2 Kings 13

Dagbani Bible (Naawuni Kundi Kasi)

← Chapter 12 Jump to: Chapter 14 →

1Juda Naa Ahazia bia Naa Jɔash ni daa di Juda nam zaŋ chaŋ yuun’ pisinaata saha, ka Jɛhu bia Jɛhɔahaz daa di Izraɛl nam n-ʒi Samaria. O daa diya n-niŋ la o nam maa ni yuun’ pinaayopɔin.

2O daa tum alahichi Yawɛ sani, ka doli Nɛbat bia Jɛrɔbɔam ni daa tum alahichi shɛŋa n-chɛ ka Izraɛlnim’ tum alahichi la naba, ka daa bi ŋmaligi ka chɛ li.

3Ka Yawɛ suhu daa yiɣisi bahi Izraɛlnim’ zuɣu, ka o chɛ ka Siria Naa Hazaɛl min’ o bia Bɛnhadad kul tuhiri nyandi ba waawaayili.

4Ka Jɛhɔahaz daa suhi Yawɛ, ka Yawɛ deeg’ o suhigu, dama o daa nya nahiŋgu shɛli Siria naa ni nahindi Izraɛlnim’ maa.

5Dinzuɣu ka Yawɛ daa ti Izraɛlnim’ maa ninvuɣ’ so ka o fa ba Sirianim’ maa nuu ni bahi; ka Izraɛlnim’ daa lan ʒi bɛ yinsi ni suhudoo kaman bɛ ni daa pun ʒiya shɛm.

6Amaa bɛ daa bi ŋmaligi ka chɛ Jɛrɔbɔam min’ o daŋ niriba ni daa tum alahichi shɛŋa n-chɛ ka Izraɛlnim’ tum alahichi la, ka kul dolila di soli maa; ka daa na kul chɛ ka buɣili Ashɛra kpalim be Samaria.

7Ka Jɛhɔahaz tɔbbihi daa bi lan yaɣ’ lala. Kulla wɔribariba pihinu mini chɛchɛbunsi pia ni tinchandiba tuhi’ pia, dama Siria naa daa ku bɛn kpalim maa zaa n-no ba taai tiŋa kaman kabɔɣili ni taŋkpaɣu la.

8Jɛhɔahaz ni daa tum shɛlikam pahi min’ o ni daa tum shɛlikam ni o kpiɔŋ tuma zaa, bɛ sab’ di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

9Ka Jɛhɔahaz daa ti kani, ka bɛ sɔɣ’ o Samaria; ka o bia Jɛhɔash daa di nam zan’ o zaani.

10Juda Naa Jɔash ni daa di nam zaŋ chaŋ yuun’ pihitanaayopɔin saha, ka Jɛhɔahaz bia Jɛhɔash daa di Izraɛl nam ʒi Samaria. O daa diya n-niŋ o nam maa ni la yuun’ pinaayɔbu.

11O gba daa tum alahichi Yawɛ sani; ka daa bi chɛ alahichi shɛŋa zaa Nɛbat bia Jɛrɔbɔam ni daa tum n-chɛ ka Izraɛlnim’ tum alahichi la, amaa ka kul dolila di soli maa.

12Jɛhɔash ni daa tum shɛlikam pahi min’ o kpiɔŋ tuun’ shɛŋa zaa o ni daa zaŋ tuhi Juda Naa Amazia la, bɛ sab’ di yɛla niŋ Izraɛl nanim’ litaafi shɛli bɛ ni booni Yɛlikura litaafi la ni.

13Ka Jɛhɔash daa ti kani, ka bɛ zaŋ o sɔɣi pahi Izraɛl nanim’ zuɣu Samaria; ka o bia Jɛrɔbɔam daa di nam ʒin’ o nam ʒiishee.

14Ilaisha kum dɔro ni daa ti gbaag’ o saha shɛli, ka Izraɛl Naa Jɛhɔash daa chaŋ o sani nti ʒi o tooni kumdi yɛra, “M ba! M ba! Izraɛl chɛchɛbunsi ni di wɔribariba!”

15Ka Ilaisha yɛl’ o, “Kpuɣim’ tɔbu mini piɛma; ka o kpuɣi tɔbu mini piɛma maa.”

16Ka o yɛli Izraɛl Naa Jɛhɔash, “Malim’ shili n-vooi tɔb’ maa to;” ka o vooi li. Ka Ilaisha zaŋ o nuhi pa naa maa nuhi zuɣu;

17ka yɛl’ o, “Yoom’ wulimpuhili polo takɔro ŋɔ;” ka o yoo’ li. Ka Ilaisha yɛl’ o, “Toma,” ka o to li. Ka Ilaisha yɛli, “Yawɛ nasara dibu piɛm m-bɔŋɔ, nasara dibu piɛm din yɛn nyaŋ Sirianima m-bala! Dama a ni tuhi Sirianim’ Afɛk hal nti ku n-naai ba.”

18Ka Ilaisha daa lan yɛli Naa Jɛhɔash, “Kpuɣim’ piɛma;” ka o kpuɣ’ li. Ka Ilaisha yɛl’ o, “Zaŋm’ li fiɛb’ tiŋa;” ka o zaŋ li fiɛb’ tiŋ’ buta ka chɛ lala.

19Di saha ka Ilaisha daa je suli niŋ o, ka yɛli, “Di di simdi ni a zaŋ li fiɛbila siɣimsiɣim bunu bee buyɔbu; dindina a naan ŋme Sirianim’ hal ti kpimsi bɛ birili, amaa a ni bi niŋ lala maa zuɣu, a ni ŋme n-nyaŋ ba la siɣimsiɣim buta kɔŋko.”

20Ka Ilaisha daa ti kpi ka bɛ sɔɣ’ o. Mɔabnim’ daa kul chanila Izraɛl tiŋgbɔŋ ni shɛɣuni nti fari bɛ bindira yuuni kam.

21Ka do’ so daa ti kani, ka bɛ zaŋ o chani ni bɛ ti sɔɣi, ka nya Mɔab ŋmɛnditoya ka zaŋ kpim’ maa bahi Ilaisha siliga ni ka zo. Kpim’ maa ni daa kul lu siliga maa ni ha n-shihi Ilaisha kɔba, o dii neemi yiɣisi zani.

22Siria Naa Hazaɛl daa kul nahindila Izraɛlnima Naa Jɛhɔahaz ʒiɛman’ ni zaa.

23Amaa ka Yawɛ daa zo Izraɛlnim’ nambɔɣu ka niŋ ba nirilim; ka sɔŋ ba; o ni daa lo Ibrahimma mini Yisahaku ni Yaakubu alikauli shɛl’ la zuɣu ka o daa bi chɛ ka bɛ zaa kpi. O mi daa bi zaɣisi ba hal ni zuŋɔ.

24Ka Siria Naa Hazaɛl daa ti kani, ka o bia Bɛnhadad di nam zan’ o zaani.

25Di saha ka Naa Jɛhɔash ŋun daa nyɛ Jɛhɔahaz bia la daa lab’ deei tin’ shɛŋa Naa Bɛnhadad Hazaɛl bia ni daa tuh’ o ba Jɛhɔahaz ka fa la. Siɣimsiɣim buta ka Jɛhɔash daa tuhi nyaŋ Bɛnhadad ka fa Izraɛlnim’ tinsi o sani.

← Chapter 12 Jump to: Chapter 14 →