2 Chronicles 30

Chin SCB2 (Syin Chin Bible)

← Chapter 29 Jump to: Chapter 31 →

1A zeksa ngeina om bangin a kithiansua sa thiampite a kicing khom om ngawl a, mipite zongh Jerusalem khua ah tam kikhawmtua ngawl ahikom mite ii Paisan Poai sia a tha masa sung a vawt ngei hunin vawt thei ngawl uh hi. Tua ahikom Hezekiah kumpipa, a uliante le Jerusalem mite in a tha niina tha sungin Paisan Poai vawt tu thukim uh hi, kumpipa in Israel le Judah mite theampo tungah tua thu kam vaitha hi. Israel te ii Pathian, Topa patoai natu in Jerusalem Biakinnpi ah Paisan Poai hong siim natu in Hezekiah kumpipa in Ephraim le Manasseh namte atu kin vawt tuanin sapna lai thaak tuam hi.

4Kumpipa le mite in amate ngealna uh diksa hi,

5tua ahi bangma, amate in saksang pan Dan, thangsang pan Beersheba dong a om, Israel mite theampo a pai ngei za sangin a tamzaw pek Jerusalem ah a pai tek natu Thukham om bangin Paisan Poai vawt tu in sam uh hi.

6Kumpipa le a uliante ii thu piakna om bangin Judah ngam le Israel ngamsung theampo ah kamtaite paisak kawkoai in hi bangin samsak hi: “Israel mite awng, Assyria te ii hong zawthalna ngam pan na suakta uh hi. Tu in Abraham ii Pathian, Isaac ii Pathian, Jacob ii Pathian, Topa zuan kik tavun, tuaciang ama zongh no kung hong zuan kik tu hi.

7Amate ii Pathian, Topa tungah a thumaan ngawl, na taanghpupite le Israel na mipuite bangin om heak vun. Na mu thei bangma in, Topa in nasia takin daan thuaksak hi.

8Amate bangin thinpui ngawlin Topa thu ni vun. Topa note Pathian in no tungah a thin uuk nawn ngawl natu in a tawntungin a thianthosak sa Jerusalem Biakinnpi ah hong pai in ama bia vun.

9Topa na zuan kik uh le na mealheakte, thong a taaksakte in amate khuangai huai sa in inn ah hong ciasak kik tu hi. Topa note Pathian dikin, ngual hesuak thei a, ama na zuan kik uh le ama in hong saang tu hi,” ci hi.

10Kamtaite sia Ephraim le Manasseh namte ii ngamsung khuapi theampo ah pai a, saksang khakbel Zebulun namte teenna dong theng hi, ahihang mite in amate nuisan in selno uh hi.

11Tua kawm pan Asher, Manasseh le Zebulun namte sung pan Jerusalem khua ah a pai nuam veve pawlkhat om lai hi.

12Judah mite sung zongh ah Pathian in naseam a, kumpipa le a uliante thupiakte a thunitna taw ama deina a zui tu in mipite a kibangin thin khensatna neisak hi.

13A tha nii tha in Tol Kisaw Ngawl Anluum Poai vawt tu in mi honpui khat Jerusalem ah kikhawmtua uh hi.

14Amate in Jerusalem khua sungah sangaw biakpiakna le ngimnamtui halna in a kizangh biaknataute theampo la in Kidron kuam ah vawk uh hi.

15Tuaciang tua tha a ni sawm le ni li ni in amate in Paisan Poai sangaw biakpiakna atu tuute ngo uh hi. A zeksa om bangin a thiang ngawl lai thiampite le Levi te sia a maizum mama in Topa mai ah amate le amate ki aaptuam hi; tuasia ciang tu in amate in Biakinnpi sungah meihal biakpiakna pia thei hi.

16Pathian mi Moses ii Thukham sungah a thupiak bangin amate in Biakinnpi sungah omna mun la tek hi. Levi te in sangaw biakpiaknate ii a chite thiampite pia a, thiampite in biaknatau tungah the uh hi.

17Mipite tam mama sia a zeksa om bangin thiang ngawl ahi hu in Paisan Poai tuute ngo thei ngawl ahikom amate taangin Levi te in ngoin Topa tungah tuuno te aap uh hi.

18Tuaban ah, Ephraim, Manasseh, Issachar le Zebulun namte sung panin hong pai mihing tam mama te in a zeksa thiansuana vawt ngawl ahikom amate in Paisan Poai sia a ngeina zui ngawlin tang uh hi. Hezekiah kumpipa in amate atu in hi bangin thungetsak hi:

19“Ka taanghpupite ii Pathian, Topa awng, a zeksa om bangin thiang ngawl ahitazong a thinsung theampo taw nang hong bia amate tungah na thin phatna taw maisak in,” ci hi.

20Topa in Hezekiah thungetna saang a; tua mite mawna maisak in, ngim ngasak ngawl hi.

21Jerusalem khua ah a kikhawmtua mite theampo in Tol Kisaw Ngawl Anluum Poai sia lungdamna lianpi taw ni sali sung vawt hi; ni khat zawkciang ni khat thiampite le Levi te in a tha neiza taw Topa pok uh hi.

22Hezekiah in Topa biakna vawt a thiam Levi te pok hi. A taanghpupite ii Pathian, Topa a pokna in ni sali sung sangaw biakpiaknate a nei zawkciang

23amate teng in a dang ni sali sung ma poai vawt natu in khensat hi. Tuabangin amate lungdam takin poai vawt uh hi.

24Hezekiah kumpipa in tua poai ah mipite neak tu in khuital 1,000 le tuu 7,000 pia in a uliante in a dang khuital 1,000 le tuu 10,000 pia uh hi. Thiampi tam mama in a zeksa kithiansuana vawt uh hi.

25Tua ahikom mite theampo — Judah mi, thiampite, Levi te, saksang ngam pan hong pai mite le Israel le Judah ngam sungah a teang suak ngamdangmite, a kuama po lungdam uh hi.

26Jerusalem khuapi sia lungdamna taw kidim hi, banghang ziam cile tuabang lungdamnate David ii tapa Solomon kumpipa hunlai pan kipan om ngeingawl hi.

27Thiampite le Levi te in mipite atu in Topa tungah thupha ngetsak hi. Vantung a inn pan Pathian in amate thungetna za in saang hi.

← Chapter 29 Jump to: Chapter 31 →