John 4

Edo ((E Baibol Ẹdo) Version 1996)

← Chapter 3 Jump to: Chapter 5 →

1Avbe Farisi keghi họn wẹẹ, emwa ne ọ do gha deba Jesu zẹ vbe erhuanegbe ẹre kevbe ne irẹn vbe sa amẹ na bun sẹ ọghe Jọn.

2(Sokpan, Jesu ma tobọ ẹre sa amẹ ne ọmwa rhọkpa avbe erhuanegbe ẹre ọre ọ sa amẹ ne emwa.)

3Jesu ghi họn ẹmwẹ ne emwa ta, ọ keghi kpao vbe Judia rre, ọ na gha rrie Galili.

4Sameria keghi re ehe ne ọ gha la gberra ọ te sẹ evba.

5Rẹn keghi do sẹ igue Sameria ọkpa ne a tie ẹre Sika, ne ọ ma rrei gbe vbe ako oha ne Jekọb mu ne Josẹf ne ovbi ẹre.

6Uhae ọghe Jekọb keghi rre evba, rhunmwuda ne egbe okhian ghi na wọ Jesu ni, rẹn keghi tota ye ọkpẹn uhae ni, owẹn sẹ adesẹ ukhunmwu nẹ.

7Okhuo ọkpa, ovbi e Sameria keghi do sa amẹ, Jesu keghi tama rẹn wẹẹ, “Sa amẹ mẹ wọn.” (

8Avbe erhuanegbe ẹre ladian gha rrie adesẹ ore ẹvbo ne iran ya dẹ evbare.)

9Okhuo Sameria nii wanniẹn wẹẹ, “Wẹ ne Ju, vbe u a gu nọ imẹ ne ọmwa Sameria hẹ wẹ ne I sa amẹ nuẹn wọn.” (Rhunmwuda avbe Ju kevbe emwa Sameria i gba fi obọ ye ọkpan ọkpa.)

10Jesu wanniẹn wẹẹ, “Akpawẹ te u rẹn emwi ne Osanobua ya ru ọmwa ẹse ke ọmwa ne ọ wẹ ne u sa amẹ ne irẹn wọn, te u gha nọ rẹn, rẹn gha ghi vbe sa amẹ arrọọ nuẹn.”

11Okhuo nii wanniẹn wẹẹ, “Enọwanrẹn, u i mwẹ ikoroba, uhae na wa vbe dinmwi. De ehe ne a gha na te miẹn nene amẹ arrọọ yi?

12Jekọb ne erha mwa odede ọre ọ mu uhae na ne ima, rẹn kevbe ivbi ẹre kevbe emwi irri ẹre hia wọn vbọ. Te uwẹ ghi wẹ, u kpọlọ sẹ Jekọb ne erha mwa ra?”

13Jesu wanniẹn wẹẹ, “Ọmwa gha wọn vbe amẹ na, ohanmwẹ amẹ gha ye vbe dọlegbe gbe ẹe.

14Sokpan ọmwa ne ọ rhirhi wọn vbe amẹ ne imẹ gha sa nẹẹn ohanmwẹ amẹ i ghi dọlegbe gbe ẹe ẹdẹ. Rhunmwuda amẹ ne I gha sa nẹẹn gha khian uhunmwu ẹzẹ vbe uwu irẹn, ọ ghi gha rhie amẹ arrọọ nẹẹn, ọ ghi vbe rhie arrọọ ne ẹ i mwẹ ọfo nẹẹn.”

15Okhuo nii tama rẹn wẹẹ, “Enọwanrẹn, sa ne imẹ vbe nene amẹ ne ovbamẹ ghẹ ghi dọlegbe gbe mwẹ, ne I ghẹ ghi vbe rre do gha sa amẹ.”

16Jesu tama rẹn wẹẹ, “Ya tie ọdafọn rre, ne u dọlegbe gha dee.”

17Okhuo ni wanniẹn wẹẹ, “I mwẹ ọdọ.” Jesu wanniẹn wẹẹ, “Ẹmwata ọre u tae ighe u i mwẹ ọdọ.

18Ọdọ isẹn ọre u he ka rọnmwẹ yi, ọmwa ne u vbe rre ọre owa na nian, ẹ i wa vbe rre ọdafọn. Ẹmwata ọre u ta ma mwẹ.”

19Okhuo ni khama rẹn wẹẹ, “Mẹ miẹn ọẹn nian ighe akhasẹ ọre u khin.

20Uhunmwu oke na ọre avbe erha mwa odede ne ivbi Sameria na ga Osanobua. Wa ne Ju ghi ra kha, wa wẹ, Jerusalẹm ọrọre ehe ne ọ kere ne a na gha ga Osanobua.”

21Jesu tama rẹn wẹẹ, “Ya ẹmwẹ mwẹ yi okhuo na, ẹghẹ dee ne a gha na miẹn wẹ ẹ i re uhunmwu oke na ra Jerusalẹm ọre emwa gha na ga Evbavba.

22Wa ne ivbi e Sameria ma mobọ rẹn ọmwa ne uwa ga. Ma ne Ju rẹn ọmwa ne ima ga rhunmwuda obọ avbe Ju ọre imiẹnfan ke rre.

23Sokpan ẹghẹ nii dee, ọ vbe sẹ otọ nẹ ne iran ni mobọ ga, gha na ga Evbavba vbe orhiọn kevbe ẹmwata. Egbe emwa nii ga vberriọ ọre Evbavba ho ne ọ gha gae.

24Orhiọn ọre Osanobua khin, iran ni gae, ọ kere ne iran ya orhiọn gae vbe ẹmwata.”

25Okhuo ni tama rẹn wẹẹ, “Mẹ rẹnrẹn ighe Mẹzaia ne a tie ẹre Kristi dee. Ọ gha ghi rre, ọ gha rhan otọ emwi hia ma ima.”

26Jesu khama rẹn wẹẹ, “Mẹ mwẹ nọ, mẹ ne ọ gu ẹ guan na.”

27Ẹghẹ ni, avbe erhuanegbe keghi rre, ọ ke kakabọ yan iran unu uan vbe iran miẹn ighe ọ gu okhuo guan. Sokpan a ma miẹn ọkpa vbe uwu iran ne ọ tama okhuo ni wẹ, “Vbe u a họ?” Ra ne iran vbe nọ irẹn wẹẹ, “Vbọzẹ ne u na gu okhuo nii guan yi?”

28Okhuo ni keghi sẹ akhe amẹ rae, ọ kegha rrie ore ẹvbo. Ọ tama avbe emwa ẹvbo nii wẹẹ,

29“Wa do ghe okpia ọkpa ne ọ ta emwi hia ne i ghi he ru ma mwẹ, ọna i re nene Mẹzaia nian?”

30Rhunmwuda ọnii, iran keghi ke ore ẹvbo kpao bu Jesu gha khian.

31Ẹghẹ na, avbe erhuanegbe kegha rinmwian Jesu wẹẹ, “Ọmamwaemwi, rri evbare.”

32Sokpan rẹn wanniẹn wẹẹ, “Mẹ mwẹ evbare ne uwa ma rẹn emwi rhọkpa vbe ekpa ẹre, ne I gha re.”

33Avbe erhuanegbe keghi suẹn gha nọ egbe iran ọta wẹẹ, “Te emwa eso ghi rhie evbare giee ra?”

34Jesu tama iran wẹẹ, “Evbare mwẹ ọrọre ne I họn ẹmwẹ ọmwa ne ọ gie mwẹ uhunmwu, ne I vbe winna okhuo ne ọ fian mẹ fo.

35Wa ọre ọ ta ẹe wẹẹ, ‘Uki enẹ ọre ọ ghi kẹ ne a suẹn gha rhọ emwi orhọ.’ Ne I tama uwa. Wa ya ghe ugbo, emwi orhọ wo nẹ, ọ vbe sẹ nẹ ne a rhọ.

36Ọmwa ne ọ rhọ emwiokọ, a ghi gha ha ẹre osa, ọ ghi gha rhọ emwiorhọ ye arrọọ ne ẹ i fo, ne ẹko miẹn ehe na rhiẹnrhiẹn ne ọ kọ emwiokọ kevbe ne ọ rhọ emwiokọ kugbe.

37Rhunmwuda, itan ẹmwata nọ wẹ, ‘Ne ọ kọ emwiokọ, u ghaẹn, ne ọ rhọ ọre ughaẹn.’

38Mẹ gie uwa ya rhọ emwiokọ ne ọ rre ugbo ne uwa ma miẹn ẹsọn yi emwa ọvbehe ọ re ọ miẹn ẹsọn yọ, wa miẹn ere vbe ẹsọn ne iran miẹn.”

39Avbe emwa Sameria ni bun vbe ẹvbo ni keghi ya Jesu yi rhunmwuda ne okhuo ni na kha wẹẹ, “Ọ ta emwi ne i ghi he ru hia ma mwẹ.”

40Ugbẹn vbe avbe emwa Sameria ni ghi bu ẹre rre, iran rinmwian ne ọ gu iran tota, Jesu keghi gbe ikpẹdẹ eva vbe evba.

41Emwa ni bun keghi la ekpa ikpe orhu ẹre yayi.

42Iran tama okhuo nii wẹẹ, “Ẹ i re rhunmwuda ẹmwẹ ne u tae ọre ima na ghi yayi nian, emwi ne ọ ya ima yayi ọrọre wẹ ma tobọ mwa họn ẹmwẹ ne unu ẹnrẹn, ma rẹnrẹn vbe ẹmwata wẹ, rẹn ọrọre Ọmiọnmwafan agbọn.”

43Jesu ghi gbe ikpẹdẹ eva nẹ vbe evba, ọ keghi kpao gha rrie Galili.

44Rhunmwuda Jesu tobọ ẹre ka tae nẹ wẹẹ, “Akhasẹ i mwẹ uyi vbe ẹvbo ẹre.”

45Ọ ghi sẹ Galili, emwa ẹvbo nii keghi rhan obọ miẹn rẹn rhunmwuda iran tobọ iran vbe yo Emwiukpo Alagberra vbe Jerusalẹm, aro iran vbe sẹ emwi hia ne ọ ru vbe ẹghẹ Emwiukpo.

46Jesu kegha rrie Kana ne Galili, ehe ne ọ na ya amẹ khian ayọn. Ọkaolotu iwinna arriọba ọkpa keghi rre evba, egbe ma rran ovbi ẹre.

47Ugbẹn vbe ọ ghi họn ighẹ Jesu ke Judia gha die Galili nẹ, ọ keghi bu ẹre gha khian ya tama rẹn wẹ ne ọ gha rrie Kapaniọn ne ọ ya sinmwi ovbi ẹre ne okpia ne ọ ghi ra wu.

48Jesu tama rẹn wẹ, “Deghẹ ẹ i re te uwa miẹn iwinna ọyunnuan nekhua, a i miẹn ne ọ gha sẹtin yayi vbe uwu uwa.”

49Ọkaolotu iwinna ni tama rẹn wẹẹ, “Enọwanrẹn lele mwẹ gha khian ne ọ ghẹ kẹe ovbi mwẹ ya wu.”

50Jesu tama rẹn wẹẹ, “Gha khian ighẹ ovbi uẹ gha fe.” Okpia ni keghi wa ya ẹmwẹ Jesu yi, ọ na gha khian.

51Ugbẹn vbe ọ ghi rrie owa, avbe eguọmwadia keghi do tama rẹn wẹẹ, “Ovbi uẹ gha fe.”

52Rẹn keghi nọ iran ẹghẹ ne egbe ya suẹn gha rran ovbi irẹn. Iran tama rẹn wẹ, “Ihe ẹgogo ọkpa vbe avan nodẹ ọre oni nii ya gbannọ.”

53Erha ẹe keghi yerre wẹ, ẹghẹ nii zẹẹ ọre Jesu vbe ya tama irẹn wẹẹ, “Ovbi uẹ gha fe.” Rẹn ke ẹe kevbe emwa rẹn hia keghi yayi.

54Ọna ọrọre iwinna nọkhua ne ogieva ne Jesu winnaẹn vbe ọ ke Judia gha die Galili nẹ.

← Chapter 3 Jump to: Chapter 5 →