Deuteronomy 34

Chin (Mara Bible RV (BSI))

← Chapter 33 Jump to:

1Mawsi cha Môabâ bypi tawhta Zerikô dady Nebô Tlâh liata Piskâ tlâh laki lâ khy ta. Abeipa ta râh zydua pamosa ta, Kilia tawhta Dânâ taih,

2Nâthalai râh zydua, Epharai nata Manase râhzy, Zudâh râh zydua Notla Tilaipi taih;

3Neke nata Bypi tawhta Zawâ taih pamosa ta. Bypi cha thiahrâ khihpi Zerikô saikao a châ.

4Abeipa ta a hnohta, “He râh he, Abarahâ, Aisika nata Zakaw hnohta, ‘Na pathlazy ei pie aw ei,’ tahpa ta bie ei taihpa râh kha a châ. Na mo ta cha pahmôsa na ta, châhrasala a ngia aw va chi,” tah ta.

5Chatanachata Abeipa chakaotuhpa Mawsi cha Abeipa bie hawhta Môabâ râh liata thi ta,

6Bepeô dady Môabâ râh saikao liata ama pabu. Châhrasala a thlâ yna cha ahy hmahta tanoh taihta pahno veih ei.

7Mawsi cha a thi nota kô 120 uhtheipa a châ. A mo zoh leipa ta, a tha tleih vei.

8Izarei sawzy ta Mawsi cha Môabâ bypi liata noh sythôh chakhei ei ta. Mawsi chakheipa ta ama mâchhiesana nohzy cha chhâ ta.

9Nunâ sawchapawpa Zawsua cha, Mawsi ta a chô liata a ku a pahniehpa vâta, sona thlahpa ta bie ta. Chavâta Izarei sawzy ta a bie nathlie ei ta, Abeipa ta Mawsi bie a piepa hawhta ama tao lymâ.

10Cha khai tawhta cha Izarei hry liata Mawsi hawhta Abeipa ta hmiachhy ta a pahnopa hrohsopa y khao veih ei.

11Abeipa ta Izi râh liata nata Phiraoh nata a chakaotuhpa zydua nata a râh zydua chô liata ngiana nata hmonoâhpazy a pataosapa hawhpa kha ano hawhta a tao theipa y veih ei.

12Mawsi ta ku thatlôpa nata chichhihpa ta Izarei zydua mohmô liata a taopa hawhta a tao theipa y hra veih ei.

← Chapter 33 Jump to: