Lamentations 2

Edo ((E Baibol Ẹdo) Version 1996)

← Chapter 1 Jump to: Chapter 3 →

1Ohu mu e Nọyaẹnmwa ọ keghi ya ebiebi gue Jerusalẹm muotọ. Ọ ye ose ẹre ọghe ẹrinmwi khian ne ọ la ọrhiae rrie. Vbe ẹdẹ ne ohu gele wa muẹn uhin ighe te ọ fi iyeke gbe Ọgua Osa ẹre.

2E Nọyaẹnmwa wa rẹnkhẹẹn igue hia ni rre Juda a vbe ne a i na vbe mwẹ itohan ọ kevbe guọghọ odin ne a te gba ga ẹvbo nii uan ọ keghi vbe fa otọe arriọba nii kevbe avbe ọkaolotu ẹre ua.

3Ugbẹn vbe ohu kakabọ mu ẹn ọ keghi duẹ ẹtin Izrẹl rua. Ọ kere ne ọ ye ima obọ vbe avbe eghian rre ọ ya uvannọmwẹ guọnmwẹ ghe ima zẹ vbe erhẹn, ọ keghi fuẹn emwi hia a.

4Ọ ya uhanbọ kọn mwa zẹ vbene eghian ru ẹe; ọ gbele iran hia ne ima ya zowẹ ughanmwẹ ma wa họn obọ ugiẹnmwẹ ohu ẹre vbe egbe vbe Jerusalẹm vbe emwa na.

5E Nọyaẹnmwa fuẹn Izrẹl rua nẹ zẹ vbe oghian ọ ye avbe odin kevbe ẹguae ẹre khian itowa ọ keghi vbe sii akhiẹ ne ẹ i fo ye ivbi Jerusalẹm egbe.

6Ọgua Osa ne ima na te ga ẹe ọ dunmwu ẹn ruan rẹnkhẹnrẹnkhẹn. Ẹdẹ iruẹmwi kevbe Ẹdẹ Ikẹtin. Ọ rhie ufomwẹ ye ehia. Ke avbe ọba kevbe avbe ohẹn ehia họn obọ ẹre vbe egbe.

7E Nọyaẹnmwa hee Ogiukpo ẹre ọ keghi kpao hin uwu Ọgua Osa ẹre nọhuanrẹn rre. Ọ gie avbe eghian guọghọ ekẹn ọnrẹn sotọ. Iran wee ye akhọnmiotọ iran vbe ehe ne ima na te ya oghọghọ ga yi.

8E Nọyaẹnmwa wa tae nẹ wẹ te ekẹn e Zaiọn gha de guọghọ ua. Ọ keghi mwa ẹnrẹn ne a miẹn ehe na miẹn wẹ, te a fuẹn ọnrẹn fo fẹẹrẹ. Ke owa ọkhẹ kevbe ekẹn ọnrẹn, itowa ehia ghi khin.

9Iku siẹẹn rhu onurho ẹre ginna otọ a dunmwu ogba ni rro rẹnkhẹnrẹnkhẹn. Ke avbe ọha kevbe egbesẹmwegie hia iwe ọ re iran hia ghi ye. A i ghi ma emwa nene Uhi ọvbehe avbe akhasẹ ighi miẹn umian ke ehe ne Nọyaẹnmwa ye rre.

10Avbe eniwanrẹn e Jerusalẹm tota lele otọ vbe ahunwan hii, iran zẹẹ ebubẹ ye uhunmwu, iran keghi viọ ukpọn akhiẹ ye egbe. Evbokhunvbi hia hie uhunmwu ghe otọ.

11Aro mwẹ so oze ba ẹmwẹ eve, orhiọn mwẹ vbe rre uwu obalọ nọkhua. Akhiẹ ugbelemwẹ emwa mwẹ gbe mwẹ fi otọ. Ke emọ obọ kevbe emọ owẹ ehia gha sahẹ vbe adesẹ ore ẹvbo.

