Jonah 2

Belarusian Bokun

← Chapter 1 Jump to: Chapter 3 →

1І прыгатаваў ГОСПАД вялікую рыбу, каб праглынула Ёну, і быў Ёна ў нутры рыбы тры дні і тры ночы.

2І маліўся Ёна ГОСПАДУ, Богу свайму, з нутра рыбы,

3і сказаў: «Я клікаў да ГОСПАДА з нядолі маёй, і Ён адказаў мне; з нутра адхлані я загаласіў, і Ты пачуў голас мой.

4Ты кінуў мяне глыбока ў сэрца мораў, і вір акружыў мяне, усе плыні Твае і хвалі Твае прайшлі праз мяне.

5І я сказаў: “Я прагнаны ад вачэй Тваіх, як пагляджу яшчэ на сьвятую сьвятыню Тваю”.

6Нахлынулі воды на мяне аж да душы, глыбіня агарнула мяне навокал, марскія травы абвілі галаву маю.

7Да падвалінаў гор я зыйшоў, зямля сваімі заваламі замкнула мяне на вякі. Але Ты вывеў са зьнішчэньня жыцьцё маё, ГОСПАДЗЕ, Божа мой.

8Як млела душа мая ў-ва мне, я ўзгадаў ГОСПАДА, і малітва мая прыйшла да Цябе, да сьвятой сьвятыні Тваёй.

9Тыя, што захоўваюць манлівыя марнасьці, адкідаюць міласэрнасьць ад сябе.

10Але я з голасам падзякі прынясу ахвяру Табе, споўню, што абяцаў. Збаўленьне ў ГОСПАДА».

11І сказаў ГОСПАД рыбе, і яна выкінула Ёну на сухазем’е.

← Chapter 1 Jump to: Chapter 3 →