Ezekiel 26

Chin SCB2 (Syin Chin Bible)

← Chapter 25 Jump to: Chapter 27 →

1Sal ka tan zawk a kum sawm le kum khat kum, a ni khat ni in Topa in kei hong paupui hi.

2Ama in, “A thithei mihing awng, Tyre khuapi sungah a teang mite ii a lungdamin a au ngawpna thu in hisia hi. ‘Jerusalem kisaat tham zo hi! A sum vawt thahatna teng bo zo hi! Ama in ei kidempui hi nawn ngawl tu hi!’ ci in amate au uh hi.

3“Tua ahile tu in hisia Keima, Vaanglianpipa Topa ii ka pauna ahi hi: Tyre khuapi awng, keima in na ngal ka hi hi. Nang hong sim tu minam tam mama kong kuansak tu a, tuaciangin amate tuihualte bangin hong pai tu uh hi.

4Amate in na khuapi kulh luphungte siasak tu uh a, na tausaangte sia nuaitham tu uh hi. Tua zawkciang a leivui teng ka phiatkeak tu a, suangpi khat nguak bek ka nusia tu hi.

5Tuipi sungah a dok tua suangpi sia tungah ngasa paaite in a ngeen uh a pho tu uh hi. Keima, Vaanglianpipa Topa in son zo khi hi. Minamte in Tyre khuapi suttol tu uh hi,

6tuaciang a namsau uh taw a ngam sungah a om khuate sungah a teang mite thatlum tu uh hi. Tuasia ciang Tyre in Topa ka hi sia hong he tu hi,” hong ci hi.

7Vaanglianpipa Topa in, “Kumpi theampo sung pan a lianbel kumpi — Babylon kumpipa Nebuchadnezzar — sia Tyre khua sim tu in kong kuansak tu hi. Ama in saksang panin ngalkap honpui khat taw siphu le siphu ngalleangte le siphu ngalkapte taw hong kuan tu hi.

8Ngam sungah a om khuate sungah a teangte ngal kidona sungah kithatlum tu uh hi. Ngalte in kanhte to in, phungciang in, kidal natu pangbitte vawt a, nang hong do, hong nang tu uh hi.

9Amate in na kidalna kulhte sia sukthapna moltumte taw suu in na ngal vilna tausaangte thikpumte taw vaattan tu uh hi.

10A siphute ii peang pan a leang leivui khu in nang hong tuam tu hi. Siphu leangte le siphu ngalleangte paina a nging sia in a lalsa khuapi kongpite a kaantan ciang, note luphung liingsak tu uh hi.

11A siphu ngalkapte in na lampite zui in hong nawk a, a namsau uh taw na mite that tu uh hi. Na khuam lianpite lei ah puksak tu uh hi.

12Na ngalte in noma hauna uh le na sumbuk vanh zuakte tang tu uh hi. Noma luphungte cimhthamsak in, innnuamte hong saat thapsak tu uh hi. Amate in a thing a suangte le suangsi theampo la in, tuipi sungah sung tu uh hi.

13Na lasak uhte ka tawlngasak tu a, na tum uh tengtongh music awte ka thimsak tu hi.

14Ngasa paaite ii ngeen a pho thei natu in suangpi khat bek kong nusiat tu hi. Khuapi sia kisa kik ngeingawl tu hi. Keima, Vaanglianpipa Topa in son zo khi hi,” ci hi.

15Vaanglianpipa Topa in Tyre tungah, hi bang teng ci nop nei hi: “No hong kizawthal ciang, tuipi vaalbo ah a teang mihingte in a kithatte ii ciik auna aw a zaak uh ciang lau vadil tu uh hi.

16Tuipi tungah a vak a cia minamte ii kumpi theampo in kumpi tokhum panin tuak tu uh hi. Amate in a puantual te le a kizepna puansilhte suutin, lei ah liingin to tu uh hi. Noma ii thuakna hu in a liinna thim thei ngawl tu uh hi.

17Amate in hi mithi vui la sia nang hong sak tu uh hi: Khuapi minthang sia kilalcipsak zo hi! A teambawte tuipi panin bocip zo hi. Hi khuapi ah a teang mite in tuipite uk hi, tuaciang tuipi vaalbo ah a teang theampo lausak hi.

18Tu in ama ii bo ni in, Tuikulhte liing a, Tuaciang a mite in tuabang lalcip na a mu uh ciangin ingh uh hi.”

19Vaanglianpipa Topa in ci hi: “Nang sia kuama teen ngawlna khuapi lalcip sa te bang kong suaksak tu hi. Tuipi thukte in nang kong khuumsak tu hi.

20Mithi khua ah taanghlai a nungta mihingte kung kong puak tu hi. Tua leinuai ngam, tawntung siatna munah mithite taw kithawl tu in kong koi tu hi. Tua zawk nungsang in na sungah hong kiteang kik nawn ngawl tu a, a nungtate ngam sungah om mun na la buatu hi.

21A lauhuai mama ettee tu kong suaksak tu a, tua in na bocip natu hi tu hi. Mihingte in nang hong zong tu a, ahihang nang hong kimu ngeingawl tu hi,” Vaanglianpipa Topa in son zo hi.

← Chapter 25 Jump to: Chapter 27 →