12Ohanmwẹ gbe iran, ovbamẹ gbe iran ehia gha tulo gbe iye iran, ehia dele vbe adesẹ ughe zẹ vbe emwa ne a kuan ẹre egbe, erriọ ehia ya wulo uwu ọyẹvbu ye avbe iye iran obọ.

13Eu, e Jerusalẹm, ẹvbo ne a ho ẹmwẹ ọnrẹn, e Jerusalẹm, vbe i a ghi ra miẹn ta? Vbe i a ra ya fu ruẹ ẹko rre hẹ? A ma miẹn ọmwa ne ọ he rri egbe oya ne uwẹ re na ẹdẹ. Ọkhọ ne ọ rruan ruẹn yevbe okun ne ẹ i mwẹ okhiẹ, idaehọ ighi zẹdẹ rrọ hiehiere.

14Avbe akhasẹ, ruẹ i miẹn ẹmwẹ tama ruẹn gberra ohoghe, orhu ne iran kpe keghi de ruẹ odẹ rhunmwuda, iran ma vẹ orukhọ ruẹ uhe ua iran keghi ya uwẹ gha ro ighe orukhọ ne u gha rhunmwuda ẹre fiwerriẹ, irrọ.

15Emwa ni la ore ẹvbo nii gberra ghi gha ghe ruẹ sọnnọsọnnọ iran ghi fieghe uhunmwu iran ghi gha giẹ udemwẹ e Jerusalẹm wẹẹ, “Ẹvbo olose nii ọna gele khin ra? Emwi ne otagbọn hia ya ghan ọna khin ra?”

16Avbe eghian ruẹn hia gha ya a gbogiẹ iran ghi tọn aro ikhuiwu ye uẹ egbe. Iran ghi fi aranmwẹ ye irho gha kha wẹẹ, “Ma dunmwu ẹẹn ruan nẹ! Ẹdẹ ne ima rhie aro ye odẹ khẹ nii ọ re ọna khin!”

17E Nọyaẹnmwa ye ru ẹe vbene ọ wẹ rẹn re ru ẹe: Ọ fuẹn ima an vbe ne a i na mwẹ itohan, zẹ vbene ọ taa ẹe yotọ ke ẹghẹ nii gha dee. Ọ gie obọ avbe eghian mwa ke ukhunmwu, ọ keghi ye ọyẹnmwẹ sẹ iran ye udemwẹ mwa.

18Jerusalẹm, gie avbe ekẹn ne a gbe ga ruẹ datu tie Nọyaẹnmwa wa gie ameve uwa gha lẹ vbe ẹzẹ asọn kevbe avan, wa ya eve kevbe akhiẹ wiẹn egbe uwa a!

19Wa gha kpaegbe yan egbe yan egbe vbe asọn ne uwa datie Nọyaẹnmwa; wa hihiẹ ekhọe uwa ladian ne uwa nọ rẹn wẹ ne ọ tohan ivbi uwa. Avbe emọ ne ohanmwẹ gbele ua lele adesẹ ore ẹvbo!

20Tọn aro mu Nọyaẹnmwa! Tọn aro mu ghe iran ne u sẹ ọre usẹ! Iyemọ gha gbele emọ ne iran ho ẹmwẹ ọnrẹn re! A gha gbele avbe ohẹn kevbe avbe akhasẹ ye uwu Ọgua Osa tobọẹre!

21Ke ibiẹka kevbe eniwanrẹn, ehia wulo lele otọ vbe adesẹ ore ẹvbo. Avbe igbama kevbe ivbialeke ne umozo avbe eghian gbele ua. Ẹdẹ ne ohu mu uwẹ u keghi rẹnkhẹẹn iran an vbe ne a i na mwẹ itohan.

22Wẹ ọ re ọ gie ne a tie avbe eghian mwa ne iran do do ugie iba ne ọ mu ohan, lẹga mwẹ orhiọnkpa i rrọ ne ọ miẹn uhunmwu vbe ẹdẹ ne ohu mu uwẹ. Iran gbele mwẹ emọ ne I ho ẹmwẹ ọnrẹn ne imẹ koko wan nẹ.

← Chapter 1 Jump to: Chapter 3 →