John 5

Edo ((E Baibol Ẹdo) Version 1996)

← Chapter 4 Jump to: Chapter 6 →

1Vbe iyeke ọnọna emwiukpo avbe Ju ọkpa kegha rrọọ, Jesu keghi gha rrie Jerusalẹm.

2Vbe ihe ọkpa ne a tie ẹre Onurho Ohuan vbe Jerusalẹm odighi ọkpa ne ọ mwẹ ikpogho isẹn kegha rrọọ, emwi ne iran tie ẹre vbe Hibru keghi re Betzata.

3Avbe ọkhọnmwọ ni bun keghi lovbiẹ lele ikpogho ẹre, avbe arhuaro, uke kevbe arọe. [Iran gha mudia khẹ ẹghẹ ne a gha ya tughu amẹ ni.

4Rhunmwuda ẹghẹ hia ọre odibo e Nọyaẹnmwa ya tuorre la uwu odighi nii ya gha tughu amẹ ọnrẹn, ọkhọnmwọ ne ọ ghi rhirhi ka la uwu amẹ nii vbe a ghi tughu ẹe nẹ, ọ ghi fe vbe obọ emianmwẹ ne ọ rhirhi a gha khuọnmwi.]

5Okpia ọkpa ne a miẹn wẹ ukpo eva irrọ vbe iyeva ọre ọ ye ne ọ kegha khuọnmwi keghi rre evba.

6Jesu keghi bẹghe ẹre vbe ọ lovbiẹ, rẹn keghi wa rẹn wẹẹ ọkpẹre ne ọ kegha khuọnmwi, rhunmwuda ọnii, rẹn tama rẹn wẹẹ, “U ho ne egbe rran ruẹn ra?”

7Okpia ne ọ khuọnmwi ni wanniẹn tama rẹn wẹẹ, “Enọwanrẹn mẹ i mwẹ ne ọ gha mu mwẹ fi uwu odighi vbe a gha tughu ẹe nẹ, mẹ ghẹ ghi wẹ ne I ya larọ, vbene I te sẹ evba, ọmwa ọvbehe ka la rọ nẹ.”

8Jesu tama rẹn wẹẹ, “Kpaegbe, kie ewa ruẹ ne u gha rrie.”

9Vbe ọwarọkpa nii, okpia ni keghi kpaegbe, ọ kie ewa ẹre, ọ na gha rrie.

10Ẹdẹ Ikẹtin ọre emwi na na sunu. Ẹ re ivbi Eju na tama ọmwa ne a sinmwi nii wẹẹ, “Ẹdẹ Ikẹtin ọ na khin. Uhi ima ma fan obọ ẹre nuẹn ne u mu ewa ruẹ.”

11Rẹn keghi wanniẹn wẹẹ, “Ọmwa ne ọ mu mwẹ egbe rran ọre ọ tama mwẹ wẹẹ, ‘Mu ewa ruẹ ne u gha rrie.’ ”

12Iran nọ rẹn, “Vbe enọmwa ye yi ne ọ khama ruẹn ne u mu ewa ruẹ ne u gha rrie?”

13Sokpan ọmwa ne a sinmwi ni ma rẹn ọmwa ne ọ khin, rhunmwuda Jesu kpao vbe evba rre nẹ, ẹvbo kevbe bun vbe evba ẹsẹse.

14Ọ ghi kpẹe kherhe, Jesu miẹn ọẹn vbe uwu Ọgua Osa, ọ keghi tama rẹn wẹẹ, “Vbe ne egbe na rran ruẹ nẹ nian, u ghi zobọ vbe emwi dan ne u ru, ne emwi ne ọ khọrhiọn sẹ ọna ghẹ dekun ruẹn.”

15Okpia ni kegha khian, ọ keghi ya tama avbe Ju wẹẹ, “Jesu ọre ọ mu irẹn egbe rran.”

16Rhunmwuda ọnii, avbe Ju kegha zẹ Jesu owẹ rhunmwuda ne ọ na sinmwi ọmwa vbe Ẹdẹ Ikẹtin na.

17Jesu wanniẹn tama iran wẹẹ, “Te erha mwẹ wa winna ẹghẹ hia, ẹ i mwẹ mẹ ma vbe gha winna.”

18Ẹmwẹ na keghi wa dọlegbe ya avbe Ju rhie gba yọ wẹ te iran gha gbe ẹe rua rhunmwuda ẹ i re uhi Ẹdẹ Ikẹtin ọkpa ọre ọ ghi rra, sokpan ọ wa vbe kha wẹẹ, “Erha irẹn ọre Osanobua khin, ọ gha gu Osanobua mwa ẹrrẹe.”

19Rhunmwuda ọnii, Jesu wanniẹn tama iran wẹẹ, “Ẹmwata ọre I tama uwa, Ọmọ izẹ enegbe ẹre ru vbe emwikemwi, emwi ne ọ miẹn ighe Erha ru ọre irẹn vbe ru. Emwi ne Erha ru ọre Ọmọ vbe ru.

20Rhunmwuda Erha ho ẹmwẹ Ọmọ, rẹn keghi ma ẹre emwi hia ne irẹn tobọ ẹre ru. Ọ gha vbe ma rẹ emwi ni sẹ ena ne ọ gha ru, unu ghi yan uwa hia.

21Rhunmwuda zẹ vbene erha huẹn ọmwa ne ọ wu nẹ kpao vbe orinmwi, erriọ zẹẹ ọre Ọmọ vbe rhie arrọọ ne emwa ne ọ ho ne ọ rhie na.

22Erriọ vbe nọ, Erha i tobọ ẹre bu ohiẹn ọmwaikọmwa, ọ rhie asẹ hia ne ovbi ẹre nẹ ne ọ ya gha bu ohiẹn.

