Lamentations 5

Edo ((E Baibol Ẹdo) Version 1996)

← Chapter 4 Jump to:

1E Nọyaẹnmwa, ye emwi ne ọ he rruan mwa rre. Tọn aro mu ghe ima, ne u ghe vbene a fa ima an hẹ.

2Ẹrrẹe ọ re ọ ghi ya ima emwi ru; erhunmwuyẹn ọ re ọ ghi rre owa mwa.

3Avbe eghian gbele avbe erha mwa an, banbanna nian ẹgbẹ avbe iye mwa ghi khin.

4Te ima ha osa amẹ ne ima wọn, erhan ne ima gha ya koko, te ima dẹlẹ ọe.

5A khu mwa ọgbẹgbẹ zẹ vbe ẹsin ra e kamẹl egbe wọ mwa, sokpan a ma gie ima hẹwẹ.

6Igipt kevbe Asiria ọ re ima na ya gha vbu evbare, ne a miẹn ya da orhiọn yi.

7Avbe erha mwa odede ru orukhọ, sokpan iran i ghi rrọ nian, te ima ghi rri oya ye orukhọ iran.

8Avbe emwa ni ma maa sẹ eviẹn ọ re ọ khaemwisẹ yan mwa. Ọmwa ne ọ gha sẹtin fan mwa vbe obọ iran i rrọọ.

9Avbe izigha gha hẹyo hẹrre vbe ọkpẹn ẹvbo, ma gha ra ya gualọ evbare, ma ghi viọ uhunmwu mwẹ atataobọ.

10Te ohanmwẹ ghi ya egbe mwa tọn ne oni a te miẹn wẹ te ikpakpa egbe mwa ghi tọn vbe aroewu.

11A mu avbe amwẹ ima yagha vbe Oke Zaiọn tobọ ẹre, iran ghi ya ẹtin mu avbe ivbi ima ne ikhuo ne iran kue vbe igue hia ni rre otọ e Juda.

12A munọ avbe ọkaolotu ima, a keghi silo iran rrọọ, iran ivbe zẹdẹ yọghọ ne avbe eniwanrẹn ima.

13A ye avbe igbama ima gha wiẹn ọka zẹvbe eviẹn avbe igbama mwa gha dobidokpannọ khian, rhunmwuda ihẹ erhan ne a kun yan iran uhunmwu.

14Avbe eniwanrẹn i ghi tota vbe onurho ẹvbo ọvbehe, avbe igbama i ghi kpe emwi ihuan.

15Ọyẹnmwẹ lahin ẹdagbọn ima rre nẹ; akhiẹ ọ re ọ ghi rhie ihe iku ne ima te ku.

16Avbe emwi ne ima te ya ghan hia okpa ma ghi kẹe vbọ. Ma ru orukhọ nẹ, banbanna, ọghe ima fo.

17Emianmwẹ rre ima ẹkoko udu, ameve i ghi gie ima dẹghe ẹse.

18Rhunmwuda Oke Zaiọn khian ne a lẹẹ sẹrae ọ keghi vbe divbiẹ, avbe ekuaghagha oha gha hẹyo hẹrre vbe avbe itowa ni rrọọ.

19Sokpan, Nọyaẹnmwa, ọba uwẹ khin ẹdẹdẹmwẹdẹ; u gha vbe gha khaemwisẹ ya sẹ ufomwẹ agbọn.

20Vbu a ghi na fi iyeke gbe mwa kpee sẹrriọ hẹ yi? U gha ye ye ima rre ẹdẹ yi?

21Dọlegbe viọ ima rriegbe Nọyaẹnmwa! Viọ ima rriegbe! Rhie uyi mwa nẹdẹ dọlegbe ye ihe.

22Ra te uwẹ wa he ima fo fẹẹrẹ ra? Ohu ruẹ i ghi mwẹ okhiẹ ra?

← Chapter 4 Jump to: