2 Chronicles 19

Chin SCB2 (Syin Chin Bible)

← Chapter 18 Jump to: Chapter 20 →

1Judah kumpipa Jehoshaphat sia Jerusalem a kumpi inn ah ciidamin heak kik hi.

2Hanani ii tapa kamsaang Jehu sia kumpipa taw kisi tu in pai a, ama tungah, “Mihing seksolte hu tu le Topa a huatsa mite panpui tu sia maan sa ni ziam? Hi bangin na ngamtatna hangin Topa thin uukna na tungah thengsak ni hi.

3Tuabang ahitazong nang sungah phatna pawlkhat om veve hi. Nangma in mite biak Asherah numeipathian milim teng na vawk siat a, Pathian ii deina zui tu na hanciam hi,” ci hi.

4Jehoshaphat kumpipa sia Jerusalem khuapi ah teang hi napi a taanghpupite ii Pathian, Topa kungah mite sam kik tu in thangsang Beersheba pan saksang Ephraim mualtung ngammong dong a huhunin mite sungah khualhaw hi.

5Ama in kulh taw a ki uum Judah khuapi theampo ah thukhenmangte khanin,

6amate hi bangin thuhil hi: “Thu na khen uh ciang kidawm vun; mihing thuneina taw ngamtat tu hi ngawl a, Topa thuneina bang hizaw hi, tuaciang thu na khen uh ciang noma taw Topa hong omkhawm hi.

7Topa zakta vun a, ngamtatna kidawm vun, banghang ziam cile Topa ih Pathian in thumaan ngawl thimthelna, mi doidan kingupna le sumnguk neaknate dei ngawl hi,” ci hi.

8Jerusalem khua sungah Jehoshaphat in Levi mi, thiampite le khua sung lampuite pawlkhat sia Topa Thukham a paltan ciang ahibuale khua mite kihau in thu a nei uh ciang thu a khen tu in thukhenmang panmun pia hi.

9Ama in amate tungah hi bangin hil hi: “ Topa thasia vun a, na nasepna theampo ah ama thu ni in, thumaan in a muanhuai in seam tavun.

10Khuapite khat pawpo pan na mipuite in mihing thisakna ahizong, a dang thukham khat ahibuale thupiakna khat pawpo palsatna ahizong note kungah thu hong thetpui uh ciang amate Topa tungah a khial a maw a sua ngawl natu in thu a kisit laitakin bangbang ngamta tu ci sia pha takin hil hamtang tavun. Tuabang na seam bua uh le noma le na mipuite in Topa thin uukna na thuak tu uh hi. Ahitazong tuabang na na seam uh le mawpu ngawl tu nu hi.

11Biakna paaina taw kisai thu theampo ah Thiampi Lianbel Amariah in thu neibel tu a, Judah ngamuk mangpa Ishmael ii tapa Zebadiah sia khua mite taw kisai thu theampo ah thuneibel tu hi. Levi te in thukhenzum pan a thukhennate bangin kiseam suak ziam ci a etcik tu vaipuak nei hi. Kihansua vun a, hi hilnate bangin seam suak vun, Topa in a maanna sangah hong pang tahen!” ci hi.

← Chapter 18 Jump to: Chapter 20 →