23Ne emwa hia miẹn ehe na gha ye ọghọ ne Ọmọ zẹ vbene avbe ya ọghọ ne Erha. Ọmwa ne ọ ma ye ọghọ ne Ọmọ ọ ma ya ọghọ ne Erha ne ọ gie ẹe.

24“Ẹmwata I tama uwa, ọmwa ne ọ rhirhi họn ẹmwẹ mwẹ ọ na vbe ya ọmwa ne ọ gie mwẹ yi, mwẹ ẹfe ne ẹ i fo. A i ghi bu ohiẹn ọnrẹn, ọ fian uwu rra la ẹfe nẹ.

25Ẹmwata I tama uwa, ẹdẹ dee, ẹghẹ sẹ nẹ, ne avbe orinmwi gha na họn urhu Ovbi Osanobua, iran ni họn ẹn hia gha fe.

26Zẹ vbene Erha tobọ ẹre re isi ehe ne arrọọ ke rre, erriọ zẹ ọre ọ vbe ya Ovbi ẹre ru isi ehe ne arrọọ ke rre.

27Rẹn rhie asẹ ne Ọmọ ne ọ ya gha bu ohiẹn rhunmwuda ighẹ Ovbi Ọmwa ọre irẹn khin.

28Wa ghẹ gie ọna yan uwa unu an, rhunmwuda ẹdẹ dee ne avbe orinmwi ni rre idin gha họn urhu ẹre,

29iran ghi ke unu idin iran ladian, a gha huẹn iran ni ru ẹse kpaegbe ne iran gha rrọọ, a gha huẹn iran ni ru emwi dan kpaegbe, a ghi bu abe gbe iran.

30“Mẹ i sẹtin zẹ enegbe mwẹ ru, vbe ne Osanobua tama mwẹ ọre I ya bu ohiẹn, rhunmwuda ọnii, ẹmwata ọre ibuohiẹn mwẹ khin rhunmwuda mẹ i zẹ ọghe egbe mwẹ ru, sokpan vbene ọmwa ne ọ gie mwẹ ho, ọre I ru.

31“Mẹ gha sẹ osẹe ne egbe mwẹ, ẹmwẹ ne I tae i gia rhie zẹ vbe osẹe ẹmwata.

32Sokpan ọmwa ọvbehe rrọọ ne ọ sẹ osẹe mẹ, mẹ vbe rẹn wẹẹ, ẹmwẹ ne ọ tae vbe ekpa mwẹ, ẹmwata nọ.

33Wa gie uhunmwu ye ọghe Jọn nẹ, rẹn keghi vbe sẹ osẹe ẹmwata.

34Ẹ i re wẹ, a ma miẹn a i ru ọre osẹe ne ọmwa sẹ khin mẹ, te I ta ẹmwẹ na ne a miẹn ehe na miẹn uwa fan.

35Jọn keghi ye vbe ukpa ne ọ baa, ne ọ vbe wan uwanmwẹ ladian, wa keghi ho ne uwa ya uwanmwẹ ọnrẹn zọmọ vbe ovbi e ẹghẹ kherhe.

36Sokpan mẹ mwẹ osẹ mwẹ ne ọ kpọlọ sẹ ne Jọn sẹe: I winna ne I ye obọ mwẹ winna, avbe iwinna ne Erha mwẹ viọ mẹ ne I winna, enena ọre ọ sẹ osẹe mẹ wẹẹ Evbavba ọre ọ gie mwẹ.

37Evbavba ne ọ gie mwẹ vbe sẹ osẹe mẹ. Wa ma he ka họn urhu ẹre ẹdẹ, wa ma he miẹn uharo ẹre ẹdẹ.

38Rhunmwuda ọnii ẹmwẹ ọnrẹn i vbe rre uwu uwa, rhunmwuda wa i ra ya ọmwa ne irẹn gie yi.

39Wa vbe tie Ebe ne ọ huanrẹn ni rhunmwuda wa ro ighẹ uwu iran ọre uwa gha na miẹn arrọọ ne ẹ i fo. Iran tobọ iran vbe sẹ osẹe mẹ.

40Sevba wa ma ho ne uwa bu mwẹ gha dee ne uwa miẹn ehe na gha mwẹ arrọọ ne ẹ i fo.

41“I ma wẹ ne ọmwa tian mwẹ.

42Sokpan mẹ rẹn uwa. I rẹnrẹn ighẹ wa i ho ẹmwẹ Osanobua vbe ekhọe uwa.

43Ẹtin ọghe Erha mwẹ ọre I ya gha dee, sokpan wa ma rhan obọ miẹn mwẹ, sokpan ọmwa ọvbehe gha ya ẹtin obọ ẹre rre, wa gha rhan obọ miẹn rẹn.

44Wa ho ne uwa tobọ uwa gha tian egbe uwa, wa ma ho ne a miẹn ighẹ Osanobua ọkpa kẹkan ne ọ rrọọ ọre ọ tian uwa, vbe uwa a ghi ra na sẹtin yayi hẹẹ?

45Vbene ọ rhirhi gha ye hẹ, wa ghẹ ro ighẹ I gha ba uwa ifi ẹzọ ma Erha mwẹ. Ọmwa ne ọ ra ba uwa ifi ẹzọ ọrọre Mosis. Mosis nii ne uwa ye aro kọ.

46Akpawẹ wa gele ya Mosis yi vbe ẹmwata, wa gha vbe ya mwẹ yi rhunmwuda rẹn gbẹn ebe mwẹ ye otọ.

47Sokpan ugbẹn vbe uwa ma ghi ya emwi ne irẹn gbẹn yi, vbe uwa a ghi ra na sẹtin ya ẹmwẹ mwẹ yi hẹẹ?”

← Chapter 4 Jump to: Chapter 6 →