Ecclesiastes 3

Edo ((E Baibol Ẹdo) Version 1996)

← Chapter 2 Jump to: Chapter 4 →

1Emwi hia ni sunu vbe agbọn na, ẹghẹ ne Osanobua mwamwa ẹn yi ọ re ọ ya sunu.

2Ọ rhie ẹghẹ yọ ne a ya biẹ ọmwa, ọ rhie ẹghẹ yọ ne a ya wu, ọ rhie ẹghẹ yọ ne a ya kọ, ọ rhie ẹghẹ yọ ne a ya vulo,

3ọ rhie ẹghẹ yọ ne a ya gbe ua, ọ rhie ẹghẹ yọ ne a ya sinmwi, ọ rhie ẹghẹ yọ ne a ya siẹn emwi sotọ, ọ rhie ẹghẹ yọ ne a ya bọ ẹe, ọ rhie ẹghẹ yọ ne ẹko ya rriara, ọ rhie ẹghẹ yọ ne ẹko ya rhiẹnrhiẹn,

4ọ rhie ẹghẹ yọ ne a ya ru akhiẹ, ọ rhie ẹghẹ yọ ne a ya ku,

5ọ rhie ẹghẹ yọ ne a ya ku iku ọdọ vbe amwẹ, ọ rhie ẹghẹ yọ ne a ya ye unu soso egbe unu, ọ rhie ẹghẹ yọ ne a i ya ye unu soso egbe unu,

6ọ rhie ẹghẹ yọ ne a ya mu fua, ọ rhie ẹghẹ yọ ne a ya miẹn rhie, ọ rhie ẹghẹ yọ ne a ya si koko, ọ rhie ẹghẹ yọ ne a ya zagha kua,

7ọ rhie ẹghẹ yọ ne a ya yanghan emwi, ọ rhie ẹghẹ yọ ne a ya dọlọ emwi, ọ rhie ẹghẹ yọ ne a ya hunwan, ọ rhie ẹghẹ yọ ne a ya guan,

8ọ rhie ẹghẹ yọ ne a ya ho ẹmwẹ ọmwa, ọ rhie ẹghẹ yọ ne a ya khuiwu ọmwa, ọ rhie ẹghẹ yọ ne ya khọn okuo, ọ rhie ẹghẹ yọ ne a ya rre ọfumwegbe.

9De ere ne a miẹn vbe ẹsọn ne a miẹn hia yi?

10I rẹn ihẹ ẹrẹkhẹrẹ ne Osanobua kun ne ọmwa.

11Rẹn mwamwa ẹghẹ ne emwi hia kei yi ye otọ nẹ. Ọ vbe rhie ne ima ne a gha ho ne a rẹn vbene ẹdẹ nakhuẹ ra gha ye hẹ, sokpan, ọ ma gie ẹko ẹre vuọn ima wẹ ma rẹn otọ emwi ne ọ ru ẹsẹse.

12Rhunmwuda ọnii, I keghi miẹn emwi ne ima gha sẹtin ru ma gberra wẹ, ne ima gha sẹ ọyẹnmwẹ, ne a vbe ru vbene ẹtin mwa sẹe vbe a he rre agbọn na.

13Te ọ kere ne ima hia gha re, ne a gha da, ne a vbe ya emwi ne ima miẹn ẹsọn yi gha zọmọ. Emwi ne Osanobua ya ru ọmwa ẹse nọ.

14Mẹ rẹnrẹn wẹ emwi ne Osanobua ru hia, etẹbitẹ nọ. Wẹ i sẹtin fian te ẹe ra ne u fian hin. Ọkpa vbe emwi ne Osanobua ru ọrọre ne ima gha ya ọghọ ne ẹẹn.

15Emwi ne ọ sunu nian ra ne ọ gha sẹtin sunu, ka vbe sunu de yi. Te Osanobua ru ẹe ne emwi okpa gha dọlegbe sunu yan egbe yan egbe.

16Deba ena hia, I keghi vbe miẹn uyimwẹ ika vbe ehe ne ọ te kei ne a ta ẹmwata kevbe emwi ne ọgbae gha ye.

17I keghi tama egbe mwẹ wẹẹ, “Osanobua gha ye obọ okpa nii bu ohiẹn emwa esi kevbe emwa dan rhunmwuda, ẹghẹ ne a rhie yọ ọ re emwi hia kevbe uyinmwẹ hia gha ya sunu.”

18Ọ re I na ghi wa tae wẹ te Osanobua danmwẹ ima ghe ne ọ ya rhie ma ima ighe ma ma maa sẹ avbe aranmwẹ.

19Agbọn hia rẹnrẹn ighe emwi okpa ọ re ọ ra rruan ọmwa kevbe aranmwẹ. Vbene okpa wu ọ re nọkpa vbe wu. Emwi ne a yi okpa ọ re iran eveva khin. Ọmwa nagbọn ma maa sẹ aranmwẹ rhunmwuda, agbọn na i mwẹ esa ne ọ ye ne erhọkpa.

20Ihọkpa ọ re iran eveva rrie, onii ọ re ekẹn. Evba ọ re iran eveva ke rre, emwi ọkpa iran eveva ra vbe lao.

21De ọmwa ne ọ gha sẹtin tae rhuan yi wẹ te orhiọn ọmwa nagbọn la ghe odukhunmwu vbene ọghe aranmwẹ na la ghe otọ gha rrie uwu otọ?

22Rhunmwuda ọnii, I keghi do miẹn wẹ emwi ne ọ maa sẹẹ ne ima gha sẹtin ru ọrọre ne a lo emwi ne ima miẹn ẹsọn yi ya gha zọmọ. Emwi ọvbehe ne ima gha sẹtin ru ighi rrọọ. Odẹ okpa i rrọọ ne ima gha la rẹn emwi ne ọ ra sunu vbe ima a wu nẹ.

← Chapter 2 Jump to: Chapter 4 →