Ezekiel 11

Chin SCB2 (Syin Chin Bible)

← Chapter 10 Jump to: Chapter 12 →

1Pathian ii thaa in kei hong laamto a, Biakinnpi kongpi nisuana sangah hong paipui hi. Tua kongpi naina ah mihing kul le nga ka mu hi, tuate sungah ngam lampui nii ahi, Azzur ii tapa Jaazaniah le Benaiah ii tapa Pelatiah te kihel hi.

2Pathian in kei tungah, “A thithei mihing awng, hi pasalte in a sia vawt tu ngaisutna tupna nei a, khuapi sungah ngaisutna pha ngawl a pia uh hi.

3Amate in ‘Eite in hai ngawlin innte ih sa kik tu hi. Khuapi sia an huanna beal bang hi a, tuaciangin, ei sia a sungah a omsa taw ih kibang hi. Ahihang tua beal in ei sia meisa panin hong dal hi,’ a ci uh hi.

4Tua ahiciang, tu in a thithei mihing awng, amate phat ngawlna son keak in,” hong ci hi.

5Topa ii thaa in kei hong uk a, Topa in mihingte tungah hi kam vaithakte son tu in hong sawl hi: “Israel mite awng, bang veu son a bang veu tupna nei ci sia kong he hi.

6No in hi khuapi sungah mihing tam mama na that zo uh a, lampite sia mithi luang taw a kidim hi.

7“Tua ahikom hisia Keima Vaanglianpipa Topa in nangma tungah kong son hi. Hi khuapi sia an huanna beal hi takpi hi, ahihang tua sa sia bang sa ziam? Na thalup sate ii luangte ahi hi! Hi lai ah om ngawl tu nu hi — Khuapi pua sangah hong vawk tu khi hi!

8Namsaute na kiita uh ziam? Namsau taw hong sim tu kong puak tu hi.

9Khuapi pua sangah kong lakeak tu a, ngamdangmite kong aap tu hi. A thi tu in thu kong khen zo hi,

10tuaciangin note sia noma ngamsung ngal kisimna ah hong kithatlum tu hi. Tuasia ciang mihing theampo in Keima, Topa ka hi hunlam hong he tu uh hi.

11A sung a omsa sia beal in a dal bangin hi khuapi in no hong dal ngawl tu hi. Israel ngam koisung po na om uh zongin, daan kong pia tu hi.

12Kiimkot ngamte ii thukhamte ni a, kei thukhamte paltan in, ka thupiakte na nit ngawl uh hang ahi hi. Tuasia ciangin, Kei sia Topa ka hi hunlam nong he tu uh hi.”

13Kamsaanna ka son laitakin, Pelatiah topsuk in thi hi. Thakhatin lei ah pukin ka boksuk a, “Hi heak in Vaanglianpipa Topa awng, Israel ngam sungah a kinusia theampo thatlum siat tu ni ziam?” ci in ka au hi.

14Topa in kei hong paupui hi. Ama in,

15“A thithei mihing awng, Jerusalem ah a teang mite in nang le saltaang a om na Israel mipuite ii thu a son uh hi. Amate in, ‘Saltaangte sia Topa a bia tu in a omna khuala lei hi. Topa in hi ngam sia ei tan tu in hong pia zo hi,’ ci uh hi.

16“Tu in kong son teng sia na saltanpui teng tungah son in. Ngamdang a khuala na minamte sungah a teang tu in, a puak sia pa le ngamdangte ah amate a thethaang pa sia keima ka hi hi. Ahitazong tu hun sung sia amate paina ngam ah ka ompui tu hi.

17“Tua ahikom, Keima, Vaanglianpipa Topa in ka ci teng amate tungah son in. Ngamdang ah ka thethaang na munte panin amate ka khawmtua kik tu a, Israel ngam ka pia kik tu hi.

18Amate hong heak kik uh ciangin, a ninnoi a kiihuai milim a mu theampo a vawk keak tu uh hi.

19Thin thak lung thak le ngaisutna thak amate ka pia tu hi. A thinpui suang lungtang ka lakeak tu a, thunit theina thin le lung ka pia tu hi.

20Tuasia ciang amate in ka thukhamte zui tu a, ka thupiak theampo thumaanna taw zui tu hi. Amate sia ka mihingte hi tu a, keima sia a Pathian ka hi tu hi.

21Ahihang a ninnoi, a kiihuai milimte a bia nuam mite daan ka pia tu hi. A sepnasa tungah amate daan ka pia tu hi,” hong ci hi. Vaanglianpipa Topa in son zo hi.

22Tua Cherub te leang tu in hong kithoai a, a muite in a lenna a zui uh hi. Israel te ii Pathian ii ompuina ahi khuavak taang velvol sia amate ii tungsia ah om hi.

23Tuasia ciangin tua khuavak taang velvol sia in khuapi nusia in, tua ii nisuana sangah a om mual ah kikhiin hi.

24Mukholna sungah Pathian ii thaa in kei hong laamto a, saltaangte kung Babylon ah hong paipui kik hi. Tua zawkciang mukholna hong bo a,

25tuaciangin saltaangte munah Topa ii hong lak sa theampo ka son hi.

← Chapter 10 Jump to: Chapter 12 →