Lamentations 4

Edo ((E Baibol Ẹdo) Version 1996)

← Chapter 3 Jump to: Chapter 5 →

1Igoru mwa ne ọ te fi wainwain wu nẹ vbe aro. Avbe okuta Ọgua Osa tagha lele ore ẹvbo hia.

2Te avbe igbama e Zaiọn te ghan vbe obọ mwa zẹ vbe igoru. Sokpan, te a ghi ru iran nian zẹvbe akhe obuẹ.

3Te Akpakomiza ne ọ biẹe ye koko ọmọ, sokpan, avbe emwa mwẹ yevbe ugomugo, ne ọ ru ọmọ ne ọ biẹe emwi dan.

4Iran gie ohanmwẹ kevbe ovbamẹ gbele iran emọ uan ibiẹka gha vbu evbare khian, vbe ne a i na miẹn ne ọ gha rhie ne iran.

5Avbe emwa ni te ka rri evbare ni maa sẹẹ yi khian ne ohanmwẹ ghi gbele ye adesẹ ore. Avbe emwa ne a koko vbe uwu ọkpọkua khian ne ọ ghi zọ iku re vbe otiku.

6A rri avbe emwa mwẹ oya, ne ọ gberra ọghe ivbi e Sọdom, emwa ne Osanobua rrua gbotọ vbe udomwurri.

7Avbe ivbiọba mwẹ keghi te gha re emwa ne ẹ i mwẹ awua, iran keghi gha re ne ọ hianrẹn vbe esia, iran te wegbe, iran vbe mwẹ ẹtin, egberranmwẹ iran ghi wa vẹ ne a rẹn.

8Banbanna nian, iran lovbiẹ ku adesẹ ore zẹvbe emwa ne a ma rẹn. Ugbaro iran siere ua ba mwẹ uwu, ikpakpa egbe iran kae vbe erhan, ehia sikan mu ugboloko iran.

9Iran ne okuo gbele ọ re ọ maa sẹ ni do wulo vbe okiekie emwa ne ohanmwẹ hẹko gbele ua vbene evbare i na rrọ ne ọ gha da iran yi ye agbọn.

10Ọkhọ ne ọ rruan emwa mwẹ ugborrirri ọ re ọ si rre; iye ni te ho ẹmwẹ emọ kegha le ivbi iran re.

11E Nọyaẹnmwa keghi wa tue izohu ẹre ne ọ wegbe ladian; ọ keghi hie erhẹn ye Zaiọn, ne ọ wa gien ọnrẹn sotọ.

12Orhiọnkpa i vbe rrọọ uhin ya sẹ egbe avbe ogie isi, ne ọ te ro wẹ, okuo rhọkpa gha sẹtin la onurho e Jerusalẹm.

13Sokpan, ọ sunu, rhunmwuda, avbe akhasẹ ọ re ọ rukhọ avbe ohẹn ọnrẹn vbe rriabe wẹ, iran ọ re ọ gie avbe emwa ni ma rukhọ wulo.

14Avbe ọkaolotu ẹre kegha zozo lele abẹvbo khian zẹ vbe arhuaro, esagiẹn gbe iruẹn ye iran egbe sẹrriọ, wẹ a i miẹn ne ọ ya obọ kan iran.

15Emwa ghi gha tama iran wẹẹ, “Wa ladian mwa! Awua rre uwa egbe! Ghẹ ya obọ kan mwẹ!” Rhunmwuda onii iran keghi zozo, ke ẹvbo okpa dinna ọvbehe vbene a i na miẹn ọmwa ne ọ miẹn iran yi.

16E Nọyaẹnmwa i ghi zẹdẹ rre asa ọghe iran nii, rẹn ọ re ọ tobọ ẹre zagha iran an. Ọ ma ghi zẹdẹ zẹye avbe ohẹn kevbe ọkaolotu mwa ẹre.

17Ma rhie aro ye odẹ rhinrin egbe ẹre te wọ mwa ighe iyobọ nẹ a khẹ ne ẹ i dee. Ma na gha khẹ iyohọ vbe obọ uhunmwu ẹvbo, ne ẹ i mwẹ iyobọ okpa ne ọ gha sẹtin ru.

18Eghian mwa kegha baba mwẹ; ohan ma ghi gie ima khian ladian ore. Ẹghẹ mwa gberra nẹ, ufomwẹ rre nẹ.

19Iran vin zẹ mwa khu okhian kẹ iran sẹẹ oghohọn ne ọ ke iso rre. Iran zọọ owẹ mwa ya sẹ uhunmwu oke; obọ iran vba mwa vbe a ma ro a ma kọ vbe ato.

20Iran khọn mu uhunmwu uwa ẹdagbọn mwa, ọba ne Nọyaẹnmwa zẹe ọmwa ne imẹ ye aro khọ ighe ọ gha degue mwa hin obọ iran ni gunmwa khọn.

21Wa gha giẹ ivbi Idom kevbe Uz; wa gha ghọghọ vbe ẹghẹ ne uwa ya sẹtin, ọkhọ ne ọ ra rruan uwa vbe dee. Wa tobọ uwa gha vbe dobidokpannọ wa ghi bannọ uan vbe uwu ekhue.

22E Zaiọn rrii oya ye orukhọ ne ọ ru nẹ, e Nọyaẹnmwa i ghi ra sẹ mwa rae ye iwe ọvbehe. Sokpan, e Nọyaẹnmwa gha rri uwa oya, wẹ Idọm. Ọ gha we ruẹ uhe ua vbekpa emwi irriabe ne u ru.

← Chapter 3 Jump to: Chapter 5 →