Judges 16

Edo ((E Baibol Ẹdo) Version 1996)

← Chapter 15 Jump to: Chapter 17 →

1Ẹdẹ ikẹtin e Samsin keghi ke evba kpao gha rrie Gaza, ọ keghi miẹn ebabotu ọkpa vbe evba, ọ na gu ẹe ru emwi ọdọ vbe amwẹ.

2Emwa e Gaza keghi họn wẹ e Samsin rre evba, iran keghi ghae ga evba nii, iran na gha khẹ ọre vbe onurho ne a la la ẹvbo nii vbe asọn ni hia. Iran keghi hunwan vbe asọn nii hia, iran kegha ye ekhọe iran ta ẹe wẹẹ, “Ma gha mudia ne ẹdẹ gbe ẹghẹ nii ma ghi gbe ẹe rua.”

3Sokpan e Samsin keghi lovbiẹ ye ukpo ọ te sẹ ogiasọn. Rẹn na ghi kpaegbe, ọ na dobọ ye urho ẹvbo nii, ọ na silo ẹe vbọ, ẹkhu nii kevbe erhan ne a kan rẹn mu kevbe ehia. Ọ na viọ ehia yan izabọ, ọ na kun ẹnrẹn gha rrie uhunmwu oke ne a ke ghe Hibrọn.

4Vbe iyeke, ọnọna, e Samsin keghi rhie obọ ye ẹmwẹ okhuo ọkpa vbe Iya Sorẹk, a keghi tie okhuo ni Delila.

5Avbe ọba e Filistia isisẹn keghi bu ẹre gha khian, iran tama rẹn wẹẹ, “Rẹrẹ ọe o ighẹ Samsin ne u miẹn otọ emwi ne ọ ya ẹe wegbe sẹrriọ, kevbe vbene obọ ima gha ya vba ẹre hẹ, ne a mu ẹẹn gba ne egbe fu ẹe. Ọkpọkpa vbe uwu ima gha viọ igho esiliva iyisẹn yan arriaisẹn (1,100) nuẹn.”

6Ẹre Delila na tama Samsin wẹẹ, “Lahọ, tama mwẹ emwi ne ọ ya a wegbe sẹrriọ. A deghẹ ọmwa ho ne ọ mu ẹẹn gba ne egbe fu ẹ, vbe ọ gha ya ru ẹe hẹ.”

7E Samsin keghi wanniẹn wẹẹ, “Iran gha ya irri uhanbọ ihinrọn ọgbọn ne ọ ma he kaka a, gba mwẹ, mẹ ghi do ye mitan mitan zẹ vbe emwa ọvbehe.”

8Ẹre avbe ọkaolotu e Filistia na viọ irri uhanbọ ọgbọn ihinrọn ne ọ ma he kaka gie Delila, ọ re ọ na ya ẹe gba e Samsin.

9Ọ na viọ emwa eso lẹre ye ughugha ọvbehe vbe ọkpẹn evba, rhunmwuda ọnii, okhuo nii keghi datu wẹẹ, “E Samsin! Ivbi e Filistia dee!” Sokpan rẹn keghi giagia irri uhanbọ nii kua zẹ vbe oru vbe erhẹn a dekan rẹn. Rhunmwuda ọnii, iran ma ye rẹn otọe ehe ne ẹtin ẹnrẹn ye.

10E Delila keghi tama e Samsin wẹẹ, “U ma miẹn nian ighẹ ta u ya mwẹ gbe ogiẹ vbe ne u na ta ohoghe ma mwẹ. Lahọ, tama mwẹ vbe ne ọmwa gha ya sẹtin mu ẹẹn gba hẹẹ.”

11Rẹn keghi tama rẹn wẹẹ, “Iran gha ya irri ọgbọn ne a ma he ka lo yi gba mwẹ, I ghi do gha ye mitan mitan vbe emwa ọvbehe.”

12Ẹre Delila na viọ irri ọgbọn, ọ na ya ẹe gba ẹe. Rẹn keghi datu wẹ e, “Samsin ivbi e Filistia dee!” Avbe emwa nii keghi mudia vbe ughugha ọvbehe. Sokpan, rẹn keghi giagia avbe irri nii, hin obọ ẹre rre vbe oru.

13E Delila keghi tama Samsin, “Te u ye ya mwẹ gbe ogiẹ, u ma ta ẹmwata ma mwẹ, tama mwẹ vbene ọmwa gha ya sẹtin mu ẹẹn gba hẹ.” Rẹn keghi tama rẹn wẹẹ, “U gha do ititi eto mwẹ ihinrọn na kugbe zẹ vbe ido, u na ye ukeke khiẹnrẹn, I ghi do ye mitan mitan zẹ vbe emwa ọvbehe.”

14E Delila keghi hẹko bọ ẹre ye ovbe, ọ keghi viọ ẹre ititi eto ihinrọn nii, ọ na mẹ ọẹn ginna ido, ọ na ya ukeke tua ẹre, ọ na datu wẹẹ, “E Samsin ivbi e Filistia dee.” Rẹn keghi rhiọrre, ọ na sanmwẹ eto ẹre hin ido rre.

15Rhunmwuda ọnii rẹn tama rẹn wẹẹ, “Vbe u a na kha hẹ yi wẹ u ho ẹmwẹ mwẹ vbe ne ọ ma na zẹdẹ sẹ uẹ otọ ẹko. Igba eha ọ re u he ya mwẹ gbe ogiẹ vbe ne u i na ta ma mwẹ emwi ne ọ sii ẹe ne u na wegbe sẹrriọ.”

16Ọ na ghi gha nọ rẹn ẹdẹgbegbe Egbe vbene ọ ya kpokpo ẹe keghi wọ ẹre sẹrriọ wẹ,

17Vbe okiekie, ọ na ta ẹmwata nọ rrọọ ma rẹn, ọ wẹẹ, “A ma he zẹ eto mwẹ na ẹdẹ ke ẹghẹ ne a ya biẹ mwẹ gha dee, te a wa ya mwẹ fi ohan ne Osanobua zẹ vbe Agbihiagha. A gha zẹ mwẹ eto na, ẹtin mwẹ ghi fo, mẹ ghi gha ye mitan mitan vbe emwa ọvbehe.”

18E Delila ghi miẹn wẹ ọ ta ẹmwata ne ọ rrọọ ma irẹn nẹ, ọ keghi gie ne a khama avbe ọba e Filistia wẹẹ, “Wa ye gha dee uhukpa kẹkan, ọ ta ẹmwata ne ọ rrọọ ma mwẹ nẹ nian.” Ọ re iran ghi na viọ igho ni mwẹ obọ gha dee.

19Ọ keghi mu e Samsin uhunmwu ye ekuawẹ bọ ẹre ye ovbe, ọ na tie okpia ọkpa rre, ne ọ do giagia ititi eto ihinrọn ọghe Samsin kua. Okhuo ni keghi hia ne ọ huẹn ọnrẹn sokpan, egbe fuẹe nẹ.

20Okhuo nii keghi datu wẹẹ, “E Samsin, ivbi e Filistia dee!” Rẹn keghi rhiọrre, ọ keghi te gha ro wẹẹ, “I gha vin ladian ne I fanmwẹ gbe ua vbene I ka ru ẹẹ yi.” Ọ ma rẹn wẹ e Nọyaẹnmwa kpao sẹ ọe rae nẹ.

21Ivbi e Filistia, keghi mu ẹẹn, iran na wọlọ ẹre aro hẹ kua. Iran na mu ẹẹn gha rrie Gaza, iran na ye ọgiọrọ oze rro ẹre. Iran na mu iwinna emwi ne a ya olọ lọ nẹ vbe uwu eghan.

22Sokpan eto ẹre kevbe dọlegbe gha zọ dee.

23Avbe ọkaolotu e Filistia keghi si egbe koko ne iran ghọghọ kevbe ne iran do zọ ese ghe Dagọn ne ẹbọ iran. Iran keghi so ihuan wẹẹ, “Ẹbọ ima gie a miẹn khọnmiotọ nẹ vbe uhunmwu e Samsin ne eghian mwa.”

24Emwa nii ghi miẹn ọẹn, ira kegha rho ẹbọ iran wẹẹ, “Ẹbọ ima rhie akhọnmiotọ ne ima nẹ vbe uhunmwu eghian mwa ne ọ duẹ otọe ima an, ọ na gbele emwa nii bun vbe uwu ima!” Iran keghi ghọghọ, iran na kha wẹẹ, “Wa tie Samsin rre ne ima ya ẹe gbe ogiẹ.” Iran ghi mu e Samsin ke uwu ẹwẹdọ ladian, iran keghi ya ẹe gha gbe ogiẹ, iran na rhie ẹre mudia ye ẹkpo orre nekhua eva.

26E Samsin keghi tama ọvbokhan ne ọ rhie ẹre obọ khian wẹẹ, “Rhie mwẹ obọ ye avbe orre ni da owa na yi. I ra ya egbe gọọ yan iran.”

27Owa ni keghi wa vuọn ne ikpia kevbe ikhuo. Avbe ọkaolotu isẹn ọghe emwa Filistia kevbe gha rre evba, emwa ni vbe hin odukhunmwu owa gha ghe vbe a ye e Samsin gbe ogiẹ sẹ omwa arriaisẹn eha (3,000).

28Ẹre Samsin na na erhunmwu wẹẹ, “E Nọyaẹnmwa Osanobua ne Udazi, lahọ ye mwẹ rre, lahọ Osanobua, ye rhie ẹtin mẹ uhukpa na, ne isẹtin ya emwi ne I ghi fi uhukpa na rria ikhi ne ọ khẹke emwa Filistia ye aro mwẹ eveva.”

29E Samsin keghi da orre eva ni rre adesẹneva ni da owa nii yi. Ọ na ya obọ ọkpọkpa da orre ọkpọkpa yi. Ọ keghi wa hẹnhẹn egbe yan rẹn.

30Ọ na datu wẹẹ, “Gie imẹ vbe emwa Filistia gba wulo!” Ọ keghi ya ẹtin ẹnrẹn hia si ẹe guọnmwẹ, owa keghi derhu avbe ọkaolotu isẹn nii kevbe emwa ọvbehe hia, emwa ne ọ gbele vbe ẹghẹ uwu ẹre keghi bun sẹ iran ne ọ gbele vbe ẹghẹ ne ọ na rre agbọn.

31Etiọnrẹn hia kevbe ẹgbẹe ọre hia kegha dee do mu ikun ẹnrẹn. Iran keghi mu ẹẹn gha rrie, iran na ya re ẹre ye idin erha ẹe ighẹ Manoa vbe ẹkpo Zora kevbe Estao. Ukpo ugie ọ re ọ ya gha re ọkaolotu ivbi Izrẹl.

← Chapter 15 Jump to: Chapter 17 →