Ezekiel 44

Bugis

← Chapter 43 Jump to: Chapter 45 →

1Nainappa iyaro worowané nadulussika lao ri gerbang saliwengngé ri tibang alauna daéra Bolana Puwangnge. Iyaro gerbangngé tattongkoi,

2makkedai Puwangnge lao ri iyya, “Iyaé gerbangngé harusu'i tette tattongko sibawa dé' nawedding ritimpa. Dé' muwi séddi tau wedding muttamakiwi, saba' Iyya, Puwang Allataalana Israélié, pura muttama ri Bola-Ku molai gerbangngéwé. Jaji, iyaé gerbangngé harusu'i tette tattongko.

3Iyakiya panguwasa iya mapparéntaé weddingngi lao ri gerbangngéro untu' manré inanré mapaccing ri yolo-Ku. Harusu'i muttama lalo ri bili' battowaé sibawa lisu molai iyatoro lalengngé.”

4Nainappa iyaro worowané natiwika lao ri gerbang manorang iya siyolongngé Bolana Puwangnge. Upénessaini, nauwitani iyaro Bolana Puwangnge risalipuri cahaya pawilo-wilo iya tanrangiyéngngi ahadérékenna Puwangnge. Nainappaka parebbai aléku sibawa suju',

5namakkeda Puwangnge lao ri iyya, “Eh tolino dé'é namannennungeng, pénessaiwi madécéd-décéng aga iya muwitaé sibawa iya muwéngkalingaé. Upaissengiko matu sininna peraturangngé sibawa hukkungngé passalenna Bola-Kué. Okii madécéd-décéng niga-niga iya ripalaloé muttama ri Bola-Ku sibawa niga-niga iya riyattéyangngé.

6Powadangngi umma Israél iya pojiyéngngi maronta'ro makkedaé Iyya, Puwang Iya Pommatanré, dé'na Umaélo leppessangngi mennang pogau'i najisi'é.

7Purai mennang nacarépai Bola-Ku, saba' wettunna riyakkasuwiyangeng lunra sibawa dara akkarobangengngé lao ri Iyya, napalaloi mennang muttama ri lalenna sining tau laing iya dé'é narisunna, sibawa iya dé'é naturusi-Ka. Nasibawang sining pangkaukenna mennang iya mappakaciddi-ciddi'éro, purani mennang najjalékkai assijancik-Ku sibawa mennang.

8Tenniya bawang aléna mennang iya pakangkaé upacara-upacara mapaccing ri laleng Bola-Ku, sangadinna sining tau laing iya nasuroé mennang untu' pogau'i.

9Iyya, Puwang Iya Pommatanré, mappallebbangengngi makkedaé tau laing iya dé'é narisunna sibawa tau iya dé'é namapato lao ri Iyya, dé' naripalalo muttama ri Bola-Ku. Iyaro takkennai towi untu' tau laing iya monro mattette'é ri tengnga-tengngana bangsa Israélié.”

10Makkedai Puwangnge lao ri iyya, “Iyya hukkungngi matu sining tau Léwi iya silaongngé sibawa sining tau Israél laingngé, nasalaika namassompa barahala.

11Ri laleng Bola-Ku, banna mennang weddingngi natumaningi-Ka selaku pajjama sibawa panganrowang gerbang. Weddingngi mennang maggéré olokolo untu' akkarobangeng ritunu sibawa pakkasuwiyang, sibawa waji'i mennang untu' tuli tumaningiwi umma'é.

12Iyakiya nasaba purai mennang napogau' upacara assompang barahalaé untu' bangsa Israélié, nanasibawang caraéro nassarénréngengngi bangsaéro muttama ri laleng dosaé, na Iyya, Puwang Iya Pommatanré, mattanro makkedaé harusu'i mennang rihukkung.

13Dé'na nawedding mennang tumaningi-Ka selaku imang iyaré'ga géssai aga iya mapaccingngé untu' Iyya, iyaré'ga muttamakiwi onrong Iya Pommapaccingngé. Iyanaro pahukkungenna sining pangkaukeng najisi'é iya puraé napogau' mennang.

14Makkekkuwangngé Usuroi mennang untu' pogau' jama-jamang makassara iya parellué ripogau' ri Bola-Ku.”

15Makkedai Puwang Iya Pommatanré, “Wettunna tau Israélié nasalai-Ka, sining imang Léwié polé ri wija-wijanna Zadok tette'i matinulu tumaningi-Ka ri Bola-Ku. Rimakkuwannanaro mennang ritu makkekkuwangngé harusu tumaningi-Ka sibawa lao ri yolo-Ku untu' makkasuwiyangeng lunra sibawa dara polé risining akkarobangengngé.

16Banna mennang bawang iya weddingngé muttama ri Bola-Ku, tumaningi-Ka ri mézba-Ku, sibawa pimpingngi kebaktiyangngé ri Bola-Ku.

17Wettunna mennang muttamakiwi pintu gerbang mattujué ri seddé laleng, harusu'i mennang paké pakéyang lénang. Dé' nawedding mennang paké pakéyang polé ri wol-é rékko mattengngangngi jaga ri seddé laleng, iyaré'ga ri laleng Bola-Ku.

18Kuwammengngi aja' namapella sibawa mapuse, harusu'i mennang paké saluwara' lénang temmabbabbang, sibawa passiyo ulu polé ri lénangngé.

19Rékko laowi mennang ri seddé saliweng, kégi maddeppungeng umma'é, iyaro imang-ngimangngé harusu'i naludung pakéyang dinasna mennang ri laleng bili'-bili' mapaccingngé ri Bola-Ku, nainappa paké pakéyang laingngé, kuwammengngi pakéyang ripallaingngéro dé' nacilakaiwi umma'é.

20Dé' nawedding sining imangngé kellui ulunna, iyaré'ga leppessangngi gemme'na malampé. Iyaro gemme'é harusu'i rirette ponco situru atoreng iya ripattette'é.

21Dé' nawedding mennang ménung anggoro rékko maéloi muttama ri seddé lalenna.

22Sining imangngé banna weddingngi nakawingi ana'-ana'dara Israél iya perawangngé mupa iyaré'ga jandana imangngé. Dé' nawedding nakawingi makkunrai iya ritelle'é.

23Harusu'i nappagguruwang sining imangngé lao ri umma'-Ku untu' pasilaingengngi kéga ripallaing untu' Iyya sibawa kéga dé', kéga mapaccing situru agamaé sibawa kéga najisi'.

24Rékko mompoi assisalang parakara hukkung, harusu'i mennang napurai situru sibawa hukkung-hukkuk-Ku. Harusu'i mennang napakaraja pésta-pésta agamaé, situru sining atorek-Ku sibawa hukkung-hukkuk-Ku, enrengngé pakalebbii Saba'é selaku esso iya ripallaingngé untu' Iyya.

25Séddié imang dé' nawedding panajisi'i aléna sibawa géssa uju, sangadinna ujuna tomatowanna, ana'na, silessurenna worowané iyaré'ga ana'daranna iya dé'éppa nakawing.

26Mapaccinnana paimeng, harusu'i natajeng pitungngessopa,

27nainappa lao ri seddé lalenna Bolaku, sibawa makkasuwiyangeng akkarobangeng untu' pépaccingiwi aléna kuwammengngi nawedding majjamasi ri Bola-Ku. Iyya, Puwang Iya Pommatanré pura mabbicara.

28Sining imangngé natarimai jabatang imangngéro selaku bagiyang untu' mennang polé ri aga iya Uwabbéréyangngé lao ri Israélié massossoreng. Dé' nawedding mappunnai agi-agi ri Israélié: Iyya ritu waramparanna mennang.

29Harusu'i mennang tuwo polé ri pakkasuwiyang gandongngé, akkarobangeng pappaledda dosaé, sibawa akkarobangeng passullé arogingngé; sibawa sininna séuwa-séuwaé iya puraé ripallaing untu' Iyya, harusu'i riwéréng mennang.

30Harusu'i riwéréng imangngé bagiyang iya kaminang makesingngé polé ri sininna rupanna wassélé éngngalang iya mammulangngé, sibawa polé ri agi-agi iya riyakkasuwiyangengngé lao ri Iyya. Sises-siseng bangsa Israélié mébbu roti, roti iya mammulangngé harusu'i untu' sining imangngé. Na-Ubarakkakiwi matu sining bolana bangsa Israélié.

31Manu'-manu' sibawa olokolo iya maté riyalé, iyaré'ga iya ritikkengngé ri olokolo masekkangngé, dé' nawedding nanré sining imangngé.”

← Chapter 43 Jump to: Chapter 45 →