Judges 6

Dagbani Bible (Naawuni Kundi Kasi)

← Chapter 5 Jump to: Chapter 7 →

1Ka Izraɛlnim’ daa ti tum alahichi Yawɛ sani, ka Yawɛ daa zaŋ ba niŋ Midiannim’ nuu ni yuma ayopɔin.

2Ka Midiannim’ daa nyaŋ Izraɛlnima; ka Izraɛlnim’ maa zo nti sɔɣi bɔɣa din daa be zoya zuɣu puuni mini tampima voya ni ni luɣ’ shɛŋa bɛ n-ni tooi sɔɣi zani tuhi tɔbu.

3Ka Izraɛlnim’ daa yi ti kul biri bimbirili kam, Midiannim’ maa mini Amalɛknim’ ni wulimpuhili polo nim’ kanimina ti lu bɛ zuɣu.

4Bɛ daa yi kamina nti kpa tanti suɣa do Izraɛlnim’ tiŋgbɔŋ maa ni n-saɣindi bɛ bindira zaŋ hal ti paai Gaza, hal ka binshɛli zaŋ tabili piɛri mini niɣi ni bunsi gba bi kpalim.

5Dama bɛ daa yi zaŋdila bɛ tantinim’ mini bɛ niɣi ni bɛ laakumnim’ kanna ti luri bɛ zuɣu, ka bɛ galisim ŋmanila toli. Ka bɛ mini laakumnim’ maa daa ka kalinli. Dinzuɣu bɛ daa yi ti kana bɛ saɣindila bɛ tiŋgbɔŋ maa ni binshɛɣukam.

6Ka Izraɛlnim’ daa nya filiŋ pam Midiannim’ maa zuɣu, ka daa naɣ’ ti kummi niŋ Yawɛ ni o sɔŋ ba.

7Izraɛlnim’ ni daa kum niŋ Yawɛ Midiannim’ zuɣu maa,

8ka Yawɛ daa tim anab’ so Izraɛlnim’ sanna ka o ti yɛli ba, Yawɛ ŋun nyɛ Izraɛl Naawuni ŋɔ ni yɛli shɛm m-bɔŋɔ: “Mani n-daa yihi ya Ijipti na, ka yihi ya dabitim ni.

9N daa tiligi ya Ijiptinim’ mini bɛnkam zaa daa nahindi ya nuu ni, ka kari ba ka zaŋ bɛ tiŋgbɔŋ ŋɔ tin ya.

10N daa yɛli ya, ‘Man’ Yawɛ n-nyɛ yi Naawuni, dinzuɣu miriya ka yi jɛm Amɔrinim’ shɛb’ tiŋgbɔŋ ni yi ni be ŋɔ wuna la.’ Amaa ka yi zaɣisi n noli.”

11Ka Yawɛ malaika daa ti kana ti ʒi oki tia din daa be Ofira ka nyɛ Jɔash ŋun daa nyɛ Abiɛza zuliya ni nir’ ni su shɛl’ la gbini. Ka o bia Gidiɔn daa sɔɣi be nimaani wain tɔɣiri bɔɣili ni buri alikama ka bi bɔri ni Midiannim’ nya o.

12Ka Yawɛ malaika maa daa ka o sanna ti yɛl’ o, “Nyin’ ŋun nyɛ suhukpeendana ni kpiɔŋlan’ ŋɔ, Yawɛ be a sani.”

13Ka Gidiɔn yɛl’ o, “Ndana, n suhir’ a, Yawɛ yi be ti sani, di chaŋ wula ka yɛla ŋɔ zaa paai ti? Ti yaannim’ ni yɛl’ ti ni Yawɛ daa tum alahiziba tuun’ shɛŋa la zaa lee bela ya? Bɛ daa kul bɔhira, ‘Pa Yawɛ n-daa yihi ti Ijipti na la?’ Amaa pumpɔŋɔ o chɛ ti mi bahi, ka zaŋ ti niŋ Midiannim’ nuu ni.”

14Ka Yawɛ ŋmaligi yɛl’ o, “Mani n-tim a, zaŋm’ a kpiɔŋ ŋɔ chaŋ ti fa Izraɛlnim’ Midiannim’ nuu ni bahi.”

