Judges 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1Ka Ifriim zuliya niriba daa ti lo tɔbu chaŋ ti gbaai Jɔɔdɛn Mɔɣili du n-chaŋ Zafɔn ti bɔhi Jɛfita, “Bɔ n-niŋ ka a daa yɛn chaŋ ti tuhi Ammɔnnima, ka bi yɛl’ ti ka ti kana ti pahi yi zuɣu ka ti chaŋ? Ti ni niŋ buɣim nyo a yiŋa ka di di n-kab’ lu a zuɣu.”

2Ka Jɛfita yɛli ba, “M mini n niriba ni Ammɔnnima n-daa mali naŋgbankpeen’ titali, ka n daa ŋme kuŋ’ boli ya, ka yi bi kana ti fa ma bɛ nuu ni bahi.

3Ka n ni daa nya ka yi bi kanna maa, ka n daa zaŋ n nyɛvili pa talima chaŋ bɛ tiŋgbɔŋ ni ti tuhi ba; ka Yawɛ daa zaŋ ba niŋ n nuu ni. Ka di chaŋ wula ka yi ti kana zuŋɔ dabisili ŋɔ ni yi ti tuhi ma?”

4Di saha ka Jɛfita daa laɣim Giliadnima n-chaŋ ti tuhi Ifriim zuliya niriba maa n-nyaŋ ba. Dama Ifriim zuliya niriba maa daa yɛlimi, “Yinim’ Giliadnim’ bɛn be Ifriim zuliya niriba mini Manaasa zuliya niriba sunsuuni ŋɔ nyɛla bɛn daa yi Ifriim zuliya niriba ni zo.

5Ka Giliadnim’ daa chaŋ ti gu Ifriim zuliya niriba maa soli so’ shɛŋa niriba ni daa yi doli duri Jɔɔdɛn Mɔɣili la zuɣu. Ka Ifriim zuliya niriba bɛn daa zɔri ni bɛ tiligi la ni so daa yi ti kana ti yɛli ba, “Chɛliya ka n gari.” Giliadnim’ maa bɔhir’ o mi, “A nyɛla Ifriim zuliya ni nira?” O yi yɛli, “Aai,”

6bɛ yɛr’ o mi, “Dindina yɛlim’ ‘Shibolɛt.’ ” Ka o yɛli, “Sibolɛt”, ka dilan’ ni ku tooi yɛl’ li viɛnyɛliŋga maa zuɣu, bɛ gbaar’ o mi ku o Jɔɔdɛn Mɔɣili dubu shee maa. Ka bɛ daa ku Ifriim zuliya niriba maa ninvuɣ’ tuhi’ pihinahinaayi di saha maa.

7Jɛfita daa niŋ Izraɛlnim’ zuɣulan’ la yuma ayɔbu. Ka ŋun’ Jɛfita ŋun daa nyɛ Giliad nir’ maa daa ti kpi, ka bɛ sɔɣ’ o o ya Giliad maa.

8Jɛfita kalinsi nyaaŋa, Ibizan ŋun daa nyɛ Bɛtilihɛm nir’ la n-daa leei Izraɛlnim’ zuɣulana.

9O daa dɔɣila bidibisi pihita mini bipuɣinsi pihita. Ka o daa zaŋ o bipuɣinsi pihita maa ti dɔbba kpaŋa bɛn pa o daŋ puuni niriba; ka daa bo paɣiba pihita kpaŋ’ na ti ti o bidibisi maa mi. O daa niŋ Izraɛlnim’ zuɣulan’ la yuma ayopɔin.

10Ka Ibizan daa ti kpi ka bɛ sɔɣ’ o Bɛtilihɛm.

11Ibizan kalinsi nyaaŋa, Elɔn ŋun daa nyɛ Zɛbulɔn zuliya ni nir’ la n-daa leei Izraɛlnim’ zuɣulana. O daa niŋ bɛ zuɣulan’ la yuun’ pia.

12Ka Elɔn ŋun daa nyɛ Zɛbulɔn zuliya ni nir’ maa daa ti kpi ka bɛ sɔɣ’ o Aijalɔn Zɛbulɔn tiŋgban’ ni.

13Elɔn mi kalinsi yaaŋa, Hilliɛl ŋun daa nyɛ Piratɔn nir’ la bia Abidɔn n-daa leei Izraɛlnim’ zuɣulana.

14O daa dɔɣila bidibisi pihinahi, ka mali yaansi bɛn nyɛ bidibisi pihita, ka bɛ daa bari bunsi pisopɔin. Abidɔn daa niŋ Izraɛlnim’ zuɣulan’ la yuma anii.

15Ka Hilliɛl ŋun daa nyɛ Piratɔn nir’ la bia Abidɔn maa daa ti kpi, ka bɛ sɔɣ’ o Piratɔn Ifriim tiŋgban’ shɛli din daa nyɛ Amalɛknim’ zoya ni tiŋ’ la ni.

← Chapter 11 Jump to: Chapter 13 →