John 11 — Edo ((E Baibol Ẹdo) Version 1996)

4Ugbẹn vbe Jesu ghi họn, ọ wẹẹ, “Emianmwẹ na i ra gbe Lazarọs, sokpan te ọna sunu ne a ya ẹe rhie uyi ne Osanobua, kevbe ne a vbe la ekpa ẹre rho Ovbi Osanobua vbe uyi.”

5Jesu ho ẹmwẹ Mata kevbe ọtiọnrẹn ne okhuo kevbe Lazarọs.

6Ugbẹn vbe Jesu họn nẹ ighe egbe ma rran Lazarọs, ọ keghi gbe ikpẹdẹ eva vbe ehe ne ọ gha ye.

7Ọ keghi tama avbe erhuanegbe ẹre wẹẹ, “Wa gie ima dọlegbe gha rhie Judia.”

8Avbe erhuanegbe ẹre wanniẹn wẹẹ, “Ọmamwaemwi. omwa enẹdẹso na ọre avbe Ju te ra filo okuta gbe uẹ ua, u vbe dọlegbe rrie odọọ?”

9Jesu wanniẹn wẹẹ, “Ẹgogo iweva ọre ọ rre avan ọkpa. Rhunmwuda ọmwa ne ọ khian vbe ẹghẹ avan ẹ i ra rrua owẹ, rhunmwuda ọ bẹghe uwanmwẹ agbọn na.

10Sokpan, ọ gha khian vbe asọn, ọ gha rrua owẹ, rhunmwuda uwanmwẹ i rre uwu irẹn.”

11Jesu ghi ta ẹmwẹ na nẹ, ọ keghi rrie te ẹe wẹẹ, “Lazarọs ne ọse ima vbiẹ, sokpan I gha yo ya huẹn ọnrẹn.”

12Avbe erhuanegbe ẹre keghi wanniẹn wẹẹ, “Nọyaẹnmwa, a deghẹ te ọ vbiẹ, egbe gha rran rẹn.”

13Sokpan emwi ne Jesu yae kha ọrọre wẹ Lazarọs wu, iran te ro ighe ovbe ne ovbe ọre ọ kha.

14Rhunmwuda ọnii, Jesu keghi wa gbe ẹre ẹho ua ma iran wẹẹ, “Lazarọs wu!

15Ọ wa ma ne I i na rre evba rhunmwuda uwa, ne uwa miẹn ehe na yayi. Wa gie a bu ẹre gha khian.”

16Tọmọs (ne Ivin Eva) ke tama avbe erhuanegbe ne ihua ẹre wẹẹ, “Wa gie ima hia lele Ọmamwaemwi gha khian ne a ya wu lele ẹe!”

17Jesu ghi sẹ evba, ọ keghi miẹn wẹ nẹghẹdẹnẹ ọre iran ghi ree Lazarọs.

18Ke Bẹtani gha rrie Jerusalẹm ma sẹ Ibiriki eva fo.

19Avbe Ju ni bun keghi bu Mata kevbe Meri rre ne iran do fu iran ẹko rre rhunmwuda ne ọtẹn iran na wu.

20Ugbẹn vbe Mata ghi họn ighe Jesu dee, ọ keghi ya khian vba ẹre, sokpan Meri tota vbe uwu owa.

21Mata keghi khama Jesu wẹẹ, “Nọyaẹnmwa, akpawẹ u rre emwa na, ọtẹn mwẹ ghẹ wu.

22Ọ rhe ye rriọ, mẹ rẹnrẹn wẹ Osanobua gha rhie emwi ne u rhirhi a nọ ọn ẹre re nuẹn.”

23Jesu khama rẹn wẹẹ, “Ọtuẹn gha rhiọkpaegbe.”

24Rẹn keghi wanniẹn wẹẹ, “Mẹ rẹnrẹn ighe ọ gha rhiọkpaegbe vbe ẹdẹ okiekie.”

25Jesu tama rẹn wẹẹ, “Mẹ ọrọre arhiọkpaegbe kevbe arrọọ, ọmwaikọmwa ne ọ rhirhi a ya mwẹ yi, ọ gha rre agbọn, ọ gha khọn rẹn ne ọ wu.

26Ọmwaikọmwa ne ọ rre agbọn, ọ na vbe ya mwẹ yi, ẹ i wu ẹdẹdẹmwẹdẹ, wẹ ya ọna yi ra?”

27Rẹn wanniẹn wẹ, “Ẹsẹse Nọyaẹnmwa, Mẹ yayi ighe wẹ ọrọre Mẹzaia ne Ovbi Osanobua ne a wẹ re ọ die agbọn.”

28Mata ghi ta ẹmwẹ na nẹ, ọ keghi heko ya tie ọtiọnrẹn ighe Meri, ọ tama rẹn wẹẹ, “Ọmamwaemwi rre, ọ nọ ẹmwẹ ruẹn.”

29Ugbẹn vbe Meri họn ẹmwẹ na, ọ keghi giẹgiẹ kpaegbe ne ọ ya vba ẹre.

30(Jesu ma he sẹ adesẹ ẹvbo, ehe ne Mata na vba ẹre ọre ọ ye ye.)

31Avbe Ju ni tota ke Meri gha fu ẹre ẹko rre vbe uwu owa ghi miẹn ighe Meri gua kpaegbe, ọ ladian, iran vẹ lele ẹe. Iran te ro ighe te ọ ra ya gha viẹ vbe ọkpẹn idin.

32Meri ghi sẹ ehe ne Jesu ye, ọ fan fi igue vbe odaro ẹre, Ọ wẹẹ, “Nọyaẹnmwa, akpawẹ u rre emwa na, ọtẹn mwẹ ghẹ wu!”

33Jesu ghi miẹn wẹ, ọ viẹ, avbe Ju ni lele ẹe rre vbe guee viẹ, ẹko hia keghi giẹngiẹn ọẹn ruan, ọ keghi dae ẹsẹse.

34Ọ keghi nọ iran wẹẹ, “De ehe ne uwa re ẹre yi?” Iran tama rẹn wẹẹ, “Nọyaẹnmwa do ghe ẹre.”

35Jesu viẹe

36Rhunmwuda ọnii avbe Ju keghi kha wẹẹ, “U ghe vbe ne ọ ho ẹmwẹ ọnrẹn hẹ.”

37Sokpan eso vbe uwu iran keghi kha wẹẹ, “Ẹ i re oko na ọre ọ rhan avbe arhuaro aro ra? Vbọzẹ ne ọ na ma ruẹe ne Lazarọs ghẹ wu?”

38Ọ keghi dọlegbe da Jesu, ọ na gha rrie idin ni ne ọre okuta ne a guọlọe, a kevbe mu okuta gue unu ẹnrẹn.

39Jesu khama iran wẹ, “Wa mu okuta nii hin rre!” Mata ne ọtẹn ọmwa ne ọ wu nii keghi kha wẹẹ, “Ọ gha wia nẹ ẹsẹse Nọyaẹnmwa rhunmwuda nẹghẹdẹnẹ ọre a ghi mu ẹn ye otọ!”

40Jesu tama rẹn wẹẹ, “Mẹ ma tama ruẹn nẹ wẹẹ u gha miẹn uyi Osanobua adeghẹ u yayi.”

41Iran keghi mu okuta nii hin rre. Jesu keghi tọn aro mu ghe odukhunmwu, ọ wẹẹ, “Evbavba, I kpọnmwẹ ọn ye ne u na danmwehọ mwẹ.

42I rẹnrẹn ighe u danmwehọ mwẹ vbe ẹghẹ hia, sokpan rhunmwuda iran ni rre emwa na nian, ọ re I gu kha vberriọ ne iran miẹn ehe na rẹn ighe wẹ ọre ọ gie mwẹ.”

43Ọ ghi kha vberriọ nẹ, ọ keghi davan wẹẹ, “Lazarọs ladian gha dee!”

44Ọmwa ne ọ wu nii keghi ladian ke ẹe kevbe ukpọn orinmwi ne a ya gbalọ ẹre obọ kevbe owẹ kevbe aro. Jesu keghi khama iran wẹ, “Wa rhan rẹn ne u wa gie ẹe gha khian.”

45Ugbẹn vbe ni bun vbe uwu avbe Ju ni do tuẹ Meri ghi miẹn emwi ne Jesu ru, iran keghi ya ẹe yi.

46Sokpan eso vbe uwu iran keghi bu avbe Farisi gha khian, iran keghi ya gbẹngbẹn emwi ne Jesu ru ma iran.

47Rhunmwuda ọnii, avbe Farisi kevbe avbe igie ohẹn keghi ya gu Eghaẹvbo do iko iran wẹ, “Vbe a gha khian emwi na hẹ yi, wa ma miẹn vbe oko na winna iwinna ọyunnuan ni bun hẹe!

48Ma gha gie ẹe gha ru avbe emwi na khian vberriọ, emwa hia gha do ya ẹe yi, ẹghẹ nii, arriọba e Rom gha ye ohu guọghọ ima Ọgua Osa, ọ ghi khọn ẹvbo ima muotọ.”

49Ọkpa vbe uwu iran ne a tie ẹre Kaiafas ne ọ vbe re ogie ohẹn vbe ukpo nii keghi kha wẹẹ, “Wa izẹdẹ wan hiehie re.

50Wa ma rẹn ighẹ orhiọnkpa ya uhunmwu khiọ ẹmwẹ ẹvbo hoho ọre ọ maa sẹ ne ẹvbo hoho la ọrhiae rrie.”

51(Ẹ i re ẹwaẹn obọ ẹre ọre ọ ya ta ẹmwẹ na, sokpan, rhunmwuda ighẹ rẹn ọrọre Ogie Ohẹn vbe ukpo nii, ọ keghi guan ẹmwẹ akhasẹ wẹ, ẹ i ghi rre Jesu wu ne avbe emwa Ju.

52Sokpan ẹ i re ne iran ọkpa, sokpan ne ọ vbe si ivbi Osanobua ni zagha kua koko ye otu ọkpa.)

53Rhunmwuda ọnii, ke ẹdẹ ne ẹdẹrriọ kpao, avbe ọdakha avbe Ju keghi si uma wẹ ne iran gbe Jesu ua.

54Rhunmwuda ọnii, Jesu ma ghi ye egbe fi alasẹ vbe Judia, sokpan ọ kegha rrie Ifreim, ẹvbo ọkpa ne ọ rre ọkpẹn ato, rẹn kevbe erhuanegbe ẹre keghi ya die odọ nii ya.

55Emwiukpo Alagberra ne avbe Ju ru keghi bu otọ, emwa ni bun keghi ke dọmwadẹ ẹvbo kpao gha rrie Jerusalẹm ne iran ya do ugie ihọnmwegbe ye otọ khẹ emwiukpo.

56Ehe ne iran na si koko vbe Ọgua Osa, iran kegha ya aro gualọ Jesu, iran kegha nọ egbe wẹ, “Wẹ wẹ ọ gha rri emwiukpo na yi?”

57Avbe igie ohẹn kevbe avbe Farisi tama emwa hia nẹ wẹẹ, ọmwa ne ọ rhirhi rẹn ehe ne Jesu ye, ne ọ do kha ne iran ya mu ẹn.