15Ka Gidiɔn garigi yɛl’ o, “Ndana, wula ka n lee yɛn niŋ n-tooi fa Izraɛlnim’ bahi? Nyama, n daŋ niriba nyɛla bɛn ka yaa Manaasa zuliya ni, ka m mi nyɛ ŋun pɔri n yiŋnim’ ni.”

16Ka Yawɛ yɛl’ o, “N ni be a sani, ka chɛ ka a ŋme n-ku Midiannim’ kaman ninvuɣ’ yino n-nyɛ ba la.”

17Ka Gidiɔn daa yɛli, “A nini yi tiɣi ma, nyin’ wuhim’ ma shihirili din wuhiri ni nyin’ Yawɛ n-tɔɣisiri ma yɛtɔɣa ŋɔ.

18N suhir’ a, ni a di chaŋ, ka m bo pin’ na ti ti a.” Ka o yɛl’ o, “N ni guh’ a hal ka a ti labina.”

19Ka Gidiɔn daa kuli ti gbaai bubil’ kɔrigi, ka tooi zim kilɔgiram pia m-mali bɔrɔbɔro din ka dabindi. Ka daa zaŋ nimdi maa n-niŋ piɛɣu ni, ka zaŋ ʒiɛri mi niŋ ʒɛduɣu ni n-zaŋ li ka oki tia maa gbinna ti ti o.

20Ka Yawɛ malaika maa daa yɛl’ o, “Zaŋm’ nimdi maa mini bɔrɔbɔro din ka dabindi maa pa tampiŋ ŋɔ zuɣu, ka kpaai ʒiɛri maa pol’ li.” Ka Gidiɔn daa niŋ lala.

21Ka Yawɛ malaika maa daa zaŋ o ni gbib’ jaaŋgbe’ shɛli o nuu ni nyol’ ni shihi nimdi maa mini bɔrɔbɔro maa. Ka buɣim daa yi tampiŋ maa ni na taai nimdi maa mini bɔrɔbɔro din ka dabindi maa n-di li zaa. Ka Yawɛ malaika maa daa ŋmaligi chaŋ, ka Gidiɔn bi lan nya o.

22Di saha maa ka Gidiɔn daa baŋ ni Yawɛ malaika m-bala; ka kuhi yɛli, “Mbaye! Yaa n Duuma NAAWUNI, dama n nini nya Yawɛ malaika!”

23Amaa ka Yawɛ yɛl’ o, “Di chɛ ka dabiɛm mal’ a. Chɛ ka a suhu doya, a ku kpi.”

24Ka Gidiɔn daa me sara maligu bimbini ti Yawɛ nimaani, ka bol’ li, “Yawɛ nyɛla suhudoo.” Ka di na kul ʒe Ofira Abiɛzanim’ ni su luɣ’ shɛl’ la hal ni zuŋɔ.

25Ka Yawɛ daa yɛli Gidiɔn dindali maa yuŋ, Gbaam’ a ba naɣilaa, ka bo naɣila’ so ŋun pah’ ayi ka nyɛ yuma ayopɔin ka daag’ a ba ni me Baal bimbin’ shɛl’ la luhi, ka ŋmaai Ashɛra ŋmahinli binwɔɣinli din ʒe m-baɣ’ li la luhi;

26ka me bimbini n-chɛ ka di kuɣa do m-pa tab’ zuɣu viɛnyɛliŋga tam zoli ŋɔ zuɣu n-ti Yawɛ ŋun nyɛ yi Naawuni ŋɔ; ka zaŋ naɣila’ so ŋun pah’ ayi la mali sara zaŋ o pa Ashɛra ŋmahinli binwɔɣinli shɛli a ni daai luhi la dari zuɣu n-nyo li buɣim.

27Ka Gidiɔn daa zaŋ o tumtumdiba ninvuɣ’ pia pa omaŋ’ zuɣu chaŋ ti niŋ Yawɛ ni yɛl’ o ni o niŋ shɛm maa. O daa zɔrila o yiŋnim’ min’ o yanim’ ni o niŋ li wuntaŋ’ ni, dinzuɣu ka o daa niŋ li la yuŋ.

