Deuteronomy 21

Chin (Mara Bible RV (BSI))

← Chapter 20 Jump to: Chapter 22 →

1“ Abeipa nama Khazohpa ta hnei awpa ta râh a cha piepa ei liata, chyhsa ama thiepa ri lyurâhpa liata a zawh thlâh ha sala, a thietuhpa pahnopa a châ leipa khiahta cha,

2nama machâzy nata ryureituhpazy vawh aw ei ta, ama thiena su nata a chheipâh liata khih a ypazy ahlana zie ama thlie aw.

3Ri yna tawhta khih a hnia chaipa machâzy ta viahchao zeinô rai pahriasa mâh leipa, raopaky paky mâh leipa pô kha amâ chhi aw.

4Khih machâzy ta viahchao zeinô cha, lei palie leina nata khâpa chi hmah chei leina ti lona saikao lâ a chhi aw ei ta, viahchao zeinô cha saikao liata a rao ama tai aw.

5Chatawhcha Livai sawchapaw theihthaipazy hmia lâ ama vaw pua aw. Âmo cha Abeipa nama Khazohpa ta ano chakao awpa nata Abeipa moh ta byhnâ aw awpa ta a raopazy ama châ. Chavâta biepeipa nata atudaina kyhzy cha âmo pachiazie hawhta a châ aw.

6Ri yna a hnia chaipa khihpi machâ zydua ta saikao liata viahchao zeinô rao ama âpa chô liata ama ku a si aw ei ta,

7‘Eima ku ta he thisaih he palo leipa ta, eima mo ta thisaih palopa hmô hra vei.

8Hy Abeipa, na chatlaipa na phopi Izarei sawzy he a ngiahthai la, na phopi Izarei sawzy he paraona hnei leipa thisaih maoh phaoh awpa ta pasaih khah y,’ tahpa ta reih aw ei ta, thisaih maoh ama phao awpa tawhta a ngiahthaipa ama châ aw.

9Cha hawhna chata Abeipa mohmô ta hmo dopa tao aw ei chi ta, paraona hnei leipa thisaih palona maoh tawhta nama pathaih aw.

10“Nama chariahzy a dyuh awpa ta hrâ nama sie nahta, Abeipa nama Khazohpa ta âmo cha nama ku liata cha pie ei ta, sei ta a chhi u la,

11seizy hry liata chanô hmi phapazy hmô u la, lapinô ta hnei awpa nama khoh khiahta cha,

12nama o lâ a chhi aw ei chi ta, ama luh a ngyu aw ei ta, ama pato tai aw ei ta,

13sei chysia pahluh aw ei ta, nama o liata ama y aw. Thla kha bohloh ama nô nata ama paw mâchhie ama sa tua aw. Cha khai tawhta âmo lâ a ngia aw ei chi ta, ama vahpa châ aw chi ta, nama lapinô ama châ aw.

14Ama chô liata namâ ly khao leipa khiahta cha, ama khona lâ maih sie nama pasai awpa a châ. Ama noh nama pazao hapa vâta, sôh ta nama zuah awpa châ leipa ta, sei ta nama hnei heih awpa châ khao vei.

15“Chyhsa ta lapinô pano hnei sala, pakha kho via ta, pakha kho lei via sala, a kho viapa nata a kho lei viapa ta saw sapa raihrie ei sala, sawchapaw uhtheipa cha a kho lei viapa saw châ sala,

16a sawchapawzy ryuto a rai noh ta, a kho lei viapa sawchapaw uhthei dopa hlâta a kho viapa sawchapawpa khokhei viapa ta, ano cha sawchapaw uhtheipa ta a tao awpa châ vei.

17A kho lei viapa sawchapawpa cha sawchapaw uhthei dopa châ ta, ano cha a pahno awpa a châ. A hneipa zydua tawhta tovyuh su thôh su no a pie aw. Ano cha a thatlôna thei hmiatuapa châ ta, sawchapaw uhthei châna tovyuh cha ano eih a châ.

18“Chyhsa ta sawchapaw chhorupa nata atyhmâhpa hnei sala, a nô nata a paw rei a ngiah leipa sala, ama chhoreipa chhao ta ama bie a nathlie khoh leipa khiahta cha,

19a nô nata a paw ta patu aw ei ta, a yna khihpi liata machâzy ryureina thokhy chhikao lâ amâ chhi aw.

20Khihpi machâzy hnohta, ‘Eima sawchapawpa he chhorupa nata atyhmâhpa châ ta, eima rei a ngiah khoh vei. Rikawhpa nata sahma lôpa a châ,’ ama tah aw.

21Cha khai tawhta khihsaw zydua ta alô ta vawhsao aw ei ta, cha hawhna chata hmo pha leipa cha nama hry tawhta nama pahlei awpa a châ. Cha thâtih cha Izarei zydua ta thei aw ei ta, ama chi aw.

22“Chyhsa ta thie tlâhpa moleina tao sala, thiepa châ sala, tho liata a ri nama bangieh khiahta cha,

23a ri cha tho liata azozâkhihdei a y awpa châ vei. Cha noh lia tlai ta nama pabu awpa a châ. Tho liata bangiehpa maih cha Khazohpa chhiesapa châ tlôh ei ta, Abeipa nama Khazohpa ta ryuto châta a cha piepa ei nama râh cha nama papuapalei awpa châ vei.

← Chapter 20 Jump to: Chapter 22 →