Leviticus 26

Baoule (NYANMIƐN NDƐ'N 1998)

← Chapter 25 Jump to: Chapter 27 →

1«Nán amun kpɛ amuɛn ba. Waka sran nga be taka'n, ɔ nin yɛbuɛ amuɛn nga be taka'n, nán amun yo wie. Nán amun fa yɛbuɛ be sɛ amuɛn be klɛ i wun wɛnkɛɛn kɛ amun ´fa sie amun mɛn'n nun wa nan amun sɔ i. Afin min yɛ n ti Anannganman amun Nyanmiɛn nin-ɔn.

2Wunmiɛn-delɛ-cɛn'n ju'n, amun `de wunmiɛn, nán amun di junman. Mín sua'n, nán amun yo i finfin. Min yɛ n ti Anannganman nin-ɔn.»

3«Sɛ amun fa min mmla'm bé su'n, ndɛ nga n kan n kle amun'n, sɛ amun fa bé su'n,

4min kusu sɛ nzue'n i tɔlɛ'n ju-ɔ, n ´tɔ i m ´man amun nan fie'm be `yo ye nan waka'm be kusu be `su kpa.

5Ɔ man Izraɛl wa'n, kɛ vinyi i mma'n i tilɛ'n ɔ ´ju'n, wuun amun tɛ bo ble'n, yɛ kɛ ɔ ´ju kɛ amun `lua fie uflɛ'm bé su like'n, wuun amun tɛ ti vinyi be su mma mun. Aliɛ'n ɔ ´bobo amun su, yɛ amun ´tran amun mɛn'n nun fɔuun.

6M ´man amun fɔundi amun mɛn'n nun. Blɛ nga amun ´lafi'n, like fi su wa kle-man amun yalɛ. N ´nunnun nnɛn tɛtɛ mun. Sran fi su fa-man alɛ wlawla-man amún sin.

7Be nga be nin amun be kun'n, be ´wanndi amún bo. Sɛ amun nin be nyɛn i-ɔ be su nyan-man jranwlɛ.

8Be nga be nin amun be kun'n, kannzɛ man be yo sran ya kun, yɛ sɛ amun kusu amun ti sran nnun'n, san be ´wanndi amún bo. Be nun akpi blu (10.000) be ´wanndi amun nun sran ya bo. Be nin amun be jran kun alɛ-ɔ ɔ su yo-man ye.

9N ´jran amún sin, amun ´wu ba kaka, amun ´sɔn. N su yi-man amun ase. Aenguɛ nga min nin amun e trali'n, n ´di su titi.

10Aliɛ'n ɔ ´bobo amún su, nga bɔ amun fa sieli'n, amun ´kwla di i lelee. I kpa'n, amun ´se kɛ amun ´gua laa liɛ'n i blo nan amun fa uflɛfuɛ'n be ´sie i osu.

11E nin amun e wa tran lɛ, n su kaci-man n sin n si-man amun.

12E nin amun e ´nanti. N ´yo amun Nyanmiɛn, yɛ amun kusu amun ´yo min sran.

13Min yɛ n ti Anannganman amun Nyanmiɛn nin-ɔn. Min yɛ n fali amun Ezipt mɛn'n nun lɔ m bali-ɔ. Min waan n ´yi amun n ´fite sɔ nan nán amun yo kanga kun. Wunmiɛn nga Eziptfuɛ'm be lɛ i'n, bɔ i ti yɛ be tin amun su kplɔlɔlɔ'n, n sacili i. Ɔ man siɛn'n, sɛ amun ´nanti'n, amun ´kwla man amun ti su.»

14«Sɛ amún nyin ɔ'a yi-man min'n nan amu'an nanti-man min mmla nga m mannin amun'n bé su'n,

15aenguɛ nga e nin amun e trali'n, sɛ amun waan amun di-man i mmla'n su kun'n, yɛ min mmla fanunfanun nga m mannin amun'n, sɛ amun kaci amun sin si be'n,

16sa nga n ´fa wla amun nun'n yɛ o yɛ: sa sroesroe mun bɔ be kun srɛ'n, ɔ nin nzisi koklo'n, ɔ nin ayrɛ ng'ɔ gua bé wun'n yɛ n ´to n yi amún su-ɔ. I sɔ ninnge liɛ mun'n, be man sran'n ɔ tu i ba nun, yɛ be man ngokoɛ ɔ kun i. Amun ´di fie ngbɛn, san be nga be nin amun be kun'n, be yɛ be ´fɛ i su ninnge'm be ´di-ɔ.

17E nin amun e ´nyɛn i: be nga be nin amun be kun'n, be yɛ be ´kwla amun-ɔn. Sɛ sran fi fuan-man amun bɔbɔ'n, sanngɛ amun ´wanndi.

18Sɛ i sɔ sa liɛ nga n ´fa wla amun nun'n ɔ'a ju-man amun'n, fɔnlɛ nga amun fɔn'n, i su fɔ nga n ´fa tu amun ekun'n, i kekle'n ɔ ´tra laa liɛ'n i sɔ kpɛ nso.

19N ´nunn un amun wun tulɛ'n su. Ɔ man nyanmiɛn su lɔ ɔ ´tannin, nzue su fin-man lɔ tɔ-man kun. I sɔ ti man asiɛ'n ɔ ´mantan, ɔ ´yo kekleke kɛ blalɛ wafa wie sa.

20Amun ´kle amún wun yalɛ amun ´di junman ngbɛn: asiɛ'n ´su yo-man like fi ye, yɛ waka'm be su su-man mma.

21Sɛ amun waan amun ´yo nyin kekle mín su nan amún ti-man min nuan ndɛ'n, fɔ nga n wa tu amun'n, ɔ ´tra ng'ɔ o lɛ'n i sɔ kpɛ nso.

22N ´fa blo nnɛn mun n gua amun nvle'n nun be ´kun amun mma mun, yɛ be ´kun amun nnɛn mun. Kɛ ɔ ko yo sɔ'n, kpɛkuun amun ´ka kaan, yɛ amun atin mma'm be ´tɔ srololo.

23Sɛ i sɔ fɔ liɛ bɔ n tu amun'n ɔ ju-man amun'n nan se kɛ amun ´lo'n, nan amun tɛ yo nyin kekle mín su ekun'n,

24min kusu e nin amun e wa si su ekun. Fɔ nga n ´fa tu amun'n, ɔ ´tra ng'ɔ o lɛ'n i sɔ kpɛ nso.

25Aenguɛ nga min nin amun e trali bɔ amun sacili i'n ti'n, n ´to alɛ n ´yi amun mɛn'n nun. Man amun ´ko fia klɔ wie'm bé su, sanngɛ n ´fa tukpacɛ bɔ sa ndɛndɛ kun n ´yi i klɔ sɔ'm bé su, yɛ kpɛkuun be nga bɔ be nin amun be kun'n, be yɛ be ´sie amun-ɔn.

26N ´to amun awe. Kpaun tɔnwlɛ kunngba nun sa yɛ bla blu be ´kwla be tɔn kpaun-ɔn. Kpɛkuun kpaun kanngan sa yɛ bla sɔ'm be ´fa blɛ amun-ɔn. Sɛ amun di bɔbɔ'n, ɔ su kata-man amun ku bo.

27Sɛ i sɔ ngba ng'ɔ o lɛ'n ɔ kle-man amun kɛ amún nyin ´yi min'n, nan akplowa'n yɛ amun waan amun ´si i kekle nun'n,

28min kusu kɛ n ko fa ya'n, min nin amun e ´yia nun. Fɔ nga n ´tuli amun'n, n ´uka su, ɔ ´tra laa liɛ'n i sɔ kpɛ nso.

29Siɛn'n, amun ´di amun bɔbɔ amun mma'm be nnɛn.

30Amún wun tɛ bɔ ´yo min'n ti'n, n ´saci amun sraka yiwlɛ lika bɔ be o kpɔlɛ'm be su'n, m ´bubu amun ansans yrawlɛ mun, kpɛkuun sran nga be wu'n be fuɛn'n, n ´fa be n ko tian amun amuɛn'm bé su.

31N ´nunnun amun klɔ mun, m ´bubu amun sraka yiwlɛ lika sua mun. Ansans nga amun yra be man min'n amún tɛ nga amun yi-ɔ amun yrɛ i nnɛn'n, kannzɛ man be bɔn fannin sɛ, sanngɛ n su fa gua-man min anwlɛn su nzue kun.

32Amun mɛn'n i nunnunlɛ tɛ bɔ n ´nunnun i'n ti, ɔ ´yo amun kpɔfuɛ'm be koun.

33N ´fa alɛ n yi amún su, yɛ n ´yo man amun bo sanndi mɛn uflɛ'm be nun. N ´nunnun amun klɔ mun, m ´bo amun mɛn'n.

34I liɛ'n, afuɛ nga amun ´di i amun kpɔfuɛ'm be nvle'n nun lɔ'n, amun asiɛ'm be kusu be ´fa de wunmiɛn. Blɛ nga b'ɔ fata kɛ asiɛ sɔ'm be fa de wunmiɛn nun'n, bɔ amu'an di-man su'n, bɔ b'a yaci-man be lɛ man b'a de-man wunmiɛn'n, be ´fɛ i sɔ blɛ liɛ'n be ´de wunmiɛn ´sie i osu.

35Asiɛ'm be ´de wunmiɛn sie i laa blɛ liɛ'n i osu. Kɛ ɔ juli be wunmiɛn delɛ afuɛ'n, amu'an yaci-man be lɛ man b'a de-man wunmiɛn. I ti i sɔ blɛ liɛ'n, be ´fa de wunmiɛn sie i laa liɛ'n i osu.

36Amun nun be nga bɔ be ´nyan nguan amun kpɔfuɛ sɔ'm be nvle'n nun lɔ'n, akluntitiɛ yɛ n ´fa yi be su-ɔ. Nnya kee ngbɛn bɔ aunngban'n ´keje wɛkɛ sa'n, san be ´wanndi. Be ´wanndi kpa kɛ be nin sran yɛ bé su kun yɛ ɔ'a cuɛn tokofi wie bé wun sa. Sɛ sran fuan-man be bɔbɔ'n, sanngɛ be ´wanndi lele be ´tɔ sa gbuɔ.

37Be ´tu be ´si be wiengu kɛ be su wanndi be kwlafuɛ wie nyrun sa, i kusu wuun sran fi su-man bé su. Be su kwla jran-man be nga be nin be be kun'n be nyrun.

38I agualiɛ b'ɔ ´gua'n, yɛlɛ kɛ be ´wu nvle wie nun. Be ´wu be kwlafuɛ'm be mɛn'n nun lɔ.

39Amun nun be nga b'a wu-man lɔ'n, ´yo kokloo amun bɔbɔ ɔ nin amun nannan mun amún sa tɛ nga amun yoli'n ti.»

40«Sanngɛ i agualiɛ su'n, be nga b'a wu-man'n, be wa wun i wlɛ kɛ kannzu be bɔbɔ nin be nannan mun be yoli sa tɛ. Sa tɛ bɔ be yoli'n yɛlɛ kɛ be dili fɔ min lika, bé nyin ɔ'a yi-man min.

41Be ´wun sa ti bɔ n kacili mín sin n sili be'n, ɔ nin sa ti bɔ n kannin bé bo n ko guali be be kpɔfuɛ'm be nvle liɛ'n nun lɔ'n. Nyin kekle ajalɛ nga be tuli'n, be ´wun kɛ nɛ́n i-ɔ. Be ´koko be sa tɛ'n bɔ be yoli'n i ti, yɛ be sa tɛ sɔ'n i su sa'n, be ´kplin su kɛ be ´sua.

42Kɛ ɔ ko yo sɔ'n, kpɛkuun mín nyin wa kpɛn aenguɛ nga min nin amun nannan Zakɔb, nin Izaak, ɔ nin Abraam e trali'n su. Yɛ like nga n jrannin su kɛ n ´yo man amun mɛn'n, n wla ´kpɛn su ekun.

43I blɛ nga be fa ´tran lɔ'n, be mɛn liɛ nga be jasoli nun'n kusu ɔ ´fa de wunmiɛn. I sɔ blɛ liɛ nun'n, n ´kle be nyrɛnnɛn, afin min mmla nga n kleli be'n, be kacili bé sin be sili be, yɛ ndɛ nga n kan kleli be'n, b'a fa-man bé su.

44Sanngɛ kusu i blɛ nga be ´fa tran be kwlafuɛ'm be nvle liɛ nun lɔ'n, n su yi-man be ase mlɔnmlɔn, n su kaci-man mín sin n si-man be mlɔnmlɔn, n su nunnun be. Min aenguɛ bɔ e nin be ye tra'n, n su yi-mɛn i ase, afin min yɛ n ti Anannganman be Nyanmiɛn nin-ɔn.

45Aenguɛ bɔ e nin be nannan mun e trali'n, mín wla ɔ ´kpɛn su yɛ n ´de be. Be nannan mun'n, n fali be Ezipt mɛn'n nun m bali kɛ n ´yo be Nyanmiɛn. Nvle kun nga'm be wunnin nun. Min yɛ n ti Anannganman nin-ɔn.»

46Mmla nga Anannganman fa mannin Izraɛlfuɛ mun i ngba yɛ ɔ o lɛ-ɔ. Anannganman fɛli i sɔ ndɛ liɛ mun wlali Moiz nuan Sinai oka'n su lɔ. Yɛ Moiz kan be kleli Izraɛlfuɛ mun-ɔn.

← Chapter 25 Jump to: Chapter 27 →