Ecclesiastes 1

Edo ((E Baibol Ẹdo) Version 1996)

Jump to: Chapter 2 →

1Avbe ẹmwẹ ne ọ tae ena khin ighẹ Asan-ibo ne ovbi e Devid ne ọ rriọba vbe Jerusalẹm.

2Ẹ i mwẹ esa, ẹ i mwẹ esa, erriọ ọre Asan-ibo khare. Agbọn na i mwẹ esa, ẹ i zẹdẹ mwẹ esa hiehiere.

3Ọmwa ghi ya ẹdẹ agbọn rẹn hia winna, ọ ghi gha miẹn ẹsọn, sokpan, de ere ne ọ ghi miẹn vbọ?

4Orre okpa gha rre, ọ ghi vbe rhie gberra, sokpan vbene agbọn ye ọ re ọ ye.

5Ovẹn ye vbe yan rre, ọ ghi ye vbe defua. Ọ ghi khian viọrọ viọrọ gha rrie ehe ne ọ ra na vbe dọlegbe suẹn.

6Ẹhoho gha hoho ghe ekẹn, ọ ghi hoho ghe okuọ, ọ gha ghi lẹga yo lẹga rre, ọ ghi dọlegbe gha dee.

7Okun ọ re ẹzẹ hia lẹ yo, sokpan nene okun nii, ẹ i vuọn. Te amẹ nii werriegbe gha rrie ehe ne ẹzẹ nii na suẹn, ọ ghi vbe dọlegbe suẹn okhian.

8Te emwi hia wa ya egbe wọ ọmwa, egbe wọmwẹ ne ẹ i gia gie. Ẹko emwi ne a bẹghe i vuọn aro, ra ne ehọ kha ighe ne irẹn he họn sẹe.

9Emwi ne ọ sunu ẹghẹ ne ọ gberra, ọ re ọ ye sunu na, emwi ọgbọn okpa i rre agbọn na.

10Iran ghi gha kha wẹẹ, “Wa do ghe emwi ọgbọn ọkpa!” Ohoghe nọ, ọ ka sunu de yi, ẹghẹ ne ọ kpee fua ẹsẹse a ke do biẹlẹ ima.

11A i miẹn ọmwa ne ọ ye emwi ne ọ sunu ẹghẹ ne ọ gberra ẹghẹ nẹdẹ rre, debare, a i vbe miẹn ọmwa ne ọ gha ye emwi ne ọ sunu ke ẹghẹ na, ya sẹ ẹghẹ nii rre vbe ẹghẹ ne ọ dee.

12Mẹ ne Asan-ibo keghi rriọba yan Izrẹl vbe Jerusalẹm.

13I keghi wa yan tae, I keghi vbe mu aro yọ wẹ, I gha gualotọ emwi hia ne a ru vbe agbọn na. Agbọn usẹ ọ re Osanobua mwamwa ne ima.

14Aro mwẹ sẹ emwi hia ne a ru vbe agbọn na nẹ, ne I wa tama ruẹn nian wẹ erhọkpa i mwẹ esa. Te ọ yevbe ne a khu ẹhoho khin.

15U i sẹtin dia emwi ne ọ gọ nẹ, u i sẹtin ka emwi ne ẹ i rre evba.

16I keghi tama egbe mwẹ wẹẹ, “I khian okpọmwa nẹ, I vbe mwẹ ẹwaẹn sẹ ọmwaikọmwa ne ọ he ka rriọba khẹ mwẹ vbe Jerusalẹm. I rẹn emwi ne ẹwaẹn kevbe irẹnmwi wa khian.”

17I keghi vbe kha wẹ, I gha ruẹ alughaẹn ne egbe ne ọ rre irẹnmwi kevbe ukọnmwẹ, aro ne ọ hianrẹn kevbe emwẹmwẹ. Sokpan, I keghi miẹn wẹ te ọ yevbe ne ọmwa khu ẹhoho khian.

18Vbene u ya mwẹ ẹwaẹn, erriọ ọ re u vbe ya kpokpo orhiọn ruẹn, vbe ne u ya rẹn, erriọ ọ re ọ vbe ya balọ ọmwa.

Jump to: Chapter 2 →