Ezekiel 17

Chin SCB2 (Syin Chin Bible)

← Chapter 16 Jump to: Chapter 18 →

1Topa in kei hong paupui hi.

2Ama in “A thithei mihing awng, Israel mite tungah thu sonteena khat son in a,

3Kei, Vaanglianpipa Topa ii ka ci teng amate hesak in: muvanlai a lian mama khat om hi, a mul hoi in a thate lian mama a, zalh in a zai in phalh hi. Ama in Lebanon Mualte ah leangin cedar thingkung khat ii dawn tutan a,

4sumvawtna ngam ah len pui in, sumvawtte khuapi khat ii sungah koi hi.

5Tua zawkciang ama in thingno moi khat Israel ngam panin la a, a khangsak tu tui a tawntungin a omna lei phana lo khat ah suan hi.

6A kung meang a, a niam, a zai a beakin a zaam sapitkung khat suak hi. A baakte muvanlai omna sangah khangto a, zung thukte tha hi. Sapitkung sia a baak le a teete taw kidim hi.

7“A lian mama, a tha a lian, a mul a saa mama muvanlai dang khat om hi. Tu in sapitkung pona huan sung sangin tui tamzaw muvanlai ii a piak natu lametna taw a zungte ama sang zaamsak a, a teete ama sang ngasak hi.

8Ahihang sapitkung sia leiphana, a pha in tui kibuakna lo ah kisuan zo hi, a tee meang thei a, a nga nga thiam in a limci mama sapitkung a sua natu ahi hi.

9“Tua ahikom, Kei, Vaanglianpipa Topa in, hi bangin ka dongh hi: hi sapitkung sia hingin a khang tu ziam? Muvanlai masa sia in a zung longhin, sapitngate thongh keakin, a baakte tattan sakin, vulsak ngawl tu ziam? Sapitkung a kaikeak natu thahatna lianpi ahibuale minam lian kul ngawl tu hi.

10Hi hi, hi sapitkung sia a kisuan ma hi, ahihang hingin a khang natu ziam? Nisuana sang vui in a nawk ciang vul ngawl tu ziam? A kisuanna munah vul ngawl tu ziam?” ci hi.

11Topa in kei tungah,

12“Hi a langpante munah thu sonteena ii a khiakna a he uh ziam, ci sia dongh in. Babylon kumpipa Jerusalem ah hong pai a, tuaciangin kumpipa le a uliante Babylon ah a ciapui kik sia amate tungah son in.

13Ama in kumpipa innkuanpuite khat la in, thukimna khat vawt a, ama ii tungah a thumaan tu in kiciamsak hi. Ama in mi thupite luangkhaam tu in ciapui hi,

14amate in a kithukimna sia a kepcing natu le ngal thawkikna ngam ahi ngawl natu in, a khaamna ahi hi.

15Ahihang Judah kumpipa in leedo veve a, Egypt ngam ah siphu le ngalkap honpui khat sam tu in palai seamte paisak hi. Ama in a taangtun zo tu ziam? Ama in tuabang teng taw suakta zo tu ziam? Ama in a thukimna paltan thei ngawl tu a, daan thuakna peng thei ngawl tu hi!

16“Keima a nungta Pathian ka hi takpi bangma hi kumpipa in a kiciamna le ama kumpi tokhum tungah a koi Babylon kumpipa taw a vawt thukimna paltan ahi hu in Babylon ah thi tu hi.

17Babylon te in mihing tam mama a thalup natu in, kulhte vawt a, kanhte to ahikom a thahat Egypt kumpipa ngalkaphonpi ngawngawn in ngalsimna ah ama panpui zo ngawl tu hi.

18Ama in a kiciamna le a thukimna uh paltan hi. Hite theampo ama in vawt ahiciangin tu in ama a suakta buatu hi,” Vaanglianpipa Topa in ci hi.

19Vaanglianpipa Topa in, “Kei a nungta takpi Pathian ka hi bangma in a kepcing tu in ka min taw kamciam a piaksa thukimna paltan ahikom daan ka pia tu hi.

20Savaipa ngeen ka khak tu a, ama ka man tu hi. Babylon ah ka paipui tu a, kei tungah hong thumaan ngawl ahikom tua munah daan ka pia tu hi.

21Ngal sungah ama ngalkap phabelte kithatlum tu hi, tuaciang a thi mong teng mun theampo ah kithethaang tu hi. Tuaciang Kei, Topa ka hi sia na he tu hi,” ci hi.

22Vaanglianpipa Topa in hi bangin ci hi: “Cedar thingkung saang khat ii dawn ka zamh tu a, tuaciang a meang moino khat ka thongh tu hi, tuasia mualsaang khat ii tung,

23Israel mualsaangbel sia tungah ka suan tu hi. A baakte hong khangin a ci hong nei tu a, tuaciangin a mu nop huai mama cedar kung suak tu hi. Vacim namcin tua ii tungah teang tu a, a lim bealh tu uh hi.

24Ngamsung thingkung theampo in Keima, Topa ka hi sia hong he tu uh hi. Thingkung saangte ka phuk tu a, tuaciang thingkung niamte a saangin ka khangsak tu hi. Thingkung hingte ka vulsak tu a, tuaciang thingkung kote, a hing ka suaksak tu hi. Keima, Topa in son zo khi hi. Vawt tu ka ci sa te ka vawt tu hi,” ci hi.

← Chapter 16 Jump to: Chapter 18 →