Sang Prabu Yosapat raris seda tur kapendem ring pamendeman pararatune ring Kota Daud, tur putran idane Ida Sang Prabu Yoram, ngentosin ida jumeneng nata.

51Ring taun sane kaping pitulas, panyeneng Ida Sang Prabu Yosapat ring Yehuda, Ida Sang Prabu Ahasia okan Sang Prabu Akabe, madeg ratu ring Israel. Ida mrentah ring Samaria kalih taun suenipun.

52Ida ngardi dosa pamantuka ring Ida Sang Hyang Widi Wasa, ninutin conto ajin idane Sang Prabu Akab, biang idane Isebel, miwah Sang Prabu Yerobeam, sane sampun nuntun wong Israele malaksana dosa.

53Ida nyungsung miwah ngancangin Dewa Baal, tur pateh sakadi ajin idane sane riinan ring ida, ida ngawinang Ida Sang Hyang Widi Wasa, Widin Israele duka.