28Ka biɛɣu daa neei ka tiŋ’ maa nim’ yina ti nya ka bɛ wurimla Baal bimbini maa, ka daai Ashɛra ŋmahinli binwɔɣinli din ʒe m-baɣ’ li la luhi, ka me bimbin’ shɛli zali di zaashee maa, ka zaŋ naɣila’ so ŋun pah’ ayi mali sara pa di zuɣu n-nyo o buɣim.

29Ka bɛ bɔhiri taba, “Ka ŋuni n-lee tum tuuni ŋɔ?” Ka bɛ daa vihi di zuɣu hal ka so ti yɛli ba ni Gidiɔn Jɔash bia la n-tum tuuni maa.

30Di saha ka tiŋ’ maa nim’ daa yɛli Jɔash, “Yihim’ a bia maa na ka ti ku o. O ni wurim Baal bimbini, ka ŋmaai Ashɛra ŋmahinli binwɔɣinli din ʒe m-baɣ’ li la luhi la zuɣu.”

31Amaa ka Jɔash daa bɔhi bɛn zaa kana ti lir’ o maa, “Yi zanila Baal zaani? Yi zabirila o zuɣu? Ŋunkam zabir’ o zuɣu, zaŋ chaŋ biɛɣ’ asiba bɛ ni ku dilana. O yi nyɛla wuni, yin’ chɛliy’ o ka o zab’ omaŋ’ zuɣu, dama o bimbini ka bɛ wurim maa.”

32Dindali maa zaŋ chana, bɛ daa booni Gidiɔn la Jɛrubaal, Di gbinni nyɛla, “Chɛliya ka buɣili Baal min’ o va; dama o bimbini ka o wurim maa.”

33Di saha maa ka Midiannim’ mini Amalɛknim’ ni wulimpuhili polo nim’ zaa daa laɣim kana ti gbaai Jɔɔdɛn Mɔɣili du n-zaŋ bɛ tantinim’ ti kpa Jɛziriil Vinvamli ni.

34Amaa ka Yawɛ Shia daa siɣi Gidiɔn zuɣu na, ka o zaŋ kikaa piɛb’ boli Abiɛza daŋ niriba ni bɛ kana ti dol’ o.

35Ka o daa tim tuumba Manaasa zuliya niriba zaa sani nti boli ba ka bɛ kana ti dol’ o. Ka o daa lan tim ti boli Asha mini Zɛbulɔn ni Naftali zuliya niriba, ka bɛ gba daa kana ti pahi bɛ zuɣu.

36Di saha ka Gidiɔn daa yɛli Yawɛ. “A yɛliya ni a ni zaŋ ma tuhi fa Izraɛlnim’ bahi.

37Nyama, n yɛn zaŋla piɛ’ gbaŋ sɔŋ kabɔɣili ni, maligim yi lula piɛ’ gbaŋ maa kɔŋko zuɣu, ka bi lu m-mahigi tiŋgbani gil’ li, dindina m baŋya ni a shiri ni chɛ ka n fa Izraɛlnim’ bahi kaman a ni yɛli shɛm.”

38Ka di daa shiri niŋ lala. Biɛɣu ni daa neei, ka Gidiɔn yiɣisi asiba, o daa kahim piɛ’ gbaŋ maa zuɣu maligim palila pipia.

39Ka Gidiɔn daa lan yɛli Naawuni, “N suhir’ a, di chɛ ka a suhu yiɣisi bahi n zuɣu, m bɔrimi ni n lan zaŋ piɛ’ gbaŋ maa sɔŋ buɣisi bin’ yini pahi. N suhir’ a, chɛ ka maligim lu m-mahigi tiŋgbani gili piɛ’ gbaŋ maa, amaa ka chɛ ka piɛ’ gbaŋ maa zuɣu kuma.”

40Ka Naawuni daa shiri niŋ lala dindali maa yuŋ. O daa chɛ ka piɛ’ gbaŋ maa zuɣu kummi, amaa ka chɛ ka maligim lu m-mahigi tiŋgbani din gil’ li zaa.

← Chapter 5 Jump to: Chapter 7 →

Recommended Reading

Commentary Judges Commentaries → Devotional Judges Devotional Guide → Get This Bible Dagbani Bible (Naawuni Kundi Kasi) Study Bible →