Ezekiel 48

Bemba

← Chapter 47 Jump to:

1Kabili Yawe alikonkenyepo ati, “Ishi e nko ukulingana na mashina yashiko. “Ku mupaka wa ku kapinda ka ku kuso ekuli nokuba icitungu cakwa Dani cimo. Cili nokutampila kuli bemba wa Meditelaneani, ukulola na ku musumba wa Hetiloni, ukupita na ku Lebo Hamati, ukulola na ku musumba wa Hasari Enani, ukuya shintafye na ku mupaka wa calo ca Damasiko, no wa calo ca Hamati, ekutila uwatula ku mupaka wa ku kabanga, ukuya shinta na mu mupaka uwabela ku masamba.

2“Uluko lwa bena Asheri luli nokuba ne citungu cimo ku kulyo lubali lwa ca bena Dani, icatula ku mupaka wa ku kabanga, ukuya shinta na mu mupaka uwabela ku masamba.

3“Uluko lwa bena Naftali luli nokuba ne citungu cimo ku kulyo lubali lwa ca bena Asheri, icatula ku mupaka wa ku kabanga, ukuya shinta na mu mupaka uwabela ku masamba.

4“Uluko lwa bena Manase luli nokuba ne citungu cimo ku kulyo lubali lwa ca bena Naftali, icatula ku mupaka wa ku kabanga, ukuya shinta na mu mupaka uwabela ku masamba.

5“Uluko lwa bena Efulemu luli nokuba ne citungu cimo ku kulyo lubali lwa ca bena Manase, icatula ku mupaka wa ku kabanga, ukuya shinta na mu mupaka uwabela ku masamba.

6“Uluko lwa bena Rubeni luli nokuba ne citungu cimo ku kulyo lubali lwa ca bena Efulemu, icatula ku mupaka wa ku kabanga, ukuya shinta na mu mupaka uwabela ku masamba.

7“Uluko lwa bena Yuda luli nokuba ne citungu cimo ku kulyo lubali lwa ca bena Rubeni, icatula ku mupaka wa ku kabanga, ukuya shinta na mu mupaka uwabela ku masamba.”

8“Elyo kuli nokuba ne citungu cimo ku kulyo lubali lwa ca bena Yuda, icatula ku mupaka wa ku kabanga ukuya shinta na mu mupaka uwabela ku masamba. Ici citungu muli nokumpatwila ine ne Lesa. Cili nokuba amakubiti amakana amakumi yabili na yasano (25,000), na mubutali ukutula ku mupaka wa ku kabanga ukuya shinta na mu mupaka uwabela ku masamba cili nokulingana ne fitungu ifyo inko shili nokupeelwa. Pakati nankati ka ico cine citungu epali nokukuulwa icifulo icamushilo icakwa Yawe.

9Icitungu ico muli nokupatwila Yawe, cili nokuba amakubiti amakana amakumi yabili na yasano (25,000) mubutali, mubufumo namo amakubiti amakana amakumi yabili (20,000).

10“Muli ico cine citungu icamushilo emukaba ne ncende imo iya bashimapepo. Ku kapinda ka ku kuso lubali na ka ku kulyo lubali, iyo ncende ili nokulepa amakubiti amakana amakumi yabili na yasano (25,000), elyo ku kabanga lubali na ku masamba ili nokufunguluka amakubiti amakana ikumi limo (10,000). Iŋanda yandi ine ne Yawe Lesa, yena ili nokubela lwa pakati nankati ka iyo ine ncende.

11Iyo ine ncende iyamushilo eili nokuba iya bashimapepo abalubwilwa ine, emukuti ni bamwana Sadoki abaume. Pantu bena balamombela bwino bwinofye, kabili bena tabacitileko ifyacitile abena Levi banabo, abakonkelele abena Israeli bambi mukulufyanya.

12Kanshi bamwana Sadoki bena bali nokukwata incende iyi nge cabupe icaibela, kwena ili nokupalamana ne ncende ya bena Levi bambi, kabili iyi ncende eikaba iyamushilo icine cine.

13“Ukukonka mu ncende ya citungu ca bashimapepo, abena Levi bakapeelwe incende iyikalepa amakubiti amakana amakumi yabili na yasano (25,000) mubutali, mubufumo namo amakubiti amakana ikumi limo (10,000). Conse pamo cili nokulela amakubiti amakana amakumi yabili na yasano (25,000) mubutali, na mubufumo amakubiti amakana ikumi limo (10,000).

14Icitungu icikapatwilwa ine ne Yawe ecili nokuwamishapo pali fimbi fyonse, kanshi incende shaciko teshakwesha kulashitisha, nangufye ukulashikabushamo cimo, nangufye ukulashipeelapo umuntu umo, pantu citungu camushilo, kabili umwine waciko nine ne Yawe.

15“Incende imbi iyikashalako, iyikaba mubufumo amakubiti amakana yasano (5,000) na mubutali namo amakubiti amakana amakumi yabili na yasano (25,000), yena yacintubwingi, kuti abantu balaibomfya umo balefwaila. Kuti balaikalamo no kulaibomfya. Umusumba wena uli nokubela lwa pakati nankati ka iyo ncende.

16Uyo musumba uli nokulingana ubukulu konse konse amakubiti amakana yane ne myanda isano (4,500) ku kuso na ku kulyo lubali, na ku kabanga na ku masamba lubali ukaba cimo cine.

17Elyo monse mu mbali ya musumba muli nokushalamo ulubansa ululi nokuba konse konse amakubiti imyanda yabili na makumi yasano (250) ku kuso na ku kulyo lubali, na ku kabanga na ku masamba lubali lukabe cimo cine.

18Incende lwa ku kabanga ishikalepa amakubiti amakana ikumi limo (10,000) na lwa ku masamba nako amakubiti amakana ikumi limo (10,000), ishikashalako ilyo umusumba ukakuulwa mu ncende iyikasuntikana ne ncende iyamushilo, shena esho abena musumba bakalalimamo ifyakulya.

19Onsefye uukalabomba ukufuma mu musumba, nangu abe wa mu luko nshi, ni muli isho shine ncende emo kuti alalimina ifyakulya.

20Icitungu conse ico mukampatwila ine ne Yawe Lesa, cili nokulingana monse monse amakubiti amakana amakumi yabili na yasano (25,000). Mukapatulako incende iyamushilo nge cabupe icaibela pamo pene ne ncende iya musumba.”

21“Ilyo mukapwa ukumpatwila icitungu camushilo no kupima apakukuulila umusumba muli ico cine citungu icikafungululuka amakubiti amakana amakumi yabili na yasano (25,000), impanga imbi yonse iyikashalako lubali lwa ku masamba ukuya shinta na kuli bemba, elyo ne ibiye iyikashalako lubali lwa ku kabanga ukuya shinta na ku mupaka wa uko kwine ku kabanga, isho mpanga eshikaba ifitungu ifyakwa kateeka. Incende iyamushilo, pamo pene ne ye Tempele fikaba pakati ka iyo ncende.

22Icitungu ca bena Levi kumo kwine no musumba, fyonse fili nokubela muli iyo ine mpanga ya ntungulushi lwa pakati nankati. Iyo ine mpanga yakwa kateeka ili nokubela pakati ka citungu ico abena Yuda bakapeelwa ku kapinda ka ku kuso, ne citungu ico abena Benjamini bakapeelwa ku kapinda ka ku kulyo.”

23“Ku kapinda ka ku kulyo aka iyo ine mpanga eko inko shimbi shonse shili nokupeelwa ifitungu. “Uluko lwa bena Benjamini luli nokuba ne citungu cimo icatula ku mupaka wa ku kabanga, ukuya shinta na mu mupaka uwabela ku masamba.

24“Uluko lwa bena Simeoni luli nokuba ne citungu cimo ku kulyo lubali lwa ca bena Benjamini, icatula ku mupaka wa ku kabanga, ukuya shinta na mu mupaka uwabela ku masamba.

25“Uluko lwa bena Isaka luli nokuba ne citungu cimo ku kulyo lubali lwa ca bena Simeoni, icatula ku mupaka wa ku kabanga, ukuya shinta na mu mupaka uwabela ku masamba.

26“Uluko lwa bena Sebuloni luli nokuba ne citungu cimo ku kulyo lubali lwa ca bena Isaka, icatula ku mupaka wa ku kabanga, ukuya shinta na mu mupaka uwabela ku masamba.

27“Uluko lwa bena Gadi luli nokuba ne citungu cimo ku kulyo lubali lwa ca bena Sebuloni, icatula ku mupaka wa ku kabanga, ukuya shinta na mu mupaka uwabela ku masamba.

28Ku kapinda ka ku kulyo lubali lwa citungu ca bena Gadi, umupaka uli nokutampila mu musumba wa Tama, no kulola ku kashiba ka menshi aka Meriba Kadeshi, elyo uko kwine ukalambate na kamana mainsa aka pa mupaka wa calo ca Egupto, no kuya shintafye na kuli bemba wa Meditelaneani.”

29Ifi efyasosa imfumu Yawe ukuti, “Efyo mwe nko sha bena Israeli muli nokwakana ifitungu fya calo ifyo muli nokulaikwatila, kabili efyakushila na bana benu.”

30Kabili Yawe alikonkenyepo ati, “Ukutampila lubali lwa ku kapinda ka ku kuso akalepa amakubiti amakana yane ne myanda isano (4,500), impongolo ishakufuminapo mu musumba shikenikwa amashina ya nko sha bena Israeli.

31“Impongolo shitatu ishabela ku kapinda ka ku kuso shikaitwa impongolo yakwa Rubeni, imbi impongolo yakwa Yuda, imbi nayo impongolo yakwa Levi.

32“Ku kapinda ka ku kabanga akalepele amakubiti amakana yane ne myanda isano (4,500) kukaba impongolo shitatu. Imo ikalaitwa impongolo yakwa Yosefu, imbi impongolo yakwa Benjamini, imbi nayo impongolo yakwa Dani.

33“Ku kapinda ka ku kulyo akalepele amakubiti amakana yane ne myanda isano (4,500) kukaba impongolo shitatu. Imo ikalaitwa impongolo yakwa Simeoni, imbi impongolo yakwa Isaka, imbi nayo impongolo yakwa Sebuloni.

34“Elyo ku kapinda ka ku masamba akalepele amakubiti amakana yane ne myanda isano (4,500) kukaba impongolo shitatu. Imo ikalaitwa impongolo yakwa Gadi, imbi ikalaitwa impongolo yakwa Asheri, imbi nayo impongolo yakwa Naftali.

35“Ubutali ubwakushinguluka umusumba bukaba amakubiti amakana ikumi limo na cine konse konse (18,000). Ukutampa ilyo line, umusumba bakalawita abati, ‘Yawe emo aba.’”

← Chapter 47 Jump to: