Deuteronomy 18

Chin (Mara Bible RV (BSI))

← Chapter 17 Jump to: Chapter 19 →

1“Theihthaipa chi Livai pathla zydua cha, Izarei sawzy hry liata tovyuh nata ryuto ama hnei hra awpa châ vei. Abeipa lâta mei ta hmohlâpazy ama nie awpa châ ta, cha cha ama ryuto a châ.

2Ama unawhzy hry liata ryuto hnei aw veih ei. Abeipa ta bie â taihpa hawh ei ta, Abeipa cha ama ryuto a châ.

3Hezy he theihthaipazy tovyuh a châ aw: Atheihna a hlâtuhpazy ta viahchao tôhpa nata mietaku ama hlâpa tawhta a palaih nata a ôhkhaih kârano nata a pavyhzy cha, theihthaipa ama pie awpa a châ.

4Nama sâh, nama kresawhti nata nama sathaw a veih tuapa nata nama mietaku hmi ngyu tuapa zy chhao theihthaipa nama pie aw.

5Ano nata a sawchapawzy cha, Abeipa nama Khazohpa ta a moh ta a duah ta, chhâzaw ta chakao awpa ta nama chi zydua hry tawhta â tlypa ama châ.

6“Livai chi pakha ta Izarei râh liata a pahrâna khih puasaipa ta, palôh khona hmeiseihpa ta Abeipa ta â tlyh awpa su lâ â vy khiahta cha,

7Abeipa hmiakô liata a duah tyhpa Livai chi a unawhzy hawhta, Abeipa a Khazohpa moh ta cha liata a chakao hra aw.

8A paw ryu a zuapa tawhta sôh a hmôpa thota, theihthaipazy tovyuh awpazy a to pâ aw.

9“ Abeipa nama Khazohpa ta râh a cha piepa ei nama tlô tita, cha râh liata phopizy taozie pasichhihpazy nama tao awpa châ vei.

10Ama sawchapaw nata sawchanô mei liata a hlâpazy, pachaothaipazy, kulâmohthaipazy, moliethaipazy nata peihthaipazy nama hry liata ama y awpa châ vei.

11Dyuthaipazy, thlahpa nata ahripa bie a chho thaipazy nata athih lâ hryh thaipazy chhao nama hry liata ama y awpa châ vei.

12Cha hmozy a taopa cha Abeipa pachâ ta pasichhihpa châ ta, cha hmo pasichhihpazy vâna chata Abeipa nama Khazohpa ta nama hmiakô tawhta a papua ha ei.

13Abeipa nama Khazohpa hmiakô liata nama phapaki awpa a châ.

14Nama kei pho awpa râh liata phopizy ta pachaothaipazy nata kulâmohthaipazy bie nathlie tyh ei ta, nâmo deikua cha, Abeipa nama Khazohpa ta cha hawhpa hmo tao awpa cha pasaih veih ei.

15“ Abeipa nama Khazohpa ta keima hawhpa hrohsopa nama unawhzy hry tawhta cha paduapa aw ei ta, a bie nama nathlie awpa a châ.

16Hôribâ liata ahmaohpakhy noh ta, nâmo tlai ta, ‘ Abeipa eima Khazohpa ao cha keimo ta thei khao leipa aw pi ta, mei ru ngaitapa chhao he hmô khao leipa ta eima y aw, chataleipatala eima thi pathlei aw,’ tah ei chi ta, Abeipa nama Khazohpa lâta nama khozie namâ hawpa hawhna khata, keima hawhpa hrohsopa a cha paduapa aw ei.

17Abeipa ta ei hnohta, ‘Ama bie reipa a pha na.

18Ama unawhzy hry tawhta nâ hawhpa hrohsopa paduapa aw ei na ta, a pakah liata ei biezy soh aw na ta, a hnohta bie ei piepa zydua ama hnohta a rei pachhuah tyh aw.

19Hrohsopa ta ei moh ta ei bie a reipazy a thei khoh leipa cha, kei tlai ta ei pachia aw.

20Bie rei awpa ei pie leipa tlai ta, ei moh ta bie a reihpa nata khazoh hropazy moh ta bie a reihpa hrohsopa cha a thi awpa a châ,’ tah ta.

21“Nama palôh liata, ‘ Abeipa ta a rei leipa bie cha kheihta ma eima pahno thei aw?’ nama tah thei.

22Hrohsopa ta Abeipa moh ta bie reih sala, a bie reipa cha vaw tlô leipa sala, â do leipa khiahta cha, cha cha Abeipa ta a rei leipa bie a châ. Hrohsopa ta a palai ngaitapa ta ano phichhyhpa bie a reipa châ ta, ano cha nama chi awpa châ vei.

← Chapter 17 Jump to: Chapter 19 →