Acts 27

Edo ((E Baibol Ẹdo) Version 1996)

← Chapter 26 Jump to: Chapter 28 →

1Ugbẹn vbe a ghi tae nẹ ne ima la okọ gha rrie Itali, iran keghi rhie Pọl deba avbe oleghan eso ne Juliọs ne ovbiyokuo e Rom ọkpa ne ọ rre asẹ vbe oka ọkpa ne a tie ẹre “Ọka e Nọgbaisi.”

2Ma keghi la okọ vbe Adramitiọm, okọ keghi ra kpao gha rrie eghute otọe Esia ne ọ ke evba gua kpao. Aristakọs ne ovbi e Masidonia ọkpa ne ọ ke Tẹsalonaika rre, keghi deba ima.

3Ẹdẹ ne ọ lele ẹe, ma keghi sẹ Saidọn. Juliọs keghi tohan Pọl, ọ na giee ya miẹn avbe esiọ re, ne iran miẹn ehe na we ehe ye ọre ẹkpo.

4Evba ma keghi kpao, a ghi miẹn ighẹ odẹ ehe ne ima rrie ọre ẹhoho ke hoho rre, ma keghi gua okọ la asefẹn ne ọ mwẹ irhu ọghe Saiprọs ne ẹvbo ne ẹzẹ lẹga.

5Ma keghi gberra Sisilia kevbe Pamfilia, ma keghi fian okun rra a keghi do sẹ Maira ne ọ rre Lisia.

6Evba ọre ne ọ rre asẹ na miẹn okọ ne ọ khian gua gha rrie Itali, ọ na rhunmwuda ọnii viọ ima la rọ.

7Ma keghi ya ikpẹdẹ ni bun gua okọ vbe ne a i na tua okhian, ọ ghi ba so ima buan nẹ, ma keghi do sẹ iyeke ẹvbo Knidọs. Ẹhoho ma ghi gie ima la obọ ni gua gberra evba, ma na rhunmwuda ọnii gua okọ ghe ototọ la asefẹn ne ọ mwẹ irhu ọghe Kret ne ẹvbo ne ẹzẹ lẹga, a na ya la ọkpẹn Salmone ẹvbo ne ọ rre ehe ne otọ na biẹ la okun.

8Ma keghi kakabọ sikẹ ọkpẹn oke sẹ ihe ọkpa ne iran tie ẹre Eghute Ẹbefo ne ọ ma re gbe vbe ẹvbo ne a tie ẹre Lasea.

9Ma keghi mobọ kpẹe vbe evba a keghi do miẹn wẹ ẹbe rrọọ deghẹ a wẹ ne a ye gha gua okọ khian, rhunmwuda, ẹghẹ ne a kha na, Ẹdẹ Amiẹn Ayabọ gberra nẹ. Pọl keghi rhunmwuda ọnii bu iran ude vbe nian wẹẹ:

10“Iho mwa, mẹ miẹn ọẹn nẹ wẹẹ ẹzẹ ne ima ra gua ke emwa na kpao, ẹbe wa rrọọ ẹsẹse, obọ urhiamwẹ gha da emwi ni rre okọ ke okọ, emwa eso gha vbe la ẹe rrie.”

11Sokpan, ẹmwẹ ne ọka oziguẹ kevbe ne ọ yan okọ tae ọre ọ la ọkaokuo ne ọ rre asẹ ehọ sẹ ne Pọl tae.

12Eghute nii i vbe re ne ọ gie dia vbe ẹghẹ okhuakhua, rhunmwuda ọnii obọ nọbun sẹ vbe emwa ni rre okọ nii keghi ho ne a mu okọ la ẹzẹ, a deghẹ ọ gie a ru ne a sẹ Fonis, ọ keghi re eghute ne ọ mu aro da odẹ ekẹn, iran sẹtin gbe ẹghẹ okhuakhua vbe evba.

13Ẹhoho ne wẹlẹẹ kegha hoho ke odẹ ekẹn rre, emwa ni keghi te ro ighẹ iran gha sẹtin ru vbene iran khare, iran keghi rhunmwuda ọnii rhan okọ vbe irri, iran na hẹko gha gua okọ lele ọkpẹn oke ẹvbo ne a tie ẹre Kret khian.

14Sokpan vbe ọ ma ghi kpẹe, okpẹhoho ọkpa ne iran tie ẹre. “A ta ahọ” keghi wa hihiẹ ke otọe ne amẹ lẹga ni re.

15Ọ keghi dekun okọ, ma ghi miẹn wẹ ẹ i ra gie a ru ne a mu okọ uhunmwu da odẹ ehe ne ẹhoho ke hoho rre, ma na rhie obọ hin ne ẹhoho gha mu ẹn khian.

16Ma keghi vbe miẹn ehe ọkpa lẹre yi vbe a gberra ghe odẹ ekẹn Klọuda ne ẹvbo ne ẹzẹ lẹga. A ghi zẹ ru egbe vbe evba, ma ke sẹtin ru ẹe ne ọwa ne a bọ ye okọ ni de hẹnhẹn.

17Iran keghi siẹe la okọ, iran ke ye irri eso de okọ ni lẹga gbain. Afianma kegha fian iran ne iran ghẹ ya dunmwu vbe uzekhae oke ẹzẹ ne ọ rre vbe a gberra Libya. Iran keghi rhan ukpọn nọ yevbe ifuẹn okọ, ne ẹhoho miẹn ehe na gha mu okọ khian.

18Okpẹhoho nii keghi wa ye gha hoho, ọre ọ ghi na sẹ ikpẹdẹ ne ọ lele ẹe, iran na suẹn gha silo emwi ni re okọ ku ẹzẹ.

19Vbe ẹdẹ ne ọ ghi vbe lele ẹe, iran na tobọ iran gha ye obọ iran filo emwi eso vbe ne a ya bọ okọ ku ẹzẹ.

20Vbe ikpẹdẹ ni bun, ma ma bẹghe owẹn ra avbe orhọnmwẹ, ẹhoho keghi wa ye kakabọ gha hoho, ọ ghi zẹ kpẹe, ma keghi wa rhie aro hin rre wẹ a gha ye miẹn uhunmwu.

21Ọ ghi zẹ kpẹe vbe ne emwa ni ma na rri evbare, e Pọl keghi mudia vbe odaro iran, ọ wẹẹ, “Iho mwa, te uwa gha te danmwehọ mwẹ ne a ghẹ gua okọ kpao vbe Kret, ma i ghẹ miẹn ọrẹnkhuan kevbe omurhia na.

22Sokpan vbene ọ ghi ye na nian, wa lahọ wa rhie ẹtin ye iwu! Ọkpa ne ọ ra ye uhunmwu yọ ẹ i rrọọ vbe uwu uwa, okọ ọkpa ne ọ ra la ọrhiae rrie.

23Rhunmwuda vbe ne asọn, odibo Osanobua ne imẹ re ọghọe kevbe ne imẹ ga keghi bu mwẹ rre, ọ wẹẹ,

24‘Ghẹ mu ohan Pọl, te u gha mudia vbe odaro e Nọgbaisi, deba ẹre, Osanobua ne ọ maa, vbe ya orhiọn iran ne uwa gba gua khian ru uwẹ ẹse nẹ!’

25Rhunmwuda ọnii, iho mwa, wa rhie orhiọn ye iwu! Rhunmwuda mẹ mu ẹtin yan Osanobua wẹ vbene ọ khare ọre ọ khian gha ye.

26Sokpan a gha kpolo ima ku oke vbe otọ ne amẹ lẹga ọkpa.”

27Asọn ne ogie iwenẹ ghi nọ, ẹhoho kegha kpolo ima khian vbe uwu okun ne a tie ẹre Meditẹrrenian. Ọ ghi bu ogiasọn, avbe oziguẹ keghi mu idan dan wẹ ma sikẹ oke,

28Iran keghi de emwi ye irri ya mwa odin, iran keghi miẹn wẹ omwa ibata iyehan nọ vbe udinmwimwẹ, ọ ghi vbe kpẹe kherhe iran keghi dọlegbe mwa rẹn, iran keghi miẹn wẹ omwa ibata ekigbesẹ iyisẹn ghi nọ.

29Afianma kegha fian iran wẹ okọ ima gha ya dekun okuta nọkhua, iran na rhunmwuda ọnii viọ adẹn ematọn ne a ya mu okọ mudia vbe odin amẹ enẹ ku ẹzẹ vbe uhe okọ, iran na gha na erhunmwu ne ẹdẹ ghi kue gbe.

30Avbe oziguẹ te ra lẹ kua vbe okọ, iran keghi viọ ivbi okọ ku amẹ, iran keghi ba wẹ te iran ra ya viọ adẹn eso ku ẹzẹ vbe ukpẹ okọ.

31Sokpan Pọl keghi tama ọkaokuo ne ọ rre asẹ ni kevbe avbe ivbiyokuo wẹẹ, “Adeghẹ avbe oziguẹ na ma mudia vbe okọ, wa i miẹn uhunmwu.”

32Rhunmwuda ọnii, avbe ivbiyokuo keghi giagia irri ne a ya de okọ nekherhe ni, iran na giee lẹ gha rrie.

33Ọ ghi bu ne ẹdẹ ra ya gbe, e Pọl keghi rinmwian emwa nii hia ne iran rri evbare wẹ, “Ke ikpẹdẹ iwenẹ gha dee wa kegha khẹ odẹ, wa ma vbe rri emwi rhọkpa.

34Wa lahọ, wa rri evbare ne uwa miẹn ehe na miẹn uhunmwu. Uhin ukpeto ọkpa i ra wi vbe uhunmwu uwa.”

35Ugbẹn vbe ọ ghi ta vberriọ nẹ, Pọl keghi rhie ebrẹd, ọ keghi sirra iran kpọnmwẹ Osanobua, ọ na fiaẹn, ọ na gha re.

36Ẹtin keghi la iran iwu, dọmwadẹ ọghọe vbe uwu iran keghi vbe rri evbare.

37Ma hia ni re okọ keghi re enẹ irrọvbe iyenẹ ọ ya yan uri (276).

38Agbọn hia ghi re ne ẹko vuọn nẹ, iran keghi silo ọka eso ku ẹzẹ ne okọ miẹn ehe na ho gha.

39Ẹdẹ ghi gbe, avbe oziguẹ ma rẹn eghute ne ọ khin, sokpan iran na bẹghe ehe ne amẹ ha la otọ ne ọ vbe mwẹ ikpogho, iran na ghi wẹ de ghẹ ẹtin sẹ ọe, ne iran gie okọ ya ziẹn ye evba.

40Iran keghi rhunmwuda ọnii giagia adẹn ne iran ya mu okọ mudia ye uwu odin, iran sẹ iran rae ye uwu amẹ. Iran keghi vbe giagia irri ne a ya gbalọ obele mu okọ. Iran tọn ukpọn ne ẹhoho ya mu okọ khian mu vbe odaro ẹre, ne ẹhoho miẹn ehe na bi okọ ghe odaro gha rrie oke.

41Sokpan, okọ keghi dekun uzekhae, ọ na ziẹn, odaro ẹre ke wa kpe ro, ọ ma ghi gberra evba, sokpan ogbigbi amẹ ne ẹhoho bi, kegha yanghan uhe okọ kua.

42Avbe ivbiyokuo na wẹ ne iran gbele avbe oleghan hia a ne iran ghẹ lẹ kua.

43Sokpan ovbiyokuo ne ọ rre asẹ nii keghi ho ne irẹn sinmwi uhunmwu e Pọl, rhunmwuda ọnii, ọ ma gie iran ruẹe vberriọ. Ọ na ghi wẹ ne iran ni gua ra khuẹ vbọ sannọ fi ẹzẹ ne iran ka khuẹ gha rrie oke.

44Iran nekpa ghi sikan mu ekpatako ra oyọnmwẹ okọ ne ọ yannọ kua lele iran. Erriọ a ghi ru ẹe ne ima hia na miẹn uhunmwu ya sẹ oke.

← Chapter 26 Jump to: Chapter 28 →