Ruth 4

Baoule (NYANMIƐN NDƐ'N 1998)

← Chapter 3 Jump to:

1Bɔaz ɔli ko trannin klɔ'n i anuan'n nun lɛ kan be siesie ndɛ lɛ'n. Ɔ ´nian-an, Elimelɛk i aja difuɛ ng'ɔ kɛnnin i ndɛ'n yɛ ɔ ´sin yɛ, yɛ ɔ flɛli i-ɔ. I waan: «Bla a gua ase.» Yɛ ɔ ´ba ɔ wa tran ase-ɔ.

2Nan Bɔaz ɔ'a flɛ klɔ'n su kpɛnngbɛn'm be nun blu nan b'a tran ase.

3Yɛ ɔ fali ndɛ'n mannin bian'n kɛ: «Sa ti bɔ n flɛli wɔ'n yɛlɛ kɛ Elimelɛk i asiɛ'n, kɛ Naomi fin Moab bo'n nun lɔ bali'n, i waan ɔ ´yo i atɛ.

4I ti n waan n ´usa wɔ, sɛ a ko to-ɔ, kɛn i sran'm bɔ b'a yia yɛ'n, ɔ nin klɔ'n su kpɛnngbɛn'm be nyrun. Sɛ kusu a su kwlɛ-mɛn i to-ɔ, kan man n ti, afin Elimelɛk i aja difuɛ klikli'n yɛlɛ wɔ, yɛ n kusu yɛ n su ɔ su-ɔ.» Bian'n waan: «N tili, n ´tannin asiɛ'n kalɛ.»

5Bɔaz waan: «Sɛ a to fie'n Naomi sa nun'n, wuun Rit Moab talua'n b'ɔ ti angboti'n, ɔ ti ɔ liɛ. Jɛ i nan ba nga amun wu i'n, ɔ di i si Maklɔn b'ɔ wuli'n i aja.»

6Bian'n waan: «Sɛ ɔ ti sɔ-ɔ, wuun n to-mɛn i kun. Sɛ ɔ yo sɔ-ɔ, cɛn wie min asiɛ liɛ'n i lika nianlɛ'n ɔ wa yo kekle man min. Nan i ti jran min ajalɛ nun, n ´ko kwlɛ-mɛn i to.»

7Laa blɛ sɔ nun'n, Izraɛl nvle nun'n, sɛ sran ng'ɔ fata kɛ ɔ kpɔ sran kun ti nan ɔ yaci man sran uflɛ'n, ɔ yi i ja ngbabua'n man sran sɔ. I sɔ'n ti sa nzɔliɛ sielɛ.

8Ɔ man kɛ bian'n seli Bɔaz kɛ i bɔbɔ to'n, ɔ yili i ja ngbabua'n mɛnnin i.

9Yɛ Bɔaz seli kpɛnngbɛn mun nin sran nga be o lɛ'n be ngba kɛ: «M'an to Elimelɛk ɔ nin Kilzɔn, nin Maklɔn bé sa nun ninnge mun Naomi sa nun ndɛ amun kwlaa amun nyrun.

10Yɛ kusu m'an ja Maklɔn i yi Rit b'ɔ ti Moab bla'n kɛ ɔ ´yo nan Maklɔn ɔ'a nyan aja difuɛ nan i dunman'n ɔ'a nunnun-man i niaan ɔ nin i klɔfuɛ'm be afiɛn'n ti. I kusu n yoli sa sɔ'n amun nyrun.»

11Be kwlaa nga be o lɛ'n, nin kpɛnngbɛn'm be ngba be waan: «Ɛɛn! Ɔ yoli e nyrun. Anannganman man bla nga ɔ'a wlu wɔ awlo nun yɛ'n ɔ yo kɛ Rasɛl nin Lea bɔ be nnyɔn'n be takali Izraɛl nvle'n sa. Yo sran dan Efrata nvle'n nun man ɔ dunman'n fu Bɛtleɛm wa.

12Man Anannganman man a nin talua nga be wu ba kaka nan amun osu'n ´trɛ kɛ Zida nin Tamar bé wa yasua Perɛs liɛ'n sa.»

13Bɔaz jali Rit. Anannganman man ɔ nin i be wunnzɛli. Bla'n wuli ba yasua kun.

14Bla'm be seli Naomi kɛ: «Ee! Anannganman nin manmanlɛ fata! I yɛ ɔ'a man wɔ su nianfuɛ ndɛ yɛ. Man ba sɔ'n i dunman'n fu Izraɛl nvle'n nun.

15Ɔ wa wla wɔ fanngan. Sɛ a yo oke'n, i yɛ ɔ wa nian wɔ lika-a, afin ɔ sewi b'ɔ klo wɔ'n, bɔ ba yasua nso bɔbɔ nin i sɛ-man'n, i yɛ ɔ'a wu i ɔ'a man wɔ-ɔ.»

16Naomi fali ba'n tɛli i wue'n nun. Ba'n yoli i liɛ, i yɛ ɔ wa tɛli i-ɔ.

17Bla nga be nin be tran lɛ'n be waan: «Ee! Naomi ɔ'a nyɛn i wa kun.» Yɛ be tɔnnin i dunman kɛ Obɛd. Obɛd sɔ'n yɛ ɔ ti David i nannan nin-ɔn. I wa yɛlɛ David i si liɛ Izai.

18Perɛs wuli Ɛzrɔn. Ɛzrɔn wuli Ram.

19Ram wuli Aminadab. Aminadab wuli Naksɔn.

20Naksɔn wuli Salmɔn. Salmɔn wuli Bɔaz.

21Bɔaz wuli Obɛd.

22Obɛd wuli Izai, yɛ Izai wuli David.

← Chapter 3 Jump to: