Acts 28

Edo ((E Baibol Ẹdo) Version 1996)

← Chapter 27 Jump to:

1Ma hia ghi dinna oke nẹ hẹnẹdẹn, ọ keghi vẹ ne ima rẹn ighẹ Malta ọre a tie ne ne ẹvbo ne ẹzẹ lẹga.

2Emwa ni rre ẹvbo nii keghi wa ya obọ esi mu ima. Rhunmwuda ne amẹ na gha rhọ nii, oni kegha fi, iran keghi koko erhẹn ya gbe ọbokhian ne ima.

3Pọl kegha silo ikun erhan, ehe ne ọ na hẹ ọre ye erhẹn ni, owowo ẹre keghi khu ẹyẹn ladian ke uwu ẹre rre, ọ na sikan mu ẹre obọ.

4Emwa ẹvbo ni ghi miẹn vbe ẹyẹn nii sikan mu Pọl obọ, iran na gha kha wẹẹ, “Ọ gha kẹe izigha oko na wa khin, egbe ne ọ ya miẹn uhunmwu rhie ladian vbe ẹzẹ na. Ẹrinmwi ma ye faẹn.”

5Sokpan, Pọl keghi sanmwẹ ẹyẹn ni fi uwu erhẹn vbe ne ọ ma na ru ẹre emwi hiehie.

6Iran kegha ghe ẹre wẹ ẹ i ghi rre ọ hinmwiaẹn ra ne ọ de fianmwẹ otọ ne ọ wu. Iran ghi zẹ khẹ vbe ne emwi rhọkpa ne ọsughe ma na sunu vbe egbe ẹre, iran keghi fi unu werriẹ wẹ, “Ẹrinmwi oko na khin!”

7Otọe okpia ọkpa ne a tie eni ẹnrẹn Publiọs keghi sikẹ evba, rẹn ọre ọ vbe re enogie ẹvbo ni. Rẹn keghi wa miẹn ima yi, ma na gbe ikpẹdẹ eha vbe owa ẹre.

8Erha Publiọs keghi lovbiẹ, egbe ma rran rẹn, ọ keghi họn ẹmwẹ emwirraro kevbe ezẹginzẹgin. Pọl keghi la ughugha ẹre, ọ na erhunmwu, ọ keghi viọ obọ yan rẹn, ọ na mu ẹre egbe rran.

9Ọna ghi sunu nẹ avbe ọkhọnmwọ ni rre ẹvbo ne ẹzẹ lẹga nii keghi gha dee a keghi mu ehia egbe rran.

10Iran keghi ya emwi ni bun ha oko gie ima. Ma ghi la okọ, iran keghi viọ emwi ne ọ gha sẹ ima lo vbe okhian ẹzẹ ni ye ima okọ.

11A ghi tie ẹre uki eha ghi nọ, ma keghi la okọ ọkpa ne iran tie eni ẹnrẹn, “Ẹbọ Ne Agbeva” ne ọ ke Alẹkzandria rre do gbe ẹghẹ okhuakhua vbe ẹvbo ne amẹ lẹga na.

12Ma keghi do sẹ ẹvbo ne iran tie ẹre Sirakus, ma keghi gbe ikpẹdẹ eha vbe evba.

13Ma keghi ke evba gua okọ kpao, ma keghi do sẹ ẹvbo ne a tie ẹre Rhigiọm. Vbe ikpẹdẹ ne ọ lele ẹe, ẹhoho kegha hoho ke odẹ ekẹn rre, vbe uwu ikpẹdẹ eva, ma na do sẹ ẹvbo ne a tie ẹre Puteoli.

14Ma keghi miẹn ivbi iyayi eso vbe evba, iran na wẹ ne ima gu iran gbe uzọla ọkpa. Iyeke ọnii ma ke do sẹ e Rom.

15Etẹn ni rre Rom ghi họn ẹmwẹ ima, iran keghi khian bu ima. Ugbẹn vbe Pọl ghi miẹn iran, ọ na kpọnmwẹ Osanobua, orhiọn keghi la ẹre iwu.

16Ma ghi sẹ Rom, iran keghi sẹ Pọl rae ne ọ tobọ ẹre tota ye ihọkpa, iran rhie ovbiyokuo ọkpa wẹ ne ọ gha rhie aro lele ẹe.

17Vbe ikpẹdẹ ne ogieha, e Pọl keghi tie iko avbe olotu e Ju ni rre ẹvbo ni. Iran ghi si koko nẹ, ọ tama iran wẹẹ, “Etẹn mwẹ: Jerusalẹm ọre a na mu mwẹ zẹ vbe oleghan, a na rhie mwẹ ne emwa Rom, vbe ne ma na ru abaku ru ghe ọmwaikọmwa ra iyi avbe erha mwa odede.

18Iran keghi nọ mwẹ ọta, iran te ra fanmwẹ fua rhunmwuda iran miẹn wẹ emwi ne I ru ne a gha gbe mwẹ uan yi ẹ i rrọọ.

19Sokpan ugbẹn vbe avbe Ju ma ghi kue vberriọ, I ma ghi miẹn odẹ ọvbehe la vbọ gberra ne I tọn ẹzọ mwẹ mu gha rrie ọghe Nọgbaisi, a gha rhe miẹn wẹ I i mwẹ ẹzọ ne i ra gu emwa mwẹ gui.

20Ọnii ọ siẹe ne I na wẹ I ho ne I miẹn uwa ne I vbe gu uwa guan, rhunmwuda wẹ, rhunmwuda omwa ne Izrẹl la ekpa re mwẹ idaehọ, ọre a na guọ eghan na yọ mwẹ obọ.”

21Iran wanniẹn tama rẹn wẹẹ, “Iran ma he gbẹn ebe ke Judia gie ima vbe ekpa ruẹ.

22Sokpan ma gha ho ne ima vbe họn vbe ne ọ ye hẹ vbe ekhọe uwẹ, rhunmwuda ma rẹnrẹn wẹ, a i miẹn ehe ne a na ta ẹmwẹ ọnrẹn ẹse ighẹ otu ne u khare ighẹ uwẹ ye na.”

23Rhunmwuda ọnii, iran keghi bu ẹdẹ ne Pọl. Emwa ni bun sẹ ọnii ẹsẹse keghi rrie ehe ne Pọl dia ẹdẹ nẹdẹrriọ ke owiẹ ya sẹ asọn, ọ keghi rhan otọ ẹre ma iran, ọ kegha ta ẹmwẹ Arriọba Osanobua ma iran. Ọ keghi te gha ho ne ọ fi iran ekhọe werriẹ ghe ẹmwẹ Jesu vbekpa ne ọ na gha tie ebe Uhi Mosis kevbe emwi ne avbe akhasẹ gbẹnnẹ ye otọ ma iran.

24Ẹmwẹ ọnrẹn keghi fi eso ekhọe werriẹ sokpan nekpa ma yayi.

25Ẹmwẹ iran ma ghi gu egbe ro, sokpan vbe iran ghi te kpao, Pọl keghi ta ẹmwẹ ọkpa na ma iran wẹẹ, “Ẹmwata ọre ẹmwẹ ne Orhiọn Ne Ọ Huanrẹn la unu akhasẹ Aizaia tama avbe erha uwa odede wa khin wẹẹ,

26“ ‘Gha khian, ya tama iran na: Wa gha gbe ehọ ke otọ danmwehọ sokpan wa i ra rẹn otọ ẹmwẹ nii, wa gha rhan aro gha ghe ẹre sokpan wa i ra dẹghe ẹre.

27Rhunmwuda ekhọe iran i rẹn emwi, iran vbe kan igban khiọ ehọ, iran na mimi aro gbua, ne aro iran ghẹ ya dẹ ghe, ne ehọ iran ghẹ ya họn, ne Ọ ghẹ ya la iran ekhọe, iran ghi do fiwerriẹ bu mwẹ gha dee mẹ ghi do mu iran egbe rran. Erriọ Osanobua khare.’ ”

28E Pọl keghi rhie tẹe wẹẹ: “Wa ghi rẹn nian wẹ a rhie ẹmwẹ imiẹnfan Osanobua bu iran ne ẹ i re Ju gha khian, iran gha miẹn họn.” [

29Pọl ghi ta ẹmwẹ na nẹ, avbe Ju keghi kpao vbe ne iran na vannọ okan ya gu egbe muan ẹmwẹ.]

30E Pọl keghi gbe ukpo eva vbe owa ne ọ vbu dia gha ha osa yi, ọ na miẹn emwa hia ni do tuẹ ọe yi.

31Ọ kegha kpe orhu ẹmwẹ Arriọba Osanobua, ọ na gha ma emwa emwi vbekpa Nọyaẹnmwa Jesu Kristi, ọ kegha ye unu hia ta ẹe vbe ne a i na mwẹ khian se evba.

← Chapter 27 Jump to: