1 Samuel 4

Baoule (NYANMIƐN NDƐ'N 1998)

← Chapter 3 Jump to: Chapter 5 →

1Samiɛl kan ndɛ nga Anannganman kan kle i'n kwlaa kle Izraɛlfuɛ mun kwlakwla. Cɛn kun Izraɛlfuɛ'm be ɔli kɛ be nin Filistifuɛ'm be ko kun alɛ. Be boli be nanmue Ebɛn-Ezɛr lɔ. Filistifuɛ'm be kusu be boli be nanmue liɛ'n Afɛk lɔ.

2Filistifuɛ'm be jranjrannin sɛsɛsɛ, yɛ alɛ'n boli i bo-ɔ. Filistifuɛ'm be kwlali Izraɛlfuɛ mun. Be kunnin be nun sran akpi nnan alɛ sɔ'n nun.

3Be nga be kali lɛ'n be sali be sin nanmue nun lɔ. Izraɛl kpɛnngbɛn'm be waan: «?Ɔ yo sɛ ti yɛ Anannganman man Filistifuɛ'm be kwlali ye sɔ-ɔ? E `ko fa Anannganman i alaka'n e bla. Sɛ ɔ o wa'n, ɔ ´de e e kpɔfuɛ'm bé sa nun.»

4Yɛ be sunmannin sran Silo lɔ-ɔ. Anannganman b'ɔ sie mɛn wunmuan'n b'ɔ tran anz nga be niɛn i ninnge'm be su'n be afiɛn'n, be ko fɛ i alaka'n bali. Eli i mma nnyɔn mun, Ɔfni nin Fine, be ko sunmannin Nyanmiɛn i alaka'n.

5Kɛ Anannganman i alaka'n juli lɛ cɛ'n, Izraɛlfuɛ'm be ngba be tru sɔ ekeee! Nan asiɛ'n ɔ'a keje.

6Kɛ Filistifuɛ'm be tili'n, be waan: «?Onin yɛlɛ nganniɛn kekle nga b'ɔ tɛ Ebre'm be nanmue nun lɔ lɛ'n?» Kɛ be tili kɛ Anannganman i alaka'n ɔ'a ba nanmue nun lɛ'n,

7be lɛ usulɛ. Be waan: «Nyanmiɛn ɔ'a jra be nanmue nun lɔ. Y'a wu o! Ɔ nian jra-man sɔ le!

8Y'a wu o! Wan yɛ e ´nyɛn i b'ɔ ´de ye Nyanmiɛn sroesroe nga i sa nun-ɔn. Nyanmiɛn sɔ'n yɛ ɔ fali sa kekle sunman yili i Eziptfuɛ'm bé su aawlɛ flɛnnɛn nun lɔ nin-ɔn.

9Ɔ man Filistifuɛ mun, amun `tra amun anwlɛn, amun `jran kekle. Sɛ ɔ'a yo-man sɔ-ɔ, amun wa yo Ebrefuɛ'm be kanga kɛ be yoli amun kanga laa'n sa. Amun `jran kekle. Amun nin be `kun.»

10Filistifuɛ'm be nin Izraɛlfuɛ'm be kunnin kpɛkuun be kwlali be. Izraɛlfuɛ'm be wanndi ɔli be awlo kunngun'm be nun. Be kwlali Izraɛlfuɛ'm be tɛtɛ kpa. Izraɛlfuɛ'm be nun sran akpi-akpi ablasan (30.000) tɔli.

11Filistifuɛ'm be fali Nyanmiɛn i alaka'n. Eli i mma nnyɔn'n Ɔfni nin Fine be wuli wie.

12Bɛnzamɛn akpasua su sran kun fin alɛ kunwlɛ lɔ juli Silo lɛ le kunngba'n nun. Ɔ wanndi yɛ ɔ ba-a, ɔ ba'n, ɔ'a titi i wun tralɛ'm be nun, ɔ'a guɛ i ti su ndutre.

13Eli ti i bia'n su atin nuan lɛ. Ɔ su minndɛ, i klun titi-mɛn i ngowa. Nyanmiɛn i alaka'n ti ɔ tran-an, ɔ tran-man. Kɛ sran sɔ'n juli klɔ'n nun b'ɔ boli jasin'n yɛ sran'm be tɔ kpanlɛ su-ɔ, woo.

14Eli tili kpanlɛ sɔ'n. Ɔ usali kɛ: «?Yɛ nganniɛn nga i bo ti sɛ?» Yɛ sran kunngba'n ɔ bali ndɛndɛ ɔ wa kannin jasin'n kleli i-ɔ.

15Kɛ ɔ ´yo sɔ'n, wuun Eli ɔ'a di afuɛ ablangwlan-nin-mɔcuɛ. I nyin ɔ'a si, ɔ wun-man ase kun.

16Bian'n seli i kɛ: «Alɛ kunwlɛ nun lɔ yɛ n fin yɛ n wanndi bali ndɛkɛn yɛ nin-ɔn.» Eli usɛli i kɛ: «?Ɔ yoli sɛ, mín wa?»

17Jasin bofuɛ'n waan: «Izraɛlfuɛ'm be wanndili Filistifuɛ'm be nyrun. Be kwlali e tɛtɛ kpa. Ɔ mma nnyɔn mun, Ɔfni nin Fine, be wuli yɛ Filistifuɛ'm be fali Nyanmiɛn i alaka'n.»

18Kɛ bian'n kannin Nyanmiɛn i alaka'n ndɛ'n cɛ'n, Eli fin i bia'n su tɔli i kɔminsin anuan nun lɛ. Kɛ bɔ Eli ti sran kpɛnngbɛn kun bɔ i wunnɛn o i wun'n, kɛ ɔ tɔli'n, i kɔminsin'n boli fɛ nan ɔ'a wu. Eli sieli Izraɛl nvle'n afuɛ ablanan.

19I blɛ sɔ nun'n, i wa Fine i yi liɛ'n ɔ ti wunnzɛfuɛ, i ba wulɛ'n ɔ'a ju. Kɛ ɔ tili i kɛ be fali Nyanmiɛn i alaka'n nan i sia'n nin i wun'n b'a wu'n, i klun'n ka lɛ yoli i ya, ɔ kluli nan ɔ'a wu ba.

20Bla sɔ nga be ukɛli i wuli ba'n, be ´nian-an, ɔ su wa ka nun. Be seli i kɛ: «Tra wɔ anwlɛn, w'a wu ba yasua.» Sanngɛ ɔ'a sie-mɛn i su, i ti, ɔ'a tɛ-man bé su.

21Ɔ flɛli ba'n kɛ I-kabɔd, afin Nyanmiɛn i anyrunnyan ng'ɔ fa mannin Izraɛl nvle'n ɔ'a tu be afiɛn. Nyanmiɛn i alaka'n bɔ be fali'n ɔ nin i sia nin i wun bɔ be wuli'n i ti yɛ ɔ flɛli i sɔ-ɔ.

22I waan: «Nyanmiɛn i anyrunnyan ng'ɔ fa mannin Izraɛl nvle'n, ɔ'a jaso be afiɛn, afin b'a fa Nyanmiɛn i alaka'n.»

← Chapter 3 Jump to: Chapter